إنك بتخلي زيارة الساحل دي رياضة ومتعة، إزاي بتعملي كده؟ بتعملي إيه؟ = بصي، المكان اللي إحنا قاعدين فيه هادي جدًا جدًا جدًا، ما فيهوش خروج بالليل ولا سهر. أنا بعيدة عن الأماكن دي، هو زي مصيف أيام زمان، عبارة عن البحر اللي بنروحه والشمس اللي بنشوفها، ونقعد نلعب إحنا والعيلة. بالنسبالي الشهرين دول حلوين عشان الولاد يبقوا على تواصل مع بعض، وما عنديش أنا الحاجات اللي تقلق وتخوّف، ولا خروج كتير. فاكرة مصيف زمان؟ ناكل بطيخ بالليل، ونلعب ورق وكوتشينة، والألعاب الجديدة اللي زي أونو والحاجات دي. بنتي بتحب أوي تلعب الحاجات دي. بنتجمع، وبييجوا إخوات عمرو بولادهم، وبامي وأخويا. مفيش أماكن سهر ولا الكلام ده خالص، إحنا جوه المكان مبسوطين. بتاخدي حلة محشي ومكرونة معاكي على البحر؟ = لأ، مش على البحر، بس باخد معايا كل حاجة وأنا في الطريق. ما إحنا لو الحاجة هناك غالية، يبقى متوفر معايا كل حاجاتي، وكل حاجة باخدها بتوفر على الراجل شوية برضه. بجد بتعملي كده؟ = أيوه والله، بتكلم جد، مش عيب يعني. وبعمل الأكل في البيت. عندي ناس بتساعدني طبعًا، بس إنتِ عايزة تحمي ولادك، لازم تبقي متواجدة. مفيش حاجة اسمها إني أبقى غايبة وسايبة الناني تربي، وبعد كده أقول أصلًا أنا خايفة. أنا مؤمنة إن دور الأم صعب إنك تؤديه عن بُعد. لو حد عنده ظروف، ربنا يعينه طبعًا، بس لو خايفة على أولادك، لازم تبقي إنتِ اللي معاهم طول الوقت.