غلاك أكبر من الواقع من الشرح ومن التعبير
ليا شفت المشاعر ما توصف قدرك أعذرها
على طاري غلاك الله يمسي طلتّك بالخير
ياحلو الليلة اللي في ملامح وجهك أسهرها
أحبك والمحبة ما لها غير الوصل تبرير
تمعن كلمة أحبك على أذنك يوم أكررها .
حبيبي لـ أمتلى صدر الليالي ضيقه وتجريح
تجي صبحٍ ينوّر في فضاي الليل ويحنّه ؟
يا أكرم خلق ربي لا غدى كفّ الوصال شحيح
لا تعطي نار هجرانك .. وعيني ترجي الجنّه
ألوم الناس والذّكرى وكل دمعه وكل تجريح
ولا لوم الضماير في فؤادك يوم حبّنّه .
سالب الألباب لا تطلب على الفرقا سبايب
والعمر شجره تدانت لك من اللهفه ثمرها
إن عطيتك ما عطيتك من ورا خشم وطلايب
وإن تعفّفت .. النفوس الطيّبه لـ الله خبرها
ما قدرت أنساك وجروحي عقب وجهك عطايب
كل يوم ألوم نفسي في هواك ولا أعذرها .
سرّي الأخّاذ .. ما طرّت مشاويرك : سمّاعي ؟
كم حذفت أسمك على متن الهبوب ورحتّ شيمه
والغنيمه في دواعي ضحكتك ؟ كانت دواعي
ضحكتي لو ضحكتي ما هيب في عيني غنيمه
مرحبا بك يا خُلودي في الشعور .. ويا إندفاعي
مرّ عمري قربك أسرع من سبب حزن اليتيمه .
عليك المنّ والسّلوى وسلام الله وظلّ الغيم
يا أكثر من نقش أسمه على معظم تفاصيلي
أنا لولا حيا قلبي وأخاف العيب والتّحريم !
كتبت أسمك على وجه الحياة وقلت : يا ويلي
يزورك من هبوب الرّيح مالا يرتعش له ديم
وأقصّ آثار خطوات الوداع .. وينقطع حيلي .
تهادى يا ربيعي وأدمح الزله وكف شتاي
غيابك ما ترك لـ شفاي ضحكه لين سمّمها
حياةٍ دون وجهك موت وأرضٍ تفقدك منفاي
وسرّا ما تتمّمها عليّ .. ما الله متمّمها .
بعد غيبة شهر لـ الوصل مشتاقه
كابرت لين جاب الشّوق تاليها
أقبلت لـ اللقى والعشق توّاقه
كل غصن .. إيتثنّى من تثنّيها
خلّت أطول ظفايرها على السّاقه
كنّها الصبح .. والليل مْتقفيها
غيمةٍ من حقوق الوسم منساقه
دكها البرق وأشتبت مثانيها .