𝙞𝙣 𝙡𝙤𝙫𝙚 𝙬𝙞𝙩𝙝 𝙘𝙝𝙤𝙘𝙤𝙡𝙖𝙩𝙚

أنا طول الوقت بقول أنا جوزيهي الهَوَى. بس مفيش فترة من سنين كان جوزية بيمر قدامي زي الفترة دي .. وكل يوم بسأل نفسي هو إزاي الراجل ده كان عبقري كده؟!.. لا بجد، إزاي ساب إرث عظيم بالشكل ده؟! في كل موقف، بيكون بالنسبالي أكتر شخص بستدعي مواقفه.. ده مش مدرب كورة، لا لا.. ده حكيم وفيلسوف وعرّاب وملهم ومجدّد، حتى في شخصية الأهلي نفسها! تقف عند جملة زي: «الأسوأ من الهزيمة عدم القتا ل من أجل الفوز». إيه عبقرية الجملة دي؟! إيه عمق الجملة دي؟! التنافسية تعني احتمالية الفوز أو الخسارة.. مفيش ما يُسمى بقاعدة الفوز المطلق، فالخسارة شيء وارد حدوثه، ولكن أي نوع من الخسارة هي الخسارة اللي ممكن تتقبلها ؟! خسارة نتيجة سوء الحظ أو أفضلية المنافس وإنت بتحاول تعمل اللي عليك؟.. ولا خسارة عشان أنا مستسلم، بائس، متكاسل ومتخاذل، ومحاولتش أصلًا تكسب؟!! مين اللي حط مفهوم «النجوم مكانهم في السماء، أنا هنا عندي الفريق هو النجم الأوحد»؟! مين حمى اللعيبة من تضخم الذات، وإنهم يشوفوا نفسهم على الجمهور، وقالهم: إنتوا مش أطباء ولا علماء ولا ناس مهمة أصلًا، إنتوا مجرد ناس دورها تسلية الجمهور؟! مين اللي قال لعماد متعب: إنت فاكر نفسك هتبقى بره التشكيل بعد مشكلتك مع الضابط؟ بس إنت هتلعب وهتبدأ، وهتروح تسمع هتافات الجمهور ضدك بنفسك، لأن ده أفضل عقاب ليك؟! مين اللي قال لتريكة، أسطورة وأيقونة الأهلي: «كان يا ما كان عندنا لاعب كبير اسمه أبو تريكة»؟! مين سحب الشارة من الحضري؟! مين لعب لاعب زي أحمد حسن استاكوزا في الديربي؟! مين لعب لاعب لسه معملش حاجة زي أحمد شديد قناوي في نهائي أفريقيا ضد الصفاقسي؟! وأوعى تفتكر إن كان جوزيه يقدر يقنع كل الناس دي إلا لو عنده فنيات! شوف أي نجم في استوديو لحد دلوقتي، لازم هتلاقيه بيحكي حاجة اتعلمها من جوزيه! وأوعى تفتكر إن جيل 2005 ده كان جاي جاهز.. لا لا، دي أكذوبة! تريكة جاي من نادي الترسانة، وكنت سامع وشايف بنفسي مدرب للمنتخب بيقول إنه لا يصلح للعب الدولي.. فجوزيه حوّله لأسطورة! بركات، مجلة الزمالك كتبت إنه صفقة شربناها، ومبطل بسبب مرض الغدة! فلافيو مين راهن عليه؟! وجلبرتو مين غيّر مركزه من جناح لباك شمال؟! ومتعب وحسام عاشور مين صعّدهم؟! وأوعى تصدق إن مكنش فيه ضغوط أيامها! الراجل ده دخل صراعات مع رابطة نقاد وصحفيين وحكام واتحاد كرة ومنافسين وإعلام.. وتصدق حتى أحيانًا جمهورنا! في واقعة أحمد حسن في ماتش المقاصة، لما الجمهور هتف لأحمد حسن في مواجهة قرار جوزيه، فطلع جوزيه قال للجمهور بعد الماتش: «أنا فقط من أحدد من يرحل ومن يبقى، الجمهور هنا فقط لمساندة النادي» مفيش لاعب ممكن يلعب بأسمه أو بتاريخه أنت مجهودك بس هو اللي هيخليك تلعب كتالوج جوزيه ده مُلهم لأي حد عايز ينجح جوه الأهلي.. والفترة دي هي أكتر فترة محتاجة إننا نرجع لإرث جوزيه ده

وعند الفجر، اللهم إني أستودعك ما أخاف عليه، وما أرجوه، وما لا أحسن التعبير عنه؛ فأنت تعلم ما في قلبي. ارزقني طمأنينةً بك، وحسن ظنٍّ بوعدك، وقوةً على طاعتك، واجعل لي من كل ضيق مخرجًا. وصلِّ اللهم وسلِّم على سيدنا محمد