🎬مقاطع🤣 و🐦عربية ✌

الفرق 20 سنة.. الموقف واحد والمبدأ اختلف ‼️ من 20 سنة، لما حصل الصدام الشهير بين الكابتن حسن شحاتة ونجم توتنهام الإنجليزي أحمد حسام ميدو، بسبب استبداله لأسباب فنية، تقريبًا مكنش فيه حد مش واقف في صف حسن شحاتة. حتى لما بدأت محاولات الصلح، كان الطرف اللي الناس بتتحايل عليه علشان يعفو ويسامح هو المدرب، مش اللاعب. جمال وعلاء مبارك، وهما أحياء يُرزقون، حاولوا التدخل وإقناع الكابتن حسن شحاتة بالسماح لميدو بالمشاركة في المباراة النهائية، وكذلك سمير زاهر، رئيس اتحاد الكرة وقتها. ورغم كل المحاولات، أصر حسن شحاتة على موقفه، وقرر استبعاد ميدو من المباراة النهائية، بل ومن أي معسكر آخر للمنتخب. وبعد 20 سنة من الواقعة دي، بنشوف رئيس اتحاد الكرة المصري بيسافر للاعب علشان يراضيه، ويقوله: متزعلش من مدربك علشان عمل تغيير وطلعك من الملعب! والإعلام كمان بيتحدث عن أهمية هذا التغيير وتأثيره، وكأن من حق اللاعب الاعتراض على قرار مدربه، أو كأن إجراء التغييرات الفنية أصبح أمرًا يحتاج إلى تبرير! أنا مش داخل في جدال حول مين كان السبب في إقالة حسام حسن، فده سؤال يُوجَّه لصاحب القرار، لكن اللي شاغلني فعلًا هو قيمة الأشياء ومعانيها، وكيف تغيّرت المعايير والمواقف. هل كانت 20 سنة كافية لتغيير مبادئنا؟ وإيه اللي حصل خلال العشرين سنة دي علشان نوصل لمرحلة بقت فيها هيبة المدرب وقراره الفني محل تفاوض ومجاملة؟ الفرق مش بس 20 سنة.. الفرق في المبادئ.. ✍🏻