ونتي منا إلى ماله نهايه
من جروحٍ في ضميري مستكنه
بس ياعيني من الدمعه كفايه
المفارق واقعٍ لا بد منه
ماحسبت حساب روحي في البدايه
عادني طربٍ وروحي مرجهنه
مبطي والحزن واليني ولايه
صادرٍ حكمه علي من غير سنه
- عامر بن نوطان
رجعت من الغياب اللي تركني في غيابة جبّ
على شان الحضور اللي يجي بإدراك وعنايه
أبثّ الروح وتصير البيوت من المهار القبّ
ويظهر نجم .. وتدندن رعود .. وترتكز رايـه
" لا يرفعني مديح ولا ينزّل من مقامي سب
انا مدرك ولي عقل استشيره وآخذ بـ رايّه "
مع إن كل فرضٍ لا أذن المذن أصلّيه
معي ضيقة اللي مايصليه في وقته
من أول أضحك واحدٍ عند قبر اخيه
وذا الحين لا واجهني الطرب ضايقته
لا شفت الجماد اسمع وش يقول وأحاكيه
والإنسان ما أفهم وش كلامه لا ناطقته
أعيش الحزن مع كل من يفتقد غاليه
لو أشوف غصنٍ جف ساقيه عانقته
شعوري ورا حلمي وأنا أصايده وأخطيه
أخاف إنه أحلى من شعوري لا حققته
حبيبي يا ليت العمر منا إلين أنهيه
مثل ضحكتك لا قلت شيءٍ ما صدقته
ما تقدر تقول إن فاقد الشيء ما يعطيه
وأنا أعطيك ضحكٍ لي سنة يوم فارقته
لقاك أسرع من الحلم مع فارق التشبيه
لو تسابقه الأحلام ماهيب سابقته
أنزه " محبتك الشريفه " من التشويه
وأنا العاشق اللي رغبة النفس مرهقته
ما طلت العنب لكن والله ما أعذرب فيه
أشوفه وأعرف إنه حلو ما بعد ذقته :)
- علي آل صبيح
والحبيب اللي كلام عيونه اكثـر من كلامه
ودي امسك كل لحظه في وصاله واتجود
قال وشلونك .. وقلت بخير يامال السلامه
قال اكيد قلت اكيد اني من الصعب اتعود
في غيابك جالس ادور على نص … ابتسامه
قال خايف؟ قلت اخاف انك تروح وما تعود
ليلةٍ ما جابت الحاجه لصوتك ما تراعي
راوغت وأنا صباحاتي من أرزاقي عقيمه
كنها مرت على عمري كذا من دون داعي
زايده على الحياة وفطرة النفس السليمه
والدروب اللي تودي عنك ملوية مساعي
والدروب اللي ترجعني لقربك مستقـيمه