اللي يقهرني إني زوجته وعلى ذمته، واذا جلس معي في البيت تشوفه ساكت ما يقول حرف، طول وقته غارق بجواله، وإذا سالته أو شكيت فيه قام يصارخ بوجهي «كيف تشكين فيني» ويحلف وكأنه أطهر إنسان بالدنيا

أبوي اليوم قرر يوزع الورث، وقال ابي أموت وأنا مرتاح، الله يطول بعمره ويعطيه الصحة والعافية، والحمدلله الكل كان راضي وموافق بس اللي صار بعدها ماتوقعته، أخوي الكبير قال «المفروض البنت المتزوجة ما يكون لها نصيب، لأنها بالنهاية بتودي فلوسها لزوجها» طيب لحظة.. وش دخل زوجي في ورث أبوي؟ 🥺 يعني أنا بنت أبوي مثل ما أنت ولده، وش ذنب زواجي ينقص من حقي؟ والله ودي أفهم وش المنطق اللي يفكر فيه أخوي! من متى زواج البنت يلغي حقها؟

يا جماعة الخير وش تنصحوني؟ صار لي ثلاث سنين متزوجة من رجل بخيل لدرجة إني بديت أكره حياتي معه من كثر ما أجوع وأنا على ذمته تخيلوا كل ماجعت وما لقيت شي آكله، يوديني بيت أهلي ويقول تغدي وتعشي، وأجيك بعدين واللي زاد قهري إني جبت له مولود، وحتى حليب طفله ما يبي يشتريه 👇

أهلي ظلموا أختي ألكبيرة ظلم ما أنساه طول عمري بسبب جهلهم بموضوع كان المفترض يستشيرون فيه طبيب بدل ما يحكمون على مستقبلها أختي وصلت الى عمر 23 سنه وهي ما تجي عليها الدورة الشهرية وامي تقول الله يعوضها أختكم عقيم وما راح تجيب عيال قالوا هالكلام بدون فحص ولا استشارة وانتشر بين الناس وصار الكل ينظر لاختي على انها عقيم واليوم عمرها 30 سنة وكلنا تزوجنا إلا هي وراح ابوي لولد خاله عنده ولد كبير بس معاق وأعرج بس عقله سليم وابوي قال عندي بنت ما تخلف ابيها لولدكم ماصدق على طول ووافق واختي عرفت ب الموضوع وانهارت مرة ورفضت تتزوج بس أبوي اجبرها عليه وهي جميله جداً واول شهر بزواجها جاتها الدورة وبعد سته شهور حملت وجابت ولد زي البدر بس للحين مو مقتنعه بزواجها وماتحبه أدعوا لها تكفون أنظلمت من أقرب الناس لها

أبي نصيحتكم كيف تتصرفون لو كنتوا مكاني.؟ أنا متزوجه ولي ثلاث سنة وأم زوجي هي اللي خطبتني لولدها ومن يوم تزوجت وأنا أتعامل معها مثل أمي وماقصرت معها بشيء لكن اللي قاعد يصير معي نعبني نفسيا من بداية زواجي وهي تقارني بطليقة ولدها وكل شوي تمدحها قدامي وكأنها تبي توصل لي إني أقل منها، وحتى إذا صار خلاف بيني وبين زوجي، بدل ما تهدي الوضع، تحرضني عليه وتقول «لو أنا مكانك لا أنفصل عنه» واللي قهرني أكثر إنها وصلت تقول قدام زوجي إني «مجمعة أدلة عشان أخلعه» وهاذا مو صحيح، ولا فكرت بهالطريقة أصلا أنا ما أدري وش سويت لها عشان تعاملني كأني عدوة، مع إني دخلت بيتهم بنية طيبة، وحاولت اكسبها وأعاملها مثل أمي، لكن تعبت من المقارنات والتدخلات والكلام اللي يزرع الشك بيني وبين زوجي الحين وش تنصحوني؟ أخلي علاقتي معها رسمية وأوقف الفضفضة معها نهائياً؟ أو اواجهها وأقول لها إن تصرفاتها جرحتني؟

أليوم صار لي مصيبة ما أنساها طول عمري أخوي الكبير قفطني وانا أكلم واحد وأول شي جاء على بالي إنه بيضربني ضرب مبرح لكن اللي صار ما كان على بالي أبداً قفل الغرفة وجلس جنبي وقال لي كلام مستحيل أنساه قال أنا ماوقفتك عشان أفضحك أو أستغل غلطك ضدك لو أبي أضرك كان فضحتك عند أمي وابوي لكن أنا اخوك واللي يوجعني مو إنك كلمتي شخص من وراي اللي يوجعني انك حطيتي نفسك بمكان ممكن يضرك ويخليك تندمين يوم من الأيام والله العظيم بكيت بالساعات من كلامه مو خوف منه لكن من طيبة قلبه وخوفي إني خيبت ظنه بس علمني غلطتي بدون ضرب ولا إهانة وخلاني أقتنع بنفسي إني ما أكررها أبداً