Ahmed Ibrahim

📌 امبارح كان ديربي الباسك في الدوري الإسباني بين أتلتيك بلباو وريال سوسيداد.. بلباو تفوق 2-1.. بس الأهم من نتيجة الماتش، كانت الصورة اللي تحت دي. 📌 النهاردة معانا قصة علم كان ممنوع في يوم من الأيام.. وقائدين تاريخيين للغريمين بيكرروا مشهد أيقوني بعد 50 سنة تقريبا من يوم كان غير عادي في تاريخ ديربي الباسك، وأمام الآلاف في "سان ماميس". إيه قصة العلم دة؟ 📌 قبل ديربي أتلتيك بلباو وريال سوسيداد، رجع خوسيه أنخيل إيريبار وإيناكيو كورتاباريا.. القائدين السابقين لطرفي الدربي.. لأرض الملعب مع بعض، عشان يعيدوا بعد حوالي 50 سنة واحد من أشهر المشاهد في تاريخ الكرة الباسكية. الاتنين حملوا علم الباسك "الإيكورينيا" في ملعب سان ماميس، وسط ممر شرفي من لاعبي الفريقين وتصفيق حوالي 50 ألف متفرج. 🔹 مشهد كان يستحق الاحتفاء.. لأن العلم دة لفترة طويلة كان ممنوع أصلا. 📌 يوم 5 ديسمبر 1976، ريال سوسيداد استضاف أتلتيك بلباو في ملعب أتوتشا القديم. وقتها إسبانيا كانت في مرحلة انتقالية بعد وفاة الجنرال فرانكو، لكن إظهار علم الباسك في العلن كان لسه محظور. وفجأة، الفريقين دخلوا أرض الملعب وورا إيريبار وكورتاباريا، وكل واحد منهم ماسك ناحية من العلم. المشهد اتحول بعد كده لواحد من رموز التحول السياسي والاجتماعي في إقليم الباسك. 🔹 بس مين جاب العلم أصلًا؟ 📌 البطل اللي مش باين تقريبًا في الصورة هو لاعب ريال سوسيداد "خوسيه أنطونيو دي لا أوث أورانغا".. واللي المفارقة إنه مكانش حتى ضمن قائمة المباراة يومها. شقيقته آني ميرين صنعت العلم في غيتاريا، وأورانغا أخده في عربيته من طراز "فيات 128" زرقاء اللون، وخبّاه تحت الاستبن. وفي الطريق، الشرطة وقفته وفتشت العربية.. لكن لحسن حظخ ملقتش العلم! 📌 وبعد ما وصل الملعب، كانت المشكلة التانية.. إزاي يدخل العلم في وجود الشرطة؟ بحسب الروايات المتداولة.. العلم اتسرب لغرف الملابس بشكل سري، وفي واحدة منها.. اتقال إنه دخل من شباك صغير، وبعدها أورانغا أخده وخرج مع اللاعبين رغم إنه مش مشارك في المباراة، وسلّمه للقائدين. وللعلم.. أورانغا نفسه موجود في الصورة التاريخية، لكن العلم مغطي جسمه ووشه تقريبًا.. يعني الراجل اللي دبّر المشهد كله.. بالكاد ظاهر فيه. 📌 لاعبو أتلتيك بلباو ماعرفوش بالمقترح غير قبل المباراة بحوالي ساعة ونص.. وقائدهم إيريبار وافق، لكن بشرط.. كل اللاعبين لازم يوافقوا. بس وافقوا على القرار بالإجماع. 📌 والمفارقة إن المباراة نفسها انتهت بخسارة أتلتيك بلباو 5-0.. لكن إيريبار قال بعد سنين إنها رغم النتيجة: "إنه الديربي الذي ترك أجمل ذكرى لدي، رغم خسارتنا". 🔹 بعدها بشهر ونص تقريبًا.. اتغير كل شيء 📌 يوم 19 يناير 1977 تم السماح رسميًا بعلم الباسك، قبل ما يتحول بعد كده للعلم الرسمي لإقليم الباسك. والأدق إن مشهد أتوتشا ماكانش هو السبب الوحيد في القرار، لكنه أصبح رمز مهم جدًا في الطريق ناحية قبول العلم وتقنينه. 📌 وعشان كده، لما إيريبار وكورتاباريا رجعوا يعيدوا المشهد بعد حوالي نص قرن، الموضوع كان استعادة للحظة اتفق فيها لاعبو فريقين غريمين إنهم يدخلوا الملعب ورا رمز واحد، رغم إنه كان ممنوع وقتها. – at Domiat, Egypt