ريان | حلول تقنية وبرمجية

من بعد انهارده، اي حد عنده فرصه يبقى صانع محتوى، وده غير قوانين اللعبة تماما 🔥 صناعة الترفيه من افلام ومسلسلات والعاب بتتغير جذريا، حتى التعليم لا شك ان ناس كتير هتقعد في البيت، الموضوع شيق لكن له اثار مدمره💣 و صناع محتوى متواجدين حاليا و مكتسحين مش هيبقى ليهم وجود خلاص👻 في الـ ٤٨ ساعة اللي فاتوا تم اطلاق موديل ذكاء اصطناعي جديد اسمه "Stable Video Diffusion"، بيحول الصور لفيديوهات و قريب هيبقى ممكن يحول الكلام لفيديوهات الفكرة مش جديده و في موديلز تانيه بتعمل كده زي Runway Gen-1 و Gen-2، لكن الفرق هنا في الجوده اللي واضح انها احسن بشويه كويسين و هسيبلك تحت امثله عشان تشوف بنفسك... كل ده بيحصل واحنا لسا في ٢٠٢٣ و الموضوع بيتحرك بسرعة جدا و الجوده لسا هتزيد بمعدل عمر ما كان حد يتخيله او يتوقعه على فكره سام التمان قبل ما يترفد بيوم كان في منتدى APEC و سألوه... "ما هي المفاجأة الأبرز التي تعتقد أنها ستحدث في مجالك أو في شركتك في عام ٢٠٢٤؟" رد و قال ان قدرة موديلز الذكاء الاصطناعي واللي ممكن تعمله، هتاخد قفزه كبيرة جدا، تفوق توقعات اي حد، و قال ان الناس فاكره ان التقدم السنة الجايه هيكون بمقدار معين و لكن المقدار ده هيكون مختلف تماما و مفاجيء جدا النقاط اللي بتكلم فيها هنا هي الآتي و فكر فيها معايا: - صناع المحتوى المستقلين العادين، بدون فرق كبيره و مجهود و موارد جباره، هيقدروا يصنعوا فيديوهات بجوده اعلى وبطرق جديده - الناس العادية اللي ممكن يكون عندهم ذكاء ابداعي او معرفه مخصصه بس معندهمش الموارد او المهارات او الكاريزما لصناعة المحتوى، دلوقتي هيقدروا يعملوا ده بسهوله وسرعه اكتر من اي وقت مضى - انا مش بقول ان ده هيحصل بكره، بس ده هيبدأ يحصل اجلا ام عاجلا خصوصا مع الاجيال الجديده اللي بتكبر دلوقتي، يوتيوب بدأ من ١٨ سنه بس و بص على المحتوى اتغير ازاي في السنين دي و مكنش حاصل ربع اللي لسا يدوبك بيبدأ يحصل دلوقتي - انا هنا مش بتكلم على فيديوهات يوتيوب بس، او حتى فيديوهات اصلا بس، انا بتكلم على صناعة المحتوى بشكل عام، كتصميم او فيديو او كتابه و مش في مجال الترفيه بس او الالعاب بس، لا في التعليم كمان، في الدعايه و الاعلان مثلا، في البيزنس، في مية الف حاجة... - المحتوى التعليمي دلوقتي مش لازم يبقى ممل و تقليدي، فيه فرصه يكون تفاعلي و جذاب بصريا اكتر من اي وقت مضي وده بالتأكيد على الاقل خالص هيساعد على تبسيط المفاهيم المعقده وزيادة مستوى الوعي والمعرفه (اتمنى) - كل ده و الواحد متكلمش في صناعات لسا بردو تعتبر في مراحلها الاولى و هتخش هي كمان في صناعة المحتوى ده، زي الواقع المعزز و الواقع الافتراضي VR & AR وازاي ادوات الذكاء الاصطناعي هتأثر هنا كمان حتما ولابد بس الموضوع بالتأكيد مش وردي او ايجابي بس... - السنه دي بالفعل كان حصل اضراب في Hollywood من الكتاب والعاملين في المجال بسبب ان الاستديوهات كانت بدأت تعتمد على الذكاء الاصطناعي و تستبدل بعض العماله، كل ده واحنا لسا بنقول يا هادي، مع تطورات الموديلز دي، ايه اللي يمنع واحد في بيته من انه يعمل فيلم او مسلسل لوحده، لو عنده شويه ابداع، او حتى معندوش، كل حاجة متاحه خلاص في شويه ادوات، من اول الكتابه لحد الانتاج الكامل للاصوات والصوره و الفيديو، المقياس هيبقى الجوده... - في صناع محتوى كتير موجودين دلوقتي و بيعتمدوا بس على شخصيتهم او الكاريزما في انتاج المحتوى و محققين نجاح باهر بده لوحده، بس هل الناس دي هتقدر تستمر وتنافس قدام مع كل ده؟ مع جيل جديد معاه اسلحه كتير جدا او ناس من جيلهم قادرين على تطوير مهاراتهم ومواكبة اللي بيحصل و هما لا؟ - مع كل الاتاحه دي هتطلع مشاكل جديدة بالتأكيد و هتزيد المشاكل الاخلاقيه ومشاكل حقوق الملكية ومشاكل المعلومات والاخبار الخاطئه و المضلله - بطبيعة الحال في ناس كتير ممكن متعرفش تواكب التغيرات دي باشكالها المختلفة و يفقدوا وظائفهم او الشيء اللي كان بيميزهم، وخصوصا ان المنتدى الاقتصادي العالمي بيقولك ان بحلول سنة ٢٠٢٥، ٥٠٪ من عمالة العالم هتكون محتاجة اعادة تأهيل والله اعلم الحل والوضع هيكون ايه ساعتها، وعلفكره هما قايلين كده من سنة ٢٠٢١... باختصار... في ايجابيات🌟: - زيادة الكفاءة و إنتاج أسرع وارخص - زيادة الإبداع باستخدام أدوات جديدة وأساليب جديدة وفتح آفاق جديدة - فرصة غير مسبقة لدمج افضل ما في الذكاء الاصطناعي والإبداع البشري في تحديات🚨: - وجود منحنى تعليمي حاد بالنسبة للبعض وصعوبة في التكيف مع الادوات الجديدة - المنافسة هتزيد مع وجود مبدعين اكتير، وبالتالي انتاج محتوى اكتر - مخاوف حول إيجاد التوازن بين استخدام الذكاء الاصطناعي و اللمسة الإنسانية، وعدم فقدها في آثار طويلة المدى🔍: - تحول في سوق العمل مع ظهور وظائف جديدة، وحدوث تتطور في وظائف قديمة - تحول ثقافي من ناحية تطور اساليب الـ storytelling والتواصل البصري - تأثير على النمو الاقتصادي مش قادر احدد شكله بالظبط عشان مش حتتي خالص وفي استراتيجيات للتكيف💡: - خليك على اطلاع بالتطور اللي بيحصل و حاول تكون في المقدمة - لا تتوقف عن التعلم وخليك عارف ان غالبا اتقان مهاره واحده بس مش كفايه - حاول تخليك جزء من مجتمع بتتعلموا و تتطورا مع بعض و كون شبكة علاقات كويسه وقلل من علاقاتك اللي ملهاش لازمه اللي بيحصل دلوقتي مش مجرد تطور لبعض الادوات، حاليا في بوابة لعصر جديد من الإبداع بتتفتح، يا تدخل من البوابة دي، يا تقعد خلف الاسوار. احب اسمع ارائكم في الموضوع و شايفين تأثير الكلام ده على حياتكم الشخصية و المهنية ومجتمعاتنا بشكل عام، هيكون عامل ازاي؟