Komu Printing

Nilikuwa kwenye kituo cha mafuta cha PUMA, jirani na NMB Headquarters, Posta. Akatokea jamaa mmoja akiwa na gari aina ya Spacio. Akaniomba nimsaidie mafuta. Alieleza kuwa mtandao wa Exim Bank ulikuwa unasumbua, hivyo ameshindwa kufanya malipo, na alikuwa anaelekea Mbagala. Alilalamika sana na kuomba msaada. Kila nilipojaribu kumkatalia, aliendelea kusisitiza na kueleza hali yake. Mwisho wa siku, nikajikuta namuwekea mafuta ya Shilingi 20,000/=. Baada tu ya kumuwekea mafuta na kuondoka, mzee mmoja aliyekuwa mlinzi pale kituoni akaniambia: "Yule jamaa ndiyo tabia yake, huwa anafanya hivyo." Nilijisikia vibaya sana. Ukweli ni kwamba siku hizi utapeli umekuwa mwingi. Unakutana na mtu anayekuomba msaada kwa unyenyekevu, lakini baadaye unagundua huenda ulikuwa sehemu ya mchezo wake. Inafika mahali unashindwa kujua nani mwenye shida ya kweli na nani anayetumia huruma za watu kujinufaisha. Cha kusikitisha zaidi, matendo ya watu wachache yanawafanya hata wale wenye shida za kweli washindwe kupata msaada.