الفنان الكبير حمدي غيث كان هو نقيب الممثلين وفي يوم جاله تليفون الساعة واحدة ونص بالليل في بيته بيقولوله إلحق بسرعة في ممثل كبير ومشهور خالف إشارة مرور وكان وزير الداخلية نفسه واقف في الشارع بيشرف على المرور فحصلت خناقة وكلام بين الممثل وبين الوزير فالوزير اتضايق وأمر الظباط ياخدوه ويرموه في الحجز حمدي غيث بيقول أول ما سمعت الخبر مقدرتش استنى قمت نزلت جري رحت على القسم شفت زميلي الفنان وبعدها طلعت على وزارة الداخلية طبعا الوزير مكنش هناك كان روح بيته دخلت الوزارة وقلت لهم لازم أكلم الوزير حالا في بيته قالولي يا فندم ده زمانه نام دلوقتي قولتلهم مش هطلع من هنا غير لما أكلمه وفعلا كلمته في البيت ورد عليا أنا مسكت نفسي وكلمته بكل هدوء واحترام قولتله معقولة يا سيادة الوزير فنان يترمي في الحجز عشان مخالفة مرور راح رادد عليا وقالي يعني لو كان مهندس ولا دكتور كنا هنسيبه اشمعنا الفنان لما يغلط نسيبه ؟ فأنا رديت عليه رد دبلوماسي وقولتله والله لو مهندس أو دكتور والنقيب بتاعه كلمك وبيترجاك عشان تسيبه كنت هتسيبه فالرد عجبه جدا قالي خلاص يا أستاذ حمدي روح طلعه وأنا هكلمهم في التليفون هقولهم إنك جاي تاخده بنفسك عشان يعرفوا إن انت اللي طلعته