Sanjay Raja

تھر کے ہونہار بیٹی نے ایم ڈی کیٹ میں ٹاپ کیا۔۔۔۔Geo News Headline Another news from MDCAT

نعمت اللہ خان، سابق ناظمِ اعلیٰ کراچی، نے 2004-05 کے دوران تھرپارکر کا دورہ کیا تھا۔ مِٹھی کے ہلال پبلک اسکول میں خطاب کرتے ہوئے انہوں نے کہا تھا: ”تھرپارکر ایک زرخیز خطہ ہے، اسے پیچھے رکھا گیا ہے۔ یہاں کے لوگ بھی زرخیز ذہن رکھتے ہیں؛ اگر انہیں مواقع فراہم کیے جائیں تو یہ دنیا کا مقابلہ کر سکتے ہیں۔“ کل جماعتِ اسلامی سے وابستہ ایک شخص کی پوسٹ نظر سے گزری، جس میں اس بات پر حیرت کا اظہار کیا گیا کہ ایک ”پسماندہ علاقے“ تھرپارکر کے پانچ طلبہ MDCAT کے ٹاپ 20 میں شامل ہیں، جبکہ کراچی سے کوئی طالب علم اس فہرست میں جگہ نہیں بنا سکا۔ محترم! آپ کے اپنے رہنما نے دو دہائیاں قبل تھر کے بارے میں یہی بات کہی تھی کہ موقع ملے تو تھر کے نوجوان دنیا کا مقابلہ کر سکتے ہیں۔ تو پھر سوال صرف یہ کیوں ہے کہ کراچی سے کوئی طالب علم ٹاپ 20 میں کیوں نہیں؟ اس کامیابی کو صرف کراچی کے ساتھ مقابلے کے تناظر میں دیکھنے کے بجائے اس وسیع حقیقت کو بھی دیکھنے کی ضرورت ہے کہ تھر کے نوجوان مواقع ملنے پر اپنی صلاحیتوں کا لوہا منوا رہے ہیں۔ آج کراچی ایئرپورٹ کا مشاہدہ کریں۔ روزانہ تھرپارکر کا کوئی نہ کوئی طالب علم اعلیٰ تعلیم اور بہتر مواقع کی تلاش میں بیرونِ ملک روانہ ہوتا نظر آتا ہے۔ وہ صرف کراچی کا نہیں، دنیا کا مقابلہ کرنے جا رہا ہے۔ نعمت اللہ خان کی دو دہائیاں قبل کہی گئی بات آج تھر کے نوجوان اپنی محنت، قابلیت اور کامیابیوں سے ثابت کر رہے ہیں۔ مسئلہ تھر کے نوجوانوں کی صلاحیت کا نہیں، مسئلہ انہیں مواقع فراہم کرنے کا ہے.