عهد البشير , معليش كلام كثير الرغيف اتمكن في البيوت و فجوة الاستهلاك بقت تضغط الدولار جدا بعد الانفصال .. في عهد البشير (1989–2019)، حصل تحول مهم في العلاقة بين القمح والذرة في السودان، الذرة ظلت محصول غذائي رئيسي من حيث الإنتاج والاستهلاك، لكن القمح توسع بصورة أكبر في غذاء المدن، وأصبح الرغيف سلعة استراتيجية مرتبطة بالدعم الحكومي والاستيراد وسعر الصرف , ونحنابحسب تخصصنا بنعاين للقمح دا كمادة (تمويل نقدي و سعر صرف) الحكومة حقت البشير ورثت نمط استهلاك كان بدأ يتغير منذ الستينيات والسبعينيات، بسبب المعونات الغذائية الأمريكية ودعم الخبز، ثم أزمة الجفاف ونقص الذرة في الثمانينيات، التي رفعت أسعار الكسرة مقارنة بالرغيف المدعوم. وفي بداية التسعينيات، بدلاً من الاعتماد الكامل على استيراد القمح، اتجهت حكومة البشير إلى زيادة إنتاجه محلياً، ضمن برنامج (نأكل مما نزرع)، وارتبطت التجربة بالبروفيسور أحمد علي قنيف، وزير الزراعة وقتها. في موسم 1991–1992، وصلت تجربة التوسع في القمح المرتبطة بأحمد علي قنيف إلى إنتاج كبير، لكن المحافظة على المستوى دا كانت صعبة بسبب تكلفة الري والتمويل ومنافسة القمح لمحاصيل تانية زي القطن والفول. أما الذرة والدخن، فظلوا جزءاً أساسياً من غذاء السودانيين، خصوصاً في الأرياف. وبحسب بيانات لموسم 1995–1996، كانت الذرة تمثل نحو 61% من الاستهلاك الغذائي للحبوب، والدخن 13%، والقمح 25%. وفي موسم 1997–1998، ظلت الذرة وحدها تمثل نحو 65% من استهلاك الحبوب. لكن القمح كان بيكسب مساحة أكبر في المدن لثلاثة أسباب مترابطة، الرغيف المدعوم كان سعره منخفض نسبياً مقارنة بالكسرة في فترات كثيرة، والهجرة من الريف للمدن غيرت عادات الأكل، والخبز الجاهز بقى أسهل للأسر والعمال والموظفين من إعداد الكسرة يومياً. ودراسة اقتصادية منشورة سنة 1992 وثقت إنو دعم الخبز ساهم في زيادة استهلاك القمح على حساب الذرة والدخن. وخلال الألفينات، إيرادات النفط ساعدت الحكومة في تمويل واردات القمح، لكن بعد انفصال الجنوب سنة 2011 وتراجع الإيرادات النفطية، بقى توفير الدولار أصعب , اتخيل كل سنة مقترض تكون شايل هم كيف ح تمول 1.3 مليار دولار من السلعة دي بس خليك من الباقي في وضع النقد الاجنبي شحيح (أعتقد عايشين تفاصيل الحاجات دي الايام دي بشكل أكبر) . - ما بعد الانفصال بعد انفصال جنوب السودان في 2011، حصل تحول مهم في خريطة الاستهلاك الغذائي، القمح كان بقى جزءاً ثابتاً من المائدة السودانية، خصوصاً في المدن، بينما الذرة والدخن استمروا في غذاء قطاعات واسعة من السكان، لكن حضور الكسرة في الحياة اليومية الحضرية تراجع مقارنة بالرغيف. التحول دا ما بدأ مع الانفصال، لكن خلال الفترة دي ظهرت تكلفته الاقتصادية بصورة أكبر، لأنو السودان فقد جزءاً كبيراً من عائدات النفط والنقد الأجنبي، وفي نفس الوقت كان محتاج يستورد كميات متزايدة من القمح لتلبية الطلب المحلي. في البيوت الرغيف بقى مرتبط بالفطور والعشاء، وبقى متوفر في المخابز والأسواق بصورة أوسع من الأجيال السابقة، بينما الكسرة والعصيدة ظلوا حاضرين، لكن بدرجات مختلفة حسب المنطقة ومستوى الدخل والعادات الغذائية. والنقطة المهمة إنو انتشار الرغيف ما كان مجرد تغيير في الذوق، دا كان نتيجة تراكم طويل لسياسات دعم الدقيق والخبز، والهجرة من الريف إلى المدن، وتغير طبيعة العمل، وسهولة شراء الرغيف جاهزاً مقارنة بالوقت المطلوب لإعداد الكسرة. -كيف تمكن القمح من بيوت السودانيين بعد الانفصال؟ الأرقام بتكشف مفارقة مهمة، ففي سنة 2015 كانت الذرة تحقق فائض إنتاج في السودان، والدخن يحقق اكتفاءً ذاتياً، بينما القمح كان بيعاني من عجز إنتاجي مستمر، بحسب شبكة الإنذار المبكر بالمجاعة . وفي موسم 2018، السودان أنتج حوالي 4.9 مليون طن ذرة و2.6 مليون طن دخن، ، لكن الناس عايزة رغيف و استمر احتياجه لاستيراد القمح. والأوضح من دا إنو واردات القمح وصلت لحوالي 1.96 مليون طن سنة 2015، وارتفعت إلى 2.35 مليون طن سنة 2018، و في 2025 البلد فاضية وماف استهلاك لكن السوجان استورد 1.6 مليون طن (دا بوريك كيف خلاص الرغيف دا اتمكن و دا قمح نحنا ما اتكلمنا عن الدقيق دا شي ثاني ) -المهم .. صعب شديد السودان يرجع يتخلى عن القمح، لأنو المسألة ما بقت مجرد تفضيل غذائي، دا بقي تحول هيكلي في نمط الاستهلاك حصل على مدى أكثر من نصف قرن. الرغيف بقى جزء من الحياة اليومية لملايين السودانيين، خصوصاً في المدن، واتغيرت معاه عادات الأسر وطريقة إعداد الطعام، واتوسعت حوله منظومة كاملة من المطاحن والمخابز والاستيراد والتوزيع. عشان كدا حتى لو السودان حقق فوائض كبيرة من الذرة والدخن، دا ما بالضرورة حيقلل الطلب على القمح بنفس النسبة، لأنو توفر البديل ما معناه إنو المستهلك حيتحول ليهو تلقائياً. والمهم الناس تعرف انو هي بتمشي الفرن بتشري تكلفة مستوردة (وقود - خميرة - دقيق- قمح- خام حق اكياس-قطع غيار .الخ ) ودي ملاحظة اتمني تاخدوها شنو الحاجة الحوليكم بالعملة الصعبة مباشرة او غير مباشرة و كيف دا سبب ضغط علي سعر الصرف .