مساك الله بالخير يا صديقي العسل إذا أنت مصمم وتبي تواكب الذكاء الاصطناعي تحتاج تراجع وش الشيء اللي العميل يدفع لك عشانه لأنك لو تختصر شغلك في ترتيب العناصر واختيار خط وتغيير الألوان وتسليم المقاسات فجزء كبير من هالشغل صار أسهل على أي شخص يسويه بالأدوات الموجودة وقبل نزعل من تشابه التصاميم اللي تطلعها هالأدوات خلنا نكون صريحين التشابه كان موجود قبلها نفس اتجاه الصور ونفس توزيع الكلام ونفس الموك أب ونفس طريقة عرض الهوية فقط تغير اسم البراند وتحس إنك شفت التصميم قبل ومع الوقت صار جزء من الشغل إنك تلقى مرجع قريب وتعيد ترتيبه بما يناسب الطلب لأن العميل مستعجل والميزانية محدودة وهذا اللي يمشي وهذا اللي تعود الناس يشوفونه طبيعي إذا استمرينا نكرر نفس الاختيارات تصير النتيجة أسهل في التوليد والعميل اللي كان يحتاج مصمم عشان يطلع له شغل مقبول صار يقدر يطلع نتيجة قريبة بنفسه أو بمساعدة أقل خلنا نقربها بمثال لو كان التصميم عند العميل ثلاثة من عشرة وأنت ترفعه لستة كان يشوف فرق يستاهل يدفع عليه بس يوم يصير يقدر يبدأ من الستة تحتاج تعرف كيف توصل بالشغل لسبعة أو ثمانية أو تسعة تعلم الأدوات بيساعدك تشتغل أسرع بس باقي تحتاج تعرف تختار وتحكم على اللي طلع منها وتعرف وش ناقصه وليش وأيضا نحتاج نراجع الوقت اللي نصرفه على تجهيز الملفات والأنظمة والقواعد وجود مكتبة عناصر ودليل هوية وقواعد ثابتة يساعدك تحافظ على الشغل بس إذا صار أغلب وقتك في تجهيز هالأشياء وإدارتها وأقل وقت في الفكرة نفسها فأنت تصرف جهدك على أجزاء صار ممكن تختصرها حتى الاجتماعات والورش ما يكفي إنها تصير عشان نقول إننا اشتغلنا صح إذا جمعت معلومات وسويت عرض طويل وبالنهاية التصميم ما تأثر بشيء منها فالعميل ما استفاد من كل هالإجراءات أشوف قدام المصمم اتجاهين يقدر يطور شغله فيهم الأول إنه يصمم أشياء الناس تتذكرها وتحس إنها تناسب البراند اللي قدامها وهذا يظهر في الهوية والإعلانات والتغليف والمحتوى وحتى المطبوعات خلنا نقول عندك براند يبيع هدايا تقدر تطلع له بوكس مرتب وتحط الشعار بالنص وتختار لون حلو وبس وتقدر تفكر كيف الشخص بيفتحه ووش أول شيء بيشوفه وكيف ترتب المنتج والكرت داخله وكيف يطلع كل هذا بالتصوير هنا تفاصيل التصميم مرتبطة بالموقف اللي بين الشخص والمنتج والفكرة ممكن تظهر في طريقة فتح البوكس أو رسم خاص بالبراند يتكرر بشكل يعرفه الناس مو لازم تجمع كل هالأشياء ولا تحط حركة غريبة في كل تصميم ممكن تفصيلة واحدة مناسبة تسوي اللي تحتاجه وحتى في إعلان ثابت تقدر تفكر كيف توري الشخص قيمة المنتج من الصورة نفسها بدل ما تكتب له كلام كثير وتحط المنتج بجانبه وش يبي يعرف ووش تقدر توريه وكيف يرتبط الكلام بالصورة هذا يحتاج منك تفهم المنتج والشخص اللي بيشوفه وتختار على هالأساس إذا الاختلاف ما يساعد الفكرة ولا يناسب البراند فما استفدنا من كونه مختلف والاتجاه الثاني في الشغل اللي فيه إنتاج متكرر شركة عندها محتوى يومي وحملات وعروض وملفات كثيرة وتحتاج تطلع كلها بشكل متناسق هنا تقدر تخلي الذكاء الاصطناعي يساعدك في التنفيذ المعتاد بشرط يكون عنده مرجع فعلي يمشي عليه وش تقدم الشركة ولمين ووش اللي يميزها كيف تتكلم ووش الكلمات اللي تستخدمها واللي تتجنبها وش ألوانها وخطوطها وكيف تستخدم الصور والشعار وكيف تختلف طريقة الكلام حسب المكان اللي بتنشر فيه تحط هالأشياء في مرجع واحد فيه أمثلة صحيحة وأمثلة ما تناسب البراند وتستخدمه في توجيه الشغل ومراجعته بدل ما تبدأ من الصفر وتشرح نفس السالفة كل مرة بس حدد من البداية وش اللي تقدر تولده ووش اللي يحتاج تشتغل عليه أنت مثلا عندك حملة ممكن الأدوات تساعدك في تغيير المقاسات وتوزيع النسخ وترتيب محتوى متكرر بعد ما تحدد الاتجاه بينما فكرة الحملة والصورة الرئيسية والأشياء اللي بتخليها معروفة تحتاج تعطيها وقتها وتشتغل عليها بقصد وإذا أنت تستخدم الأداة في تجهيز العمل كله تقدر تطلب منها تترك الجزء اللي ما قررت فكرته إلى الآن بدل ما تعبيه بأول اقتراح وتكمل عليه وجود مساحة تنتظر قرارك أحيانا أفضل من تصميم مكتمل شكله مقبول بس ما فيه شيء يخص هالبراند بكذا يتغير توزيع وقتك تختصر الوقت اللي كنت تصرفه في تكرار التنفيذ وتعطي الفكرة والتفاصيل اللي تفرق وقت أكثر تجرب أكثر من شئ وتشوف التصميم على الشيء اللي بيستخدم عليه تقارن النسخ وتراجعها مع الناس اللي بتشوفها وتعدل حسب اللي فهموه منها وتراجع الكلام والمعلومات والتزامها بالهوية لأن وجود مرجع ما يعني إن كل اللي طلع صار صحيح تلقائيا وممكن يقل عدد التصاميم اللي تحتاج تنفذها بيدك من البداية للنهاية وقتها تحتاج تطور طريقتك في فهم الطلب وبناء الفكرة والإخراج والمراجعة وتتعلم تنفذ بالأدوات اللي تختصر عليك إذا العميل يقدر يطلع تصميم مقبول بنفسه وره وش بيتغير يوم يشتغل معك في الفكرة اللي ما كان بيوصل لها أو في فهمك لمنتجه أو في تفاصيل التنفيذ اللي تخلي الشغل يناسبه لا تخلي كل اللي يختلف معه هو من فتح الأداة

يا صديقي العسل ليش تخاف من الـ Ai؟ الـ Ai هو مجرد تطور للأداة مو تطور لك كمصمم أو كمسوق أو كموشن تطور مع السوق يا صديقي العسل وواكب السوق