5-6 жилийн дараа гар утас, утасны дугаар, апп-ууд бүгд байхгүй болно. Үүний оронд AI суурьтай төхөөрөмж гарч ирнэ гэж Elon Musk ярив. Цахилгаан машин нийтийн хэрэглээ болно. Сансарын хөлгийг олон дахин ашиглана, нисдэг машин гарна гэж ярихад итгэдэггүй байв. Энэ бүхэн амьдралд нэвтэрсэн. Роботууд гудамжинд эргүүл хийж, дайнд явах нь цаг хугацааны асуудал болсон. Цаашид маш олон мэргэжил устаж үгүй болно. Баримтаа оруулахад л тайлан гардаг боллоо. Нягтлан бодогчийн мэргэжил хэрэгтэй юу? Зарим оношийг AI илүү сайн гаргаж байна. Эмч нарыг орлох уу? Нууц тэрбумтан, цаг хугацаагаар аялагч зэрэг бидний үздэг AI кино улам сайжирч байгаа. Жүжигчдээс илүү жүжиглэдэг AI одууд төрж байна. Зарим дууны ковер AI нь илүү ч байх шиг. Энэ янзаараа хуульчид ч AI-д шахагдаж маш цөөн нь үлдэх шинжтэй болоод ирлээ. Бүх хуулийг цээжээр мэддэг, шүүхийн шийдвэр, тогтоол захирамжийг судалсан өндөр чадвартай AI-тай өрсөлдөх бараг л боломжгүй. Гэтэл жил бүр хэдэн мянгаар нь бэлдээд байдаг. Боловсролын салбар тэр дундаа мэргэжил сонголт дээр нухацтай ярилцах цаг нь болжээ.