Loay Alkhteeb

محتاجين بقى مذيعين قنوات مطاريد الإخوان يطلعوا يكلمونا عن سوء الإدارة والفشل اللي خلوا قنواتهم مهددة بالإغلاق.. ولا الكلمتين دول بيتقالوا للدولة بس وبالباطل كمان؟

طيب صباح الفل يا جماعة.. ايه بقى اللي بيحصل في طرح بنك القاهرة ده؟ ازاي يعني ٣٦ مليار جنيه، وتغطية ٢٧ مرة لشريحة الطرح العام "اللي هو الطلب أد المعروض ٢٧ مرة"، وأكتر من نص مليار دولار محولين من الخارج.. هو مش المفروض إن احنا دلوقتي في مرحلة الانهيار الاقتصادي؟ أنا راجل مثقف بسمع كلام الأساتذة المطاريد وبثق في تحليلاتهم وتجلياتهم السياسية والاقتصادية، وهما قالوا انهيار.. فإيه ده بقى؟

وزير المالية بيقول إن حقبة التمويل منخفض التكلفة انتهت، وارتفاع أسعار الفائدة العالمية لفترة أطول أصبح السيناريو الأكثر ترجيحا.. الكلام ده يبدو متخصص، بس هو الحقيقة متصل بحياتنا اليومية وبتقييم تجربة الـ١٢ سنة اللي فاتوا كلهم.. ليه؟ لإن أغلب التمويلات "الديون" اللي مصر حصلت عليها لتمويل المشروعات القومية طول السنين اللي فاتت، كانت مستفيدة من فكرة التمويل منخفض التكلفة دي.. يعني كاستنتاج منطقي، كل مشروع اتعمل من أول الطريق للمرافق للمواني لوسائل النقل للمدن نفسها، كان ممكن يتعمل بأضعاف التكلفة لو كنا سمعنا كلام اللي قالوا مش أولوية ومش وقته واستنوا لما الظروف تتحسن.. التمويل تكلفته زادت نتيجة زيادة الفايدة، وسعر الحاجة نفسها زاد.. يعني اللي كان بيسابق الزمن علشان ينجز حتى لو هنتزنق، كان "شايف" وعارف يرتب الأولويات، أكتر من ناس كتير بتقول لنا إنها دارسة برا وجوا ومثقفة ومطلعة!

عايز أفكرك إن عدى أكتر من أسبوعين على كلام فخامة الرئيس عن ٢٠٣٠، ولحد اللحظة دي ماحدش قدم مشروع جاد للمصريين علشان يمشوا وراه وينتخبوه بعد ٢٠٣٠.. كان بيتقال لك الناس موجودة والمشاريع مرطرطة بس مفيش فرصة، ولما الرئيس طرح فكرة الأكاديمية العسكرية اعترضوا عليها بمنطق: ليه تمنع بقية الناس من الترشح؟ اللطيف إن ده مسار مش هيلغي بقية المسارات، فمفيش منع.. بس بعد أسبوعين اتضح كمان إن مفيش ناس.. ومفيش برامج.. ومفيش أي حاجة غير الضحك اللي بيقدمه أستاذ طنطاوي اللي بنى مشروعه السياسي على عدم حبه للسيد الرئيس! وبيستغربوا اوي ليه الناس ماشية ورا فخامة الرئيس السيسي وبس، ومش مديين فرصة للهزار السياسي التاني اللي هما شايفينه، علشان يغامر بمستقبلهم ومستقبل عيالهم.. غريب بصراحة الشعب المصري ده! المهم، عرفتوا الحقيقة واتأكدتوا؟

قنوات المطاريد اللي بتحلف بقالها ١٢ سنة إنها مش إخوان خالص، عندها كارثة تمويلية وبتقلل برامج وبتسرّح عمالة، وكل ده بالصدفة البحتة بعد ضرب مصادر التمويل بالقرار الأمريكي ضد جماعة الإخوان وتصنيفها كمنظمة إرهابية.. مش إخوان خالص.. إطلاقا! لأ بجد وعماد مأكدلي.. اطمن

وتلاقي الإخوانجي يقول لك بنحب مصر وبنعارض بس علشان مشكلتنا مع النظام!

رفع الفائدة معناه إن الوضع السياسي والاقتصادي إقليميا ودوليا مش مبشر، وده واضح للأسف، وطبعا الهدف من رفع الفايدة هو الحفاظ على مسار نزولي للتضخم رغم الوضع اللي مش مبشر.. طبعا كل الأحداث بتقول إننا هنواجه آثار اقتصادية نتيجة اللي بيحصل.. فربنا يستر

جزء كبير من الفرق -الرهيب- بين الرئيس السيسي وكتير من اللي بيقولوا على نفسهم "معارضة"، بيبان بردو في إنهم من ساعة كلام الرئيس عن انتهاء مدته في ٢٠٣٠، بيتكلموا عن أهمية تداول السلطة، وضرورة تداول السلطة، وحتمية تداول السلطة، وفوائد تداول السلطة، وفضائل تداول السلطة.. الوحيد اللي قال للمجتمع صيغة "آمنة" للتداول، هو الرئيس السيسي! ممكن حد يشوف إن ده مش مهم أصلا، وعادي زي أي دولة نعمل انتخابات واللي يكسب يكسب، بس الحقيقة لو انت بتخاطب مجتمع مر باللي حصل في ٢٠١١ و٢٠١٣، ومش فاهم انه مهتم بآلية تداول السلطة بشكل آمن، أكتر من فكرة تداول السلطة نفسها، يبقى انت أصلا تصلح للعمل العام في المجتمع ده.. حضرتك للأسف مش فاهم الناس اللي بتكلمهم أصلا، أو مكتفي بدواير محدودة حواليك..

قريت كذا بوست بيتريق على اللي بيتكلم عن أهمية تحرير سعر الصرف، وإن المرونة أهم -خصوصا على المدى الطويل- من الرقم نفسه.. التريقة مكتوبة حلو، ذكية.. خصوصا البوست بتاع الجزار.. لطيف فعلا.. وبعد ما ضحكنا وهزرنا: هل ده بقى هينفي حقيقة اقتصادية زي إن مرونة سعر الصرف من أهم مصدات الحماية اللي خلت الاقتصاد المصري يتجنب كوارث كانت متوقعة في بداية السنة بالتزامن مع الحرب؟ هل الضحك ممكن ينفي حقيقة اقتصادية بتقول إننا جربنا نثبت الرقم فلبسنا في تضخم مفرط واضطرينا نعوم؟ هل الضحك هينفي آراء الخبراء والمؤسسات الدولية اللي بيقولوا إن الاقتصاد المصري قدم أداء مفاجئ بسبب مرونة سعر الصرف؟ الأسئلة دي مهمة علشان نحدد احنا عايزين وعي حقيقي ونفهم بجد، ولا اللي يقول كلمتين حلوين وبيضحكوا يكسب وخلاص؟ والأسئلة دي مابتنفيش المعاناة، احنا مش عايشين في سويسرا، بس معاناة مع كارثة اقتصادية، ولا معاناة مع أزمة تخلص وتعدي ونتجاوزها؟

مجتمع شديد الانقسام والتشظي -والانتخابات تشهد- يتغذى فقط على الهدايا المجانية التي يتلقاها!

المنطقة الاقتصادية لقناة السويس حصلت على المركز الأول في إفريقيا والسابع عالميًا ضمن جوائز fDi Intelligence لأفضل المناطق الحرة عالميا لسنة ٢٠٢٦.. المجلة دي إحدى إصدارات فايننشال تايمز.. كام منطقة بقى شاركت؟ ٧٩ منطقة.. معايير التقييم بتشمل البنية التحتية، والاستدامة، والحوافز الاستثمارية، والحوكمة، والاستثمارات الجديدة.. عاشت الإيد اللي بتبني وتعمّر.. عاشت الرؤية اللي خلت البلد تنافس في العظمة دي بعد ما كانت متصدرة كل المؤشرات السلبية لسنين..

طيب النهاردة كان يوم حلو في البورصة بخلاف اللي حصل من يومين، هل كان في كلام بنفس الكثافة عن التحسن زي الكلام عن التراجع؟ الحقيقة لأ.. واليوم عدى عادي ولا كإن في حاجة! فهنا محتاجين نسأل الناس اللي كانوا بيقولوا "في حاجة غامضة"، "الكبار عرفوا مصيبة وبيخلعوا"، "المنتدى هو السبب"، "المونوريل هو السبب - ده لازم طبعا".. سؤال لحضراتكم جميعا: مش هنبطل بقى؟

في لقاء حصل في القاهرة بين السيد الوزير حسن رشاد رئيس المخابرات العامة، والفريق أول صدام حفتر نائب القائد العام للجيش الليبي.. اللقاء كان فيه تأكيد على ضرورة وسرعة دعم العملية السياسية في ليبيا، برؤية واضحة لدعم استقرار الوضع السياسي وتوحيد المؤسسات، اللي هي سياسة مصر طول الوقت.. حط اللقاء ده بمخرجاته في نفس السياق مع بيان الحكومة الليبية برئاسة أسامة حماد امبارح، وبردو بيان البرلمان الليبي، وتأكيدهم على مراعاة الشواغل المصرية فيما يتعلق بالحدود البحرية.. وهتشوف الصورة الكاملة.. صورة الدولة المصرية القوية القادرة، لكنها قوة رشيدة تبني ولا تهدم، تصلح ولا تفسد، قوة قادرة على معالجة الشواغل والمشاكل بالحوار والوصول لحلول سياسية من خلال مد جسور التواصل، مش إقامة جدران الصراع في منطقة مليانة صراعات.. علشان كده هي مصر، يتعاون معاها كل اللي عايز خير وسلام، ويتمنالها الشر والخراب ويشتغل عليه كمان، كل اللي هي واقفة في وش مخططاته الإجرامية..

موافقة مجلس النواب على دعم المملكة العربية السعودية تمت بأغلبية التلتين، وبعد مناقشة استمرت أسبوع و٣ جلسات، وبناء على ما تم التوافق عليه في مجلس الدفاع الوطني يوم ١٨ أكتوبر، بكل قادة المؤسسات اللي كانوا حاضرين مع فخامة الرئيس السيسي.. يعني قرار دولة مؤسسي مدروس مش انفعالي أو فردي.. طب احنا مالنا؟ سؤال غريب خصوصا في ضوء اللي بيحصل لإيرادات قناة السويس من ٣ سنين، ميليشيا الحوثي بتهدد مضيق باب المندب وده بيضر بقناة السويس بشكل مباشر، وبيأثر سلبا على أمن منطقة القرن الإفريقي، اللي هي من أهم دواير الأمن القومي المصري.. فالقرار هو دفاع أولا عن الأمن القومي المصري.. وثانيا، عن أمن المملكة العربية السعودية، اللي هو طبعا جزء لا يتجزأ من الأمن القومي المصري.. دفاع عن السعودية ضد ميليشيا الحوثي الإرهابية، وليس -بأي حال- هجوما على اليمن، لإن اليمن متضرر من الحوثيين أصلا.. مصر كانت ولا تزال بتتجنب أي صراعات عسكرية، وكانت ولا تزال بتدي أولوية أولى للحلول السياسية والدبلوماسية.. والمهمة الدفاعية في السعودية لا تعني التخلي عن المبدأ الأساسي ده..

دي أول مرة من ٢٠١٩ تقريبا يبقى في إجماع من الخبراء والمؤسسات الاقتصادية الدولية على إن الاقتصاد المصري ماشي في مسار كويس، وده رغم الدولار أبو ٥٦ جنيه.. لأ أنا عايز أقول لك إن ده بسبب الدولار أبو ٥٦ جنيه أصلا! يمكن المجتمع المصري لسه مخضوض شوية ومش متعود على المفارقة دي، بس الحقيقة إننا جربنا قبل كده نحافظ على سعر الصرف برقم شكله حلو حتى لو مش واقعي ولبسنا في الحيط، فلازم نتأكد إن مش ده الطريق الصح.. الإشادات اللي بتيجي للإدارة الاقتصادية المصرية ممكن تبقى مش متناسبة مع الضغوط اللي بتحصل في الحياة اليومية وبنعانيها كلنا، لكن الإدارة الاقتصادية بالشكل الحالي بتجنبنا ضغوط أكبر وكوارث مانقدرش نتحملها، لإن الدولار أبو ٥٦ مش معاه بضائع مكدسة في المواني ولا أدوية مختفية ولا مصانع مش عارفة تشتغل علشان المواد الخام مش بتيجي من برا.. التثبيت بيلبسنا في تضخم مفرط، وبيعمل مشاكل داخلية مضاعفة فوق المشاكل الخارجية، لكن الإدارة بالطريقة الحالية تخليك مرن في مواجهة الظروف الخارجية، ووضعك يتحسن بمجرد ما الأمور تتحسن برا، وده المسار الآمن.. والحمد لله على فضله وكرمه..

ليه لسه حد ممكن يخضع لابتزاز من نوعية "انت مش محايد"، أو انت ليه مش بتتكلم عن السلبيات زي الإيجابيات؟ ليه فعلا؟ يا عزيزي اللي بيقول لك الكلام ده ماشي يعمل لايكات لكل حاجة بتتقال فيها هجوم أو حتى سخرية من كلام الرئيس، بما في ذلك الكلام اللي بيقوله عن ربنا وعلاقته بربنا، اللي هو مش محل جدل سياسي أصلا.. اللي بيقول لك الكلام ده عمره ما شير حاجة واحدة إيجابية، ولو هو بيقدم محتوى من خلال أي نافذة هتلاقيه كله تقطيع في البلد وقيادتها، ووصف للمؤيدين بإنهم معر*ين، مع سيل من الشتايم القذرة ضد أي حد يقول رأي مايعجبوش! انت بقى بتخضع لابتزازه ليه ومصمم تثبت له انك لأ على فكرة محايد وبتذكر الإيجابيات والسلبيات؟ ما انشالله عنه ما اقتنع! قول يا بيه اللي انت شايفه صح، وانحاز براحتك وأيد زي ما تحب وعلى طول الخط وبعد الخط كمان، واللي مش عاجبه يقول هو اللي على مزاجه بردو، أو لو اتزنق اوي يعني ومصمم يركز معاك، فممكن يخبط راسه في الحيط عادي جدا..

الحكومة الليبية برئاسة أسامة حماد أصدرت بيان بخصوص تصديق البرلمان على مذكرة التفاهم الليبية التركية، وده إجراء كانت الخارجية المصرية اعترضت عليه.. بيان الحكومة الليبية اتكلم بوضوح عن دعم المسار التفاوضي بين اللجان الفنية الليبية والمصرية، "لمواصلة المفاوضات ودفعها نحو تفاهمات مشتركة وحلول توافقية متوازنة".. الموقف المصري متسق مع مبادئ القانون الدولي للبحار، واتفاقية الأمم المتحدة لقانون البحار.. والدولة المصرية من خلال جهاز المخابرات العامة ووزارة الخارجية، بتدير الملف بكفاءة شديدة وهدوء واقتدار، وحرص تام على المصالح المصرية والليبية.. مصر دولة قوية قادرة، شديدة الحكمة..

"الجنيه المصري ينخفض. وهذا ليس علامة ضعف، بل علامة على اتباع سياسة سليمة. فأسعار النفط تقفز مع تصاعد المخاوف من اندلاع حرب فعلية أخرى، وبالتالي فإن انخفاض الجنيه يخفف أثر كل ذلك. وتستحق مصر إشادة كبيرة لسماحها للجنيه بالتعويم..." روبن بروكس - خبير اقتصادي متخصص في أسعار الصرف وحركة الأموال بين الدول، ويعمل حاليا باحثا أول في الدراسات الاقتصادية بمؤسسة بروكينجز الأمريكية..

أنا مهما اتكلمت عن حلاوة وجمال وعظمة وعبقرية الفيلم ده مش هعرف أوفيه حقه! ده فيلم اسمه The Last Dance in Kippur – آخر رقصة في كيبور.. بيجسد تفاصيل حرب أكتوبر، صحيح هو بالـAI، بس وانت بتتفرج مستحيل تحس لحظة انه AI، ويمكن تشك إن دي مشاهد حقيقية متصورة بس تم تحسين جودتها! الفيلم بيسرد التفاصيل التاريخية لآخر يومين قبل العبور، وللعبور، ولمرحلة ما بعد العبور، وأكتر حاجة بسطتني انه أنصف البطل أشرف مروان، وبيوضح أهمية دوره العبقري في كسب الوقت والتضليل.. الفيلم رائع بكل المقاييس، وكريم عبد الوهاب اللي أبدع في الموسيقى بيقدم ليفل عظيم من الإبداع في إنتاج أفلام بالجودة دي.. لازم تشوفوه