محمود إسماعيل | Space Engineer

غير انه احصائيا ان الكون ممكن يبقى فيه كواكب تصلح للحياة .. لكن قبل ما اتكلم عن الفرضية دي .. فيه حاجه اسمها فرضية الأرض النادرة أو Rare Earth Hypothesis ودي صاغها عالم حفريات اسمه بيتر وارد وعالم فلك اسمه دونالد براونلي في سنة 2000 وبتقول ان الحياة البسيطة زي البكتيريا والميكروبات ممكن تكون منتشرة في الكون لكن وجود حياة معقدة وكائنات عاقلة هو حدث نادر جدا وهما شبهوه بانه زي الفوز في يانصيب كوني مستحيل .. لانه بيتطلب اجتماع عشرات الشروط الفلكية والجيولوجية والبيولوجية في وقت واحد ودي اهمها : - الناس بتسمع عن مسافة الارض من الشمس بس الاخطر هو مكان المجموعة الشمسية نفسها جوه مجرة درب التبانة ! لو كنا قريبين من مركز المجرة الكثافة العالية للنجوم وانفجارات السوبرنوفا واشعة جاما والاشعاع الكوني القاتل من الثقب الاسود المركزي كانوا هيعقموا الكوكب تماما ويمسحوا اي حياة ولو كنا على اطراف المجرة البعيدة مكانش هيبقى فيه عناصر ثقيلة كفاية زي الحديد والسيليكون والكربون لتكوين كواكب صخرية اصلا احنا عايشين في شريط دائري هادي جدا بين اذرع المجرة الحلزونية المزدحمة -الارض بتدور حوالين الشمس في شريط كوني ضيق جدا وحساس لدرجة ينفع نقول مرعبة والعلماء بيسموه نطاق المعتدل الذهبي Goldilocks Zone على مسافة متوسطة حوالي 150 مليون كم .. لو قربنا شوية ناحية الشمس الكوكب هيدخل في كابوس فيزيائي اسمه الاحتباس الحراري الجامح وحرارة الشمس الزيادة هتبخر جزء كبير من المحيطات ولان بخار المية نفسه غاز بيحبس الحرارة بقوة فده هيرفع سخونة الجو اكتر فتتبخر المحيطات بالكامل وتتفكك جزيئات المياة بالاشعة فوق البنفسجية ويهرب الهيدروجين للفضاء ويتحول الكوكب لفرن جهنمي قاحل حرارته فوق 460 درجة مئوية وده بالظبط المصير اللي حصل لكوكب الزهرة اللي اقرب مننا للشمس بخطوة فلكية بسيطة طيب لو بعدنا شوية عن الشمس ؟ هندخل في الكابوس العكسي وهو التجمد الجامح ونقص الاشعاع الشمسي هيكون مساحات جليد كبيرة ولان الجليد لونه ابيض بيعكس ضوء الشمس للفضاء بدل ما يمتصه ظاهرة ارتفاع الالبيدو Albedo الكوكب هيبرد اكتر ويتكون جليد اكتر في دائرة مغلقة، لحد ما تتجمد المحيطات للابد ويتحول الكوكب لصحراء جليدية ميتة زي كوكب المريخ و "الصدفة" خلصت لحد هنا ؟ لا .. الاعجب ان وجودنا في الشريط ده لوحده مش كفاية ف لو كان مدار الارض بيضاوي ممطوط زي اغلب الكواكب المكتشفة بره مجموعتنا كانت الارض هتخرج بره الشريط ده كل كام شهر فتقرب في الصيف تغلي وتبعد في الشتا تتجمد لكن مدار الارض شبه دائري بدقة هندسية مينفعش اقول عليها غير انها دقة مذهلة بتخليها ماشية جوه الشريط الضيق ده طول السنة من غير ما تخرج عن حوافه القاتلة! - حوالي 75% لـ 80% من نجوم الكون هي اقزام حمراء ودي نجوم باردة وصغيرة .. فعشان كوكب يدفا جنبها لازم يقرب منها جدا ولما بيقرب بيحصله Tidal Locking يعني وش واحد للكوكب بيفضل باصص للنجم يتحرق للابد والوش التاني ضهر في الضلمة بيتجمد للابد غير ان الاقزام الحمراء بتطلق انفجارات اشعة سينية وفوق بنفسجية بتمسح الغلاف الجوي اصلا ! اما النجوم العملاقة فبتحرق وقودها وتنفجر في ملايين السنين قبل ما الحياة تلحق تتطور .. الشمس بتاعتنا بتنتمي لفئة نادرة وهادية ومستقرة G2V بتعيش 10 مليارات سنة بهدوء - لما العلماء رصدوا آلاف الكواكب خارج مجموعتنا الشمسية اكتشفوا كارثة بتحصل في اغلب الانظمة النجمية هي ان الكواكب الغازية العملاقة بتتكون بعيد وبعدين تهاجر وتندفع ناحية النجم بتاعها وفي طريقها بتدمر او تطرد اي كواكب صخرية صغيرة زي الارض بره النظام في مجموعتنا الشمسية وجود كوكب زحل جنب المشتري عمل توازن جاذبي ودي ميكانيكا مدارية عجيبة جدا ..جدا يعني لأنه منعه يهاجر لجوه ففضل واقف بعيد زي الحارس بيمنع النيازك عننا بدل ما يبلعنا - قمر الارض مش قمر عادي ده عملاق بشكل غير طبيعي بالنسبة لحجم الأرض لان الكواكب الصخرية التانية يا مفيهاش اقمار زي الزهرة يا اقمارها صخور صغيرة زي المريخ .. القمر اتكون نتيجة اصطدام كوكب اولي بحجم المريخ اسمه ثيا بالارض بزاوية مائلة محددة جدا الاصطدام ده عمل 3 معجزات اتجمعت سوا كنس جزء كبير من الغلاف الجوي الكثيف للارض ولولاه كنا بقينا فرن مضغوط زي كوكب الزهرة زود كتلة الحديد في باطن الارض وصنع قمر ضخم بيثبت ميل محور الارض 23.5 درجة بيعمل ظاهرة "المد والجزر" في المحيطات اللي العلماء بيعتبروا بركها الساحلية هي الحضانة اللي نقلت الحياة من المياه لليابسة - الارض هي الكوكب الصخري الوحيد المعروف اللي قشرته مقسمة لصفائح تكتونية بتتحرك وتنزلق فوق الوشاح و الحركة دي مش بس بتعمل جبال وقارات .. دي بتشغل حاجة اسمها دورة الكربون والسيليكات ودي شغالة زي الترموستات الاوتوماتيكي بيظبط حرارة الكوكب من 4 مليار سنة ولو ثاني اكسيد الكربون زاد والارض سخنت الامطار بتزيد وتغسله في الصخور اللي بتنزل باطن الارض ولو الارض اتجمدت البراكين بتطلع غازات دفيئة تسيح التلج .. فمن غير الصفائح التكتونية الأرض كانت يا هتتجمد للابد يا هتغلي وتتبخر محيطاتها للأبد - بسبب دوران قلب الارض الحديدي المنصهر الكوكب حواليه مجال مغناطيسي جبار بيصد الرياح الشمسية القاتلة .. كوكب المريخ مثلا لما برد قلبه وتوقف مجاله المغناطيسي الرياح الشمسية قشرت غلافه الجوي وبخرت محيطاته في الفضاء - حتى بعد توفر كل الفيزياء دي الحياة فضلت مجرد بكتيريا بدائية لمدة 2 مليار سنة كاملة لحد ما حصلت صدفة بيولوجية محصلتش غير مرة واحدة في تاريخ الارض .. هي ان خلية بلعت خلية تانية من غير ما تهضمها واتحدوا سوا عشان يعملوا اول "خلية معقدة واسمها حقيقيات النوى - Eukaryotes اللي منها جت كل النباتات والحيوانات والبشر