هناك أمل🌱🐢

الموضوع مش مع المملوك.. مشكلتنا مع اللي سايق التريلا! كان نفسي أطبطب على محمود المملوك، وأكتب كلمتين حلوين زي عشرات البوستات، لكن مش هعمل كده. الناس سايبة أصل الموضوع، وبتكتب عن نتائجه، وبتطبطب على اللي اتعور! طب وسواق التريلا اللي داسه؟ ولا حد شافه ولا جاب سيرته! العنوان الرئيسي مش إننا نقول إن المملوك حلو وجميل وشاطر، إيه علاقة ده بأصل الموضوع؟! أصل الموضوع باختصار إن فيه حد ما، أو جهة ما، قررت تتخلص من صداع موقع صحفي. تعمل إيه؟ تطيّر رئيس التحرير اللي أسسه، وتستحوذ على الموقع، وتجيب رئيس تحرير بديل! نفس السيناريو تقريبًا اللي حصل مع جريدة الدستور قبل الثورة على طول، لما استحوذ عليها رضا إدوارد وسيد البدوي، وكلنا عارفين باقي الحكاية! حد كتب عن اللي عمل كده؟ طب حد كتب عن خطورة اللي حصل؟ الموقع اللي تقدر عليه اشتريه أو أممه وغيّر رئيس تحريره، واللي ما تقدرش تشتريه اقفله، أو جرجر رئيس تحريره للمحاكم! عندك ملاحظات؟ عندك ردود؟ عندك مشكلة؟ ده مش مبرر أبدًا إنك تعمل كده. اللي بيحصل ده افترا، وتأميم للإعلام، واستمرار لسياسة الاحتكار وفرض السيطرة، وتكريس لسياسة الصوت الواحد. مش مستحملين شوية نفس؟ طب وبعدين؟ قنوات واتاخدت كلها! جرايد وتحت إيديكم كلها! مواقع ومفيش غير موقعين تلاتة شغالين بالكفاف! عاوزين الناس تتابع مين طيب؟ وتثق في مين؟ مش فاهمين إن اللي بيحصل ده بيخلق أزمة ثقة أكبر لإن المصداقية نفسها راحت من زمان؟! حتى تجربة القاهرة 24 اتعرضت للحجب فترة طويلة، ومش هي بس. ده غير حنفية التراخيص اللي بتفتح وتتقفل بالمزاج! يعني إيه حد يعمل تجربة أو مشروع، وفجأة تقوله: مع السلامة! زي بالضبط قرارات نزع الملكية، لكن ده أصعب! ده تأميم ونقل ملكية إجباري! زي بالضبط جريدة البورصة، اللي لحد النهارده زميلنا الصحفي المحترم مصطفى صقر، اللي أسسها، محروم من دخولها، وبيديرها لجنة بعد السطو عليها برضه! الموضوع مش محمود المملوك وحده، ولا موقع صحفي بعينه. الموضوع هو حق الصحفي في عدم السطو على تجربته، وحق الناس في إعلام متعدد ومستقل، مش إعلام صوته واحد وقراره في إيد واحدة. مشكلتنا مع اللي سايق التريلا، ومع اللي سمح له إنه يدوس، بالتالي ما ينفعش نتجاهل الحادثة كلها ونكتفي بمواساة الضحية!

كفاية عليك كده يا كامل.