Mish

كالعادة، الشماتة في المواطن السوداني بقت مرتبطة بموقفه من المليشيا، وكأنو معاناة الناس بقت مادة للمزايدات السياسية وتصفية الحسابات. يعني لا محمد حمدان دقلو قادر يواجه الجيش كجيش، ولا القوى السياسية الموالية ليهو قادرة تخاطب الجيش باعتباره الطرف البتختلف معاه سياسياً وعسكرياً. الاتنين (المعتدي و حاضنته السياسية) اختاروا المواطن ساحة للمواجهة . الأول، عن طريق ترسانته العسكرية وحلفائه ووكلائه في المنطقة، بوجّه ضرباته نحو المواطن ومؤسساته المدنية. والتاني، عن طريق الخطاب السياسي، بمارس الشماتة والسخرية من نفس المواطن، البتعرض أصلاً لأبشع الانتهاكات على يد المليشيا دي، لمجرد إنو موقفه السياسي ضدها. يعني هسه إنت بتلوم مواطن ما عنده أي قدرة على تغيير الواقع السياسي أو فرض قرار الحرب والسلام، وشكّل موقفه من المليشيا دي بناءً على تجربة مباشرة معاها، لأنها شرّدته من بيتو، ودمّرت حياتو، وخلّته يعيش تجربة النزوح والخوف وفقدان الأمان. ولمن المواطن دا يرجع منطقتو، ويحاول يستعيد الحد الأدنى من حياتو الطبيعية، تجي المليشيا تضرب ليهو في المؤسسات والخدمات البعتمد عليها في معيشتو، زي الكهرباء في المناقل والدبة. طيب، كهرباء المناقل والدبة دي حقت البرهان؟ ولا منشآت عسكرية تابعة للجيش؟ ولا المواطن البستفيد منها هو البقرر موقف الجيش من التفاوض؟ ولمن المواطن المتضرر يشتكي ويعبّر عن غضبه وسخطه من استهداف الخدمات المدنية، بدل ما تتضامن معاه وتدين الاعتداء على مؤسساته، تجي تسخر من معاناته وتقول ليهو: «ما الجيش أبى يتفاوض؟». يعني إنت عندك مشكلة مع المواطن لأنه رافض المليشيا، وعندك مشكلة معاه لأنه بشتكي من اعتداءاتها، وفي نفس الوقت بتتبنى رواية دقلو البتحاول تبرر استهداف المستشفيات والمزارع ومحطات الكهرباء، وكأنو المواطن مفروض يتحمل العقاب الجماعي بسبب موقف سياسي أو قرار عسكري ما عنده أي سلطة عليه. المفارقة إنك بتطالب المواطن يتحمل مسؤولية قرار التفاوض، لكن ما بتطالب الطرف البضرب مؤسساته يتحمل مسؤولية أفعاله. وده في جوهره ما موقف سياسي ضد الجيش، ولا حتى موقف مؤيد للتفاوض. ده تحويل لمعاناة المدنيين إلى وسيلة للضغط السياسي، وتبرير لمعاقبتهم على مواقفهم، ومشاركة في تحميل الضحية مسؤولية الجريمة الواقعة عليها. من حقك تختلف مع الجيش، وتنتقد البرهان، وتطالب بالتفاوض ووقف الحرب، لكن ما من حقك تحوّل المواطن إلى رهينة لموقفك السياسي، ولا تعتبر استهداف خدماته الأساسية عقوبة مستحقة لأنه ما متفق معاك. المواطن ما مسؤول عن قرارات الجيش، وما مفروض يدفع ثمن خلافك معاه. ورفض المليشيا ما جريمة تستوجب العقاب، زي ما المطالبة بالتفاوض ما بتدي أي طرف حق تبرير الاعتداء على المدنيين. ياخ والله ده مستوى أسوأ من مجرد العمالة السياسية،ده انحدار أخلاقي غير معهود، بتختفي فيهو أبسط معاني التضامن مع الضحايا (وحصلت في الجزيرة لحدي الفاشر و مستمرة )، وبتتحول معاناة المواطن إلى مناسبة للشماتة، فقط لأنه اختار موقفاً سياسياً ما بعجبك.