Palilo Sanga

Serikali imeanza kuchukua hatua za kuandaa mfumo wa kuanzisha Mamlaka ya Dar es Salaam Metropolitan (Dar es Salaam Metropolitan Authority), itakayolenga kuratibu shughuli mtambuka zinazovuka mipaka ya halmashauri mbalimbali, kuboresha utendaji kazi na kuimarisha utoaji wa huduma kwa wananchi katika Mkoa wa Dar es Salaam. Hatua hiyo imeelezwa leo Oktoba 29, 2026 na Naibu Waziri, Ofisi ya Waziri Mkuu – Tawala za Mikoa na Serikali za Mitaa (OWM-TAMISEMI), Dkt. Festo Dugange kwa niaba ya Waziri wa Nchi, OWM-TAMISEMI wakati akijibu swali la Mbunge wa Jimbo la Kigamboni, Haran Nyakisa Sanga, aliyetaka kujua lini Serikali itakamilisha mchakato wa kuifanya Dar es Salaam kuwa Metropolitan Authority ili kuiwezesha kuimarisha sheria na taratibu za uendeshaji wa mamlaka hiyo. Akifafanua kuhusu mchakato huo, Dkt. Dugange amesema Serikali inafanyia kazi mapendekezo ya maboresho ya muundo wa jiji la Dar es Salaam, kwa kuzingatia kasi ya ukuaji wa jiji, umuhimu wa kuboresha huduma kwa wananchi na haja ya kuimarisha uhusiano kati ya halmashauri za mkoa huo pamoja na taasisi nyingine za kimkoa, kitaifa na kimataifa. Ameongeza kuwa mapendekezo hayo yanazingatia uzoefu wa nchi nyingine na mifumo ya kisheria iliyopo nchini.