Roy

ودي أتكلم عن موضوع اللعن والإهانة وأشوف إننا صرنا نتساهل فيه بشكل كبير، لدرجة إن البعض صار يشوفه مجرد مزح أو أسلوب عادي بالكلام خصوصًا بين الأصحاب أو في البثوث والمقاطع. بس خلونا نفكر فيها شوي حتى لو كان الكلام مزح بين أصحاب هل هذا يعني إن الكلمة ما لها أثر؟ وهل المزح يغيّر من حكم اللعن أو الإهانة؟ مو كل شيء نقدر نضحك عليه يصير مقبول ومو كل كلمة تنقال بعفوية يعني إن أثرها ينتهي بمجرد ما نضحك. واللعن تحديدًا مو كلمة بسيطة لأن اللعن هو الطرد والإبعاد عن رحمة الله والرسول ﷺ يقول: «ليس المؤمن بالطعّان ولا اللعّان ولا الفاحش ولا البذيء». فكيف نستهين بشيء بهالخطورة؟ أما الإهانة فكونك تقدر تهين شخص أو تقلل منه ما يعني إن من حقك تسويها حتى لو كان بينكم مزح. ونقطة ثانية تخص الستريمرز وصنّاع المحتوى أنت مو قاعد تتكلم مع شخص واحد وبس أنت عندك جمهور فيه فئات عمرية مختلفة وفيه صغار ومراهقين يتابعونك ويمكن يتأثرون بطريقة كلامك ويقلدونها لما يشوفون اللعن والإهانة تتكرر قدامهم وتُقدّم على إنها ضحك وخفة دم مع الوقت تصير عندهم من الأمور المعتادة. أنا مو ضد المزح ولا ضد العفوية ولا أقول إن الإنسان لازم يحسب كل حرف قبل ينطقه لكن فيه فرق بين إنك تكون عفوي وبين إنك تطبّع ألفاظ ما تليق فيك ولا في اللي يسمعونك بالنهاية الكلمة مسؤولية وتأثيرك على الناس مو شيء تقدر تتجاهله لمجرد إن نيتك كانت تضحكهم.