Big Boss Δ

الاودن مهو اودن اذا ماكان مغلي.

#Yakuzakiwami1 | #تجاربي تذكرتي لدخول سلسلة ياكوزا العريقة ويالها من بداية. ​القصة والأجواء: أكثر شيء اعجبني في اللعبة هي التناقضات الي فيها ، يعني وش الي المفروض اكون بلعبة تركز عالانتقام وعصابات واشياء جدية ثم تطلع لي ماجيما الي يطاردني كل شوي والمهمات الجانبية الي تقتل ضحك والميني قيمز ؟ المواقف الكوميدية هنا تضحك اكثر واكثر من المفترض انها تسويه بسبب ان كيريو شخص هادئ وبالغالب صامت ببعض اللحظات ، وبعيدا عن الشخصيات الاساسية الي ظهورها شبه معدوم او قليل كيريو تحسه الانسان السوي الوحيد ​أسلوب اللعب: القتال ممتع هنا بسبب ان عندي 4 أساليب قتال مختلفة تناسب اي موقف بطيح فيه ، الاعداء حولي كثار ؟ استعمل الوحش ، الشخص الي قدامي سريع ؟ استعمل ضده المندفع عشان اقاتله بسرعة واذا الي قدامي دفاعه قوي ؟ استعمل الملاكم ، واخيرا وليس اخرا اقوى ستايل باللعبة خصوصا اذا فكيت فيه كم قدرة اضافية ، ستايل التنين , الستايل ذا ينفع اذا قدامك 1 او قدامك 10 ، ستايل مكسور بشكل مرعب بالتحديد اذا فكيت قدرة التايقر دروب ، شيء جميل وممتع ولكن يكسر ام اللعبة , اللعبة استعملت نظام معين اسمه | ماجيما بكل مكان | شخصية ماجيما بتجلس تلاحقني وتطلعلي بكل مكان ( ما امزح ، بيطلع بكل مكان ، حتى كستريبر ) ومرات اوقات ظهوره غثيثة ، سواء مامعي هيل او يخش علي وانا اقاتل اعداء وكذا ، المفروض اكرهه ولكن ؟ حبيت النظام والله وكان ممتع ​عالم اللعبة: صح إن خريطة كاموروتشو صغيرة لو بقارنها بألعاب العالم المفتوح ولكن اللعبة تعرف كيف تخلي العالم محشي بشكل يحسسك بكبر الخريطة وان المكان ذا عايش ، كيف ان الشوارع مليانة مطاعم ومحلات اركيد بتسرق وقتك وتخليك تقضي ساعات باللعبة على الاشياء الجانبية ( او عالاقل ذا الي حصل معي ) التقييم : 8/10 العبوها ياعالم 🦅 حرق عن شخصية نيشيكي واحداث اللعبة 🔥🔥🔥🔥🔥🔥🔥 : شخصية نيشيكي وكيف انه ببداية اللعبة كان خويي ونروح ونجي سوا الى انه صار فيلين ؟ مشت بشكل مكتوب صح ( عالاقل بناء على لعبي للجزء ذا ومدري وش صار في 0 ) كيف انه يوروك تحوله بناء بتحمل كيريو للملامة بموت الزعيم ودخوله السجن ثم موت اخته ووصولا الى ان اتباعه جابوله المشاكل بسبب عصيانهم له وقول كاشيواغي ان لو كيريو كان مكانك ماكان صار ذا كله واخيرا ذا كله وصله لمرحلة من الحسد والغيرة من كيريو لدرجة صار يخطط لقتله بشكل دائم، ماشوف ان التغير صار بشكل بدون اي مبرر ، فقدان كيريو الي بمثابة اخوه وان حتى لو خرج من السجن فا هو مطروط من الكازاما اثر با أكيرا بشكل ملاحظ وكأني حسيت ان أكيرا مايثق الا بكيريو من التوجو ، وماقصر معه شينتارو كازاما بانه خلاه يأسس عائلة واعطاه اعضاء والسبب انها تكون العائلة الي تقبل كيريو لاخرج من السجن بس للاسف الاعضاء الي اخذهم اكيرا كانوا همج وحقين مشاكل لدرجة معاملينه وكأنه خادمهم ، وخصوصا الزبال ماتسوشيغي الي يتصرف وكأنه هو الرئيس الفعلي للعائلة ذي وليس أكيرا ، وانه جعل الرئيس ( أكيرا ) يسجد له عشان يشحذه المبلغ الي يحتاجه عشان يعالج اخته ، والي كملها الزبالة بانه دعس رأسه يوم سجد ، الشيء ذا دمر اكيرا ولكن وش يسوي ؟ مابيده اي شيء يسويه لين يقابل الشيمانو فوتوشي ويعطيه درس عن الحياة سريع سريع وان كيف انك يا اكيرا ماتنفع تكون ياكوزا وان كازاما ماخلاك تسوي عائلة الا لانه يبي كيريو يجي ويخشها ويترأسها غصب عنك ، ثم نشوف اكيرا عند قبر اخته وكان يفكر ينهي نفسه ، يولد لنا اكيرا الشرير الي كل طموحه بالحياة ذي انه يوصل فوق بالتوجو وانه يقتل كيريو بسبب حسده له ، والشيء ذا واضح من الوشم الي حاطه والي هو سمكة الكوي ( الي تطمح تصير تنين ) وكيريو وشمه هو التنين ، التفصيلة ذي البسيطة تبين الاختلاف بينهم الاثنين ، ولكن بنهاية اللعبة يجي ويقرر يضحي بحياته عشان كيريو ؟ شيء جميل جدا ويبين لك ان اكيرا مايكره كيريو ولكن يشعر بالحسد والغيرة منه رحلة تحول جميلة وماشوفها صارت بدون سبب