Urdu

یوں بھی اک روز اِسےچھوڑ کےجانا ہی تو ہے  خوف پھر کیا  ہو زمانے کا زمانہ ہی تو ہے زندگی اتنی بھی دشوار نہیں تیرے بعد تجھ کو ہر روز سرِ شام بُھلانا ہی تو ہے نعیم ضرار

میں نیل کرائیاں نیلکاں، میرا تن من نیلو نیل 🌀🌀🌀🌀🌀🌀🌀🌀🌀🌀🌀🌀 🔷🔷🔷🔷🔷🔷🔷🔷🔷🔷🔷🔷 #Situation #usamidterms 🇺🇲

They have turned you blue.

آج امریکہ میں 8 فروری 2024 ہے

ٹرمپ کو صرف پاکستان کا الیکشن کمشن بچا سکتا ہے۔

— معافی — یہ محبت کی شادی تھی۔ لاہور میں قیام تھا۔ بیوی کا مائیکہ پشاور تھا۔ یہ ان دنوں کی بات ہے جب ڈائیوو بس سروس کا آغاز ہو چکا تھا اور بٹن والے موبائل فون آ چکے تھے۔ شادی کے کچھ عرصہ بعد ہی ہم دونوں میں ایک معمولی سا جھگڑا ہو گیا۔ غلطی بھی اس کی تھی، اور روٹھ بھی وہی گئی۔ میں غصے کا تیز آدمی ہوں، چنانچہ میں نے فون ملائے بغیر دکھاوے کیلئے کچھ بٹن دبا کر فون کان سے لگایا، اور پوچھا کہ آپ ڈائیوو سے بول رہے ہیں۔ پھر کہا کہ پشاور کیلئے سائرہ نعیم کے نام پر ایک سیٹ بک کریں۔ غصہ زیادہ تھا، اس لیے نام کی فوراً تصحیح کروائی کہ سائرہ نعیم مت لکھو، سائرہ زمان لکھو۔ (شادی سے پہلے اس کا نام یہی تھا)۔ 😂 میں اس جھوٹ موٹ کی کال کو جلد ختم کرنا چاہتا تھا۔ خدشہ یہ تھا کہ اس دوران میں اگر کسی کی سچ مچ کال آ گئی تو فون کی گھنٹی بجنے سے، اس جعلی کال کا پول کھل جائے گا۔ بدقسمتی سے ایسا ہی ہوا۔ گھنٹی بج اٹھی۔ میری اوپر کی سانس اوپر اور نیچے کی نیچے رہ گئی۔ میں ہکا بکا فون کو دیکھنے لگا۔ میرا فریب آشکار ہو چکا تھا۔ وہ منہ دوسری طرف کر کے بیٹھی سب سن رہی تھی، گھنٹی بجنے پر وہ اچانک میری طرف مڑی، اس نے مجھے حیران نظروں سے، اور میں نے اسے پریشان نظروں سے دیکھا، میری پریشانی ندامت میں، اور اس کی حیرانی غصے میں بدلتی گئی۔ بس پھر کیا تھا، اس نے سارے تکیوں کی روئی مجھ پر نکال دی۔ خود کو بچاتے ہوئے میرے شرمندہ قہقہے اور اس کے حملے ہماری صلح پر منتج ہوئے۔ اس واقعے کے بعد ہم نے ایک اصول طے کیا کہ "آئیندہ جھگڑے میں جس کی غلطی نہیں ہو گی، وہ معذرت کرے گا"۔ چنانچہ پچھلی دو تین دہائیوں سے میں ہی معافی مانگتا آ رہا ہوں۔ نعیم ضرار

کتنے عزیز ہمسفر، رستے میں کھو گئے منزل قبول تھی انہیں لطفِ سفر نہیں نعیم ضرار

ایک ناقابلِ فراموش ملاقات — محمد علی، ایک عہد، ایک آواز، ایک حسین یاد! 30 جنوری 2005ء، لاہور۔ لاہور کی تاریخ کی پہلی میراتھن کا دن تھا۔ ریسکیو 1122 کے سپرد ہنگامی طبی امداد اور انتظامی ذمہ داریاں تھیں۔ بطور ڈپٹی پراجیکٹ ڈائریکٹر، میں بھی ان انتظامات کی نگرانی پر مامور تھا۔ خلافِ معمول، سوٹ کے بجائے مکمل یونیفارم پہنے، قذافی اسٹیڈیم کے باہر فیروزپور روڈ پر کھڑا تھا۔ اردگرد نوجوان ریسکیو افسران اور عملہ موجود تھا۔ سڑک عام ٹریفک کے لیے بند تھی اور خلقت تھی کہ امڈی چلی آ رہی تھی۔ یوں لگتا تھا جیسے لاہور کی سڑکوں پر عید اتر آئی ہو۔ اسی ہنگامۂ شوق میں ایک دراز قد، عمر رسیدہ شخص آہستگی سے میرے قریب آ کھڑا ہوا۔ سرسری نگاہ پڑی تو چہرہ کچھ شناسا لگا۔ اگلے ہی لمحے دل جیسے دھڑکنا بھول گیا! یہ تو محمد علی تھے! پاکستان کی فلمی تاریخ کا وہ درخشاں ستارہ، وہ بے مثال اداکار، وہ طلسماتی آواز، جس کی فلمیں دیکھتے اور جس کی شخصیت کے سحر میں گرفتار رہتے میرا بچپن اور لڑکپن گزرا تھا، آج میرے سامنے، تنہا، خاموش کھڑا تھا! میں نے قریب ہو کر سلام کیا۔ جواب میں وہی گونج دار، مانوس اور دل میں اتر جانے والی آواز سنائی دی۔ ہلکا سا مسکرائے اور پوچھا: ’’گویا آپ نے مجھے پہچان لیا؟‘‘ میں نے بے ساختہ عرض کیا: ’’علی صاحب! آپ کو اور مہدی حسن صاحب کو تو میں سات پردوں کے پیچھے سے بھی پہچان سکتا ہوں!‘‘ وہ مسکرا دیے۔ سن گلاسز، مفلر اور کیپ کی اوٹ میں اپنی شناخت چھپائے، گلبرگ سے اکیلے اس جشن کی رونق دیکھنے چلے آئے تھے۔ یہ ان کی زندگی کے وہ ایام تھے جب صحت کے سنگین مسائل نے انہیں گھیر رکھا تھا۔ کہنے لگے کہ بس کچھ دیر لوگوں کی خوشیاں دیکھنے آیا ہوں، مگر میڈیا اور انتظامیہ کی نظروں سے دور رہنا چاہتا ہوں۔ پھر تقریباً ایک گھنٹہ ان کی رفاقت نصیب ہوئی۔ انہیں اسٹیڈیم بھی لے گیا۔ کتنی ہی باتیں ہوئیں، کتنی ہی یادیں تازہ ہوئیں۔ نہ کوئی کیمرہ، نہ کوئی رسمی تقریب، نہ شہرت کا کوئی تکلف۔ بس ایک عظیم فنکار اور اس کی شخصیت سے والہانہ عقیدت رکھنے والا ایک شخص۔ بالآخر اپنی گاڑی کے ذریعے انہیں واپس بھجوا دیا۔ آج اس واقعے کو دو دہائیوں سے زیادہ گزر چکے ہیں۔ محمد علی بھی رخصت ہو گئے، وہ زمانہ بھی بیت گیا، وہ منظر بھی وقت کی گرد میں کہیں کھو گیا۔ مگر آج بھی جب آنکھیں بند کرتا ہوں تو فیروزپور روڈ کا وہ ہجوم، وہ دراز قد شخصیت، وہ دھیمی مسکراہٹ اور وہ پُروقار آواز پھر سے زندہ ہو اٹھتے ہیں: ’’گویا آپ نے مجھے پہچان لیا؟‘‘ کاش! انہیں بتا پاتا کہ بعض چہرے پہچانے نہیں جاتے، دلوں پر نقش ہوتے ہیں۔ اور بعض آوازیں کانوں سے نہیں، روح سے سنی جاتی ہیں۔ زندگی کی سب سے قیمتی یادگاریں تصویریں نہیں ہوتیں؛ بعض اوقات وہ محض ایک ملاقات، ایک مسکراہٹ اور چند لمحوں کی رفاقت ہوتی ہیں، جنہیں وقت بھی مٹا نہیں پاتا۔ اللہ تعالیٰ محمد علی صاحب کو جوارِ رحمت میں جگہ عطا فرمائے۔ آمین۔ نعیم ضرار

بہت رَسا تھا اگرچہ دماغ اندر سے نہ مل سکا اُسے میرا سراغ اندر سے *ہتھیلیوں نے ہواؤں کو روک رکھا تھا* *جلا رہا تھا انہی کو چراغ اندر سے* یہ کھو گیا تھا زمانے کی دھول میں لیکن ہرا بھرا ہے محبت کا داغ اندر سے خیالِ یار کی دل سے مہک نہیں جاتی اجڑ گیا ہے اگرچہ یہ باغ اندر سے نعیم ضرار

سنتے کے ہر شخص کا نقصان ہوا ہے یہ کون میرے دیس میں سلطان ہوا ہے نعیم ضرار

نہیں تھا خوف اُسے عارضی خداؤں سے چراغ لڑتا رہا رات بھر ہواؤں سے عجیب شخص ہے مایوس ہی نہیں ہوتا وفا کی اُس کو ہے امید بیوفاؤں سے رہائی مل نہ سکی فکر کے غلاموں کو ہٹا تو دی گئی زنجیر اُن کے پاؤں سے خراج مانگتا ہے انقلاب کا رستہ یہ التجاؤں سے آتا ہے نہ دعاؤں سے زباں حسینی مگر دل یزید کا قائل مجھے بچائے کوئی میرے پیشواؤں سے نعیم ضرار

علامہ اقبال سے منسوب یہ خط جعلی ہے۔ اس پر 1934 کا سال درج ہے۔ جبکہ علامہ اقبال کی وفات کے سال 1938 تک لفظ "پاکستان" کا وجود تک نہیں تھا۔ پاکستان کا نام قرارداد لاہور 1940 کے بعد سامنے آیا۔

گذرے منظر اٹھا کے لے آیا وقت خنجر اٹھا کے لے آیا میں نے دو اشک اس کے کیا پونچھے وہ سمندر اٹھا کے لے آیا جانے کیا گل فروش پر گذری آج پت جھڑ اٹھا کے لے آیا میں کہ چنتا رہا پرائے غم پھر انہیں گھر اٹھا کے لے آیا کب سے رکھا ہُوا تھا میں باہر خود کو اندر اٹھا کے لے آیا نعیم ضرار

بچھی ہوئی میرے اطرف آبگینیں ہیں میری حیات پر نگران خوردبینیں ہیں میں خود کفیل ہوں مسموم خود فریبی میں مِرے خیال کی اپنی بھی آستینیں دل و نظر کی ضرورت نہیں رہی باقی کہ ارضِ خاک پر اب خاک کی مشینیں ہیں ابھی تجاوزِ نسبت کا میں نہیں قائل مِرا علاقہ ابھی داخلی زمینیں ہیں سنا ہے ارضِ عدم پر ہے ایسی بستی بھی جہاں جفا سے تہی ناز آفرینیں ہیں نعیم ضرار

ہمارا ہونا جُڑا ہے تمہارے ہونے سے ہمیں تمہارا نہیں انتظار اپنا ہے نعیم ضرار

دانش کا تقاضا چند مثالی سکول بنانا نہیں، پورے نظامِ تعلیم کو مثالی بنانا تھا۔ کاش! شہباز شریف اپنے ادوارِ وزارتِ اعلیٰ میں 16 دانش سکولوں کے بجائے پنجاب کے 48 ہزار سے زائد سرکاری سکولوں کی اصلاحِ و بنیاد پر توجہ دیتے تو آج ایک کروڑ بیس لاکھ سے زائد بچوں کا مستقبل کہیں زیادہ روشن ہوتا۔ کسی بھی قوم کا مستقبل، اس کے اسکولوں میں زیرِ تعلیم بچوں کی عمدہ تعلیمی سہولتوں سے وابستہ ہوتا ہے۔ کئی بار پنجاب کے وزیرِ اعلیٰ رہنے والے نے پنجاب کے سرکاری اسکولز کیلئے جو کچھ کیا، اس کی حالتِ زار اور ابتری سے کون واقف نہیں ہے؟ چراغ تلے اندھیرا تو سنا تھا، مگر لاکھوں بچوں کے تعلیمی اندھیروں پر صرف چند چراغوں کی روشنی کا جشن منانا، آخر کہاں کی دانش ہے؟

رکھی ہے مقابل پسِ دالان نہیں کی اک تیری طلب داخلِ سامان نہیں کی لفظوں کو برتنے کا سلیقہ نہیں آیا سو چشمِ تماشا کوئی حیران نہیں کی اوروں کی طرح میں نے ابھی اپنی جوانی ڈھلتی ہوئی اِس عمر پہ قربان نہیں کی بچوں کو سہاروں کے بِنا چلنا سکھایا اُن کی کوئی مشکل کبھی آسان نہیں کی اک ہم ہیں کہ ابلاغ کو ابلاغ ہی رکھا حیرانی کبھی واصلِ ہیجان نہیں کی مَیں شوقِ سفر میں کبھی تھک کر نہیں بیٹھا منزل کوئی شرمندہِ امکان نہیں کی نعیم ضرار