Suspicions ||

اليوم قبل ما يطلع زوجي للدوام الصباح، باس يدي قبل يروح الدوام وطلع من الغرفة. سمعت صوت سيارته وهو يطلع وبعد أقل من 3 دقايق رجع! وبما إنه عنده مفتاح احتياطي، ما قمت من السرير. دخل الغرفة وقال لي: ”حبيبتي، أنتِ بخير؟ تعرفين قد إيش أنا أحبك؟“ وبعدين قال: ”تحسين إني مهتم فيك؟ وأني أعاملك كزوجتي بالطريقة اللي تريحك؟“ رديت عليه: ”إيه الحمدلله، بس وش فيك؟“ قال: ”أنا كزوجك ما أبي أبدًا أخليك تحسين إني أخذتك كأمر مُسَلَّم فيه، ما أبي أبدًا أرتاح في زواجنا وأعتبرك شيء مضمون، ولا أعتبر إنك عارفة مشاعري بدون ما أقولها.“ يا بنات.. هذا كان بعد 27 سنة زواج، وثلاثة عيال كبار أكبرهم متخرج من الجامعة، وأصغرهم في آخر سنة ثانوي، لسه نفس الاهتمام والحب وكأننا تونا متزوجين. فعلاً إذا ربي رزقك بالرجل الصح، يبين لك حبه كل يوم بدون ما يقل. أنا ممتنة جدًا لهذا الرجل.. شكرًا على 27 سنة جميلة، على إنك ما ارتحت يوم في اهتمامك، وعلى إنك كل يوم تحبني أكثر من اللي قبله. عشان كذا يا بنات، اختاروا صح لأن اللي تختارينه اليوم، هو اللي بتعيشين معه كل هالعمر.

شفت مقطع على تيك توك لبنت كانت تتكلم عن ولادتها قالت: كنت قريب تنتهي حياتي وأنا أولد بنتنا. ٢٤ ساعة ولادة؟ لا ٤٢ ساعة وأنا في المخاض. وفي الأخير عملية قيصرية طارئة. أتذكر برودة غرفة العمليات، وكيف الدكاترة ما كانوا يقدرون يطالعون في عيوني. صحيت وأنا مخيطة، أرتجف، نص جسمي مخدر. زوجي؟ ما مسك يدي. ما بكى. كل اللي سأله الدكتور: ”الجرح هذا بيبقى دائم؟“ رجعنا البيت، وأنا بالكاد أقدر أمشي. ما أقدر أضحك أو أتكلم بدون ألم بطني. حتى الجلوس يحتاج مساعدة. وهو يشتكي إن البيت مو مرتب ويقول إجازة الأمومة مو إجازة سياحة. بعد أسبوعين من الولادة، وأنا أحاول أهتم للبنت، وقف فوق راسي وقال: ”ترى المفروض الحريم يولدون طبيعي أمي ولدت كذا.“ حسبته يمزح.. بس ما كان يمزح. مرة سمعتّه يكلم أخوه ويقول: ”هي أصلاً ما ولدت صح مثل باقي الحريم.“ يوم وقفت قدام المراية وشفت نفسي ما شفت ضعف، شفت نجاة، شفت إني عشت. بس كل مرة هو يطالع فيني كنت أشوف خيبة. وبعدين صار أسوأ. وقف يكلمني. صار يروح النادي كل يوم. ويقول: ”أنا أبغى حرمة تهتم بنفسها.“ وأنا؟ لسه تعبانه، لسه الحليب ينزل، لسه أصحى كل ساعتين. في يوم رمى مشد على السرير وقال: ”لازم تلحقين على نفسك قبل يفوت الأوان.“ سألته: ”إيش تقصد؟“ أشر على بطني. نمت ذيك الليلة في غرفة البيبي، مو عشان هي كانت تبكي أنا اللي كنت أبكي. والحين يقول للناس إني ”تغيرت“ بعد الولادة. إني حساسة. إني ما صرت أحاول. أنا كنت قريب أموت. أعطيته بنت. وأحمل جرح يوجعني إذا تغيّر الجو. وبالأخير أنا اللي فشلت؟ ما عاد أعرف مين هذا اللي تزوجته ولا أعرف كيف أطلع. بس أعرف شيء واحد هذا مو حب.

صار لي موقف مع زوجي الليلة خلاني أعيد تعريف الأمان وشفت زوجي بنظرة مختلفة، كان زوجي يتكلم مع أخوه اللي زوجته ولدت جديد وكان أخوه جالس يشتكي من زوجته بسبب إهمالها في نظافة البيت.. رد عليه زوجي وقال: بعد الولادة، تحتاج المرأة حوالي 6 شهور عشان تلتئم جروحها الداخلية، وحوالي سنة عشان تستعيد عافيتها الجسدية، وسنتين عشان يرجع توازن الهرمونات، وممكن يوصل الموضوع إلى 5 سنوات عشان ترجع تكتشف نفسها وهويتها من جديد. وخلال هالفترة كثير من العلاقات تتأثر بسبب قلة الفهم والوعي بهالتغيرات. كون أحنّ وأصبر مع الأمهات الجدد. لأن اللي يمرّون فيه أكبر وأصعب مما نتصوره. وأظن لو كل رجل تعامل بهذا المنطق مع زوجته اللي جابت مولود جديد، ما راح نسمع عن معاناة كل النساء هالأيام.

بنت عمي تزوجت وهي بعمر ٢٢ كانوا يحلمون هي وزوجها ببيت مليان أطفال. حملت بعد كم شهر، حتى إنهم جهزوا غرفة البيبي قبل ما يخلص الثلث الأول. بعدين أجهضت. سوت إجراء طبي، وصحت وهي مو مستوعبة. الدكتور ابتسم وقال: ”كل شيء تمام، تقدرين تحاولين مرة ثانية قريب.“ حاولوا سنين. كل تحليل سلبي كان كأنه حكم. أهل زوجها بدوا يلمّحون لها. زوجها صار بعيد لين تركها. قال لها: “أبغى عائلة حقيقية.“ تزوج بعدها بسنة وجاب طفلين ورا بعض. هي كانت تحسب إن جسمها خانها. لما كبرت، في آخر الخمسينات، وقدرت تطلب ملفاتها الطبية القديمة وقدّمت وطلعتها. ولقت بين الأوراق سطر مكتوب: ”مضاعفات أثناء الإجراء أدت إلى ثقب في الرحم وتليّف شديد.“ ولا أحد شرح لها. ولا كان فيه متابعة. ولا حتى صراحة. عاشت ثلاثين سنة تلوم نفسها على شيء صار لها مو بسببها. بعض الحريم ينقال لهم إن أجسامهم خذلتهم.. بس الحقيقة أحيانًا إن فيه أحد ثاني هو اللي خذلهم. مازال إهمال وجع النساء دايم يتغطى بصمت، كأنه ما يستحق يُحكى، وجع النساء دايم يُهمَّش، وكأنه عادي.. مع إنه معاناة عمرها ما كانت ولا هتكون عادية. لأن وجع النساء دايم يُختصر ويتنسى.

مره أمي سألت بكل استغراب: ليش البنات صاروا يتأخرون في الزواج بهالشكل؟ وجاوبتها عمّتي اللي تأخرت في الزواج وقالت: بصراحة أشوف إن أغلب الرجال ممكن يشوفون كل شيء يخص البنات بشكل سلبي وما يحبّون البنات فعلًا، وهم مو مستوعبين. لأنهم فعليًا ما يحبّوننا إحنا البنات. أجسامنا الطبيعية يشوفونها مقرفة، اهتماماتنا يشوفونها سخيفة، والوقت اللي يقضّونه معنا يحسّونه واجب مو شي ممتع. وإذا الواحد عنده زوجة، وبدال ما يتحمس يطلع معها، يفضّل يقعد مع أصدقائه ويحس إنه مجبور يطلع معها.. هذا دليل إنه فعلًا ما يحبها. والمشكلة إن نساء كثيره تشوف نجاح البنت ينقاس بالزواج بس.. معناته بنلغي كل شيء قبله وبعده، وهذا مو عدل ولا منطق. المشكله مو في البنات ولا في العلاقات يمكن المشكلة كثير من الرجال ما تعلّموا أصلًا كيف يتقبلون الأنثى ولا كيف يتعاملون معها. وإذا كل شي يخص البنات تشوفه سيء يمكن لازم تراجع نفسك قبل ما تدخل حياة البنت.