‏ᴹ

أحسن وسيلة وأنت بالخير مذكور وسـيلةٍ مـا تنتعوّض بــحاجـة قدمك طريقٍ للميامين مأثور هدي الرّسول وسنّته وانتهاجه والفاتحة والعصر والفجر والنّور وما صحّحوه التّرمذِي وابن ماجه والواحد اللّي من يناجيه ماجور إليا فات ثلثينٍ من اللّيل ناجه

في أجمـل وأصدق معاني الوفاء ، الشاعر والأديب #ذيب_الشمـري يرثي صديقه الشـاعر #نـّواف_العـازمي ، رغم نديتهم القويه والشـرسه في مياديـن المحـاوره ، إلا أن الوفاء أكبر وأنبل صفه يتّصف بها الأنسان #ذيـب_الشمـري @TheebAlshmmri ــــــــــــــ كن الخبر رمحٍ تخلل ضلوعي رمح الفراق اللي للاعمار قصّاف صحيح ماهو واحدٍ من ربوعي مير الوفا فوق الطوايف والاطياف شقيق فكري في بداية طلوعي اخوي في حكم العوايد والاعراف بين الصفوف الحاميه والجموعي ياما لنا في ساحة الشعر ميقاف بالقاف يضربني على راس كوعي واضربه مابين الحجاجين بالقاف على الشرف ندفع سلاح الدروعي من شان تعزيز المواقع والاهداف في علم ترويض الاسود الهجوعي في ساحته صرنا مروّض وعساّف حتى بدت تمشي بطوعه وطوعي والسبع راقي بالتعامل ليا خاف واصبح حليفي بأتحاد الفزوعي يوم الزمان اصبح مجاميع واحلاف من سنة الرحمن ماني جزوعي لكن معي قلبٍ من الود شفاف حفظ الصداقه من جواهر طبوعي اموج بالذكرى شراعٍ ومجداف ادفع ضرايبها ولاني منوعي مااظمها في خاطري شكل وغلاف عليه من جوع الغلا زاد جوعي ماهو مثل جوع البهايم للاعلاف جفت ينابيعي ويبْست زروعي عشرة عمر نسيانها ظلم واجحاف وفي حين صلينا عليه بخشوعي وحطوه في قبرٍ فصال اربع اطواف اقفوا وانا عنده تذارف دموعي اخر رجل واقف على قبر نواف يامن لحكمك معلنين الخضوعي انت الكريم وتكرم الضيف لا ضاف عبدك وضيفك في مقامٍ يروعي عن رحمتْك ماله وساطات واسعاف يالله لاتحصي عليه الوقوعي في ما نهيت وشفت والغير ماشاف

ـــــــــ #عبدالله_بن_عون البـارحـة جفـنـي عــن الـنـوم مـذهـول طــيــب الـمــنــام ولــذتـــه ما حصل لي اليـا شتـل عينـي عـن الـنـوم شـاتـول أخــذت مــع هـاجــوس قـلـبـي تـسـلّـي وليا عذل عيني عـن السهـر عـاذول قـلــت الـسـهـر يـاعـاذلـي جـايــزٍ لّــــي مـادام الـي قلب ٍ مــن الـحـب مـدهـول ما اشوف في كثر العـذل صالـحٍ لـي اتـركـنـي اتـبــع راحـــت الــبــال واقــــول مـن ماتصـور واحـضـره هـاجـسٍ لّــي خـل القلـم يكتـب مـن القيـل معـسـول ابــيــع واشــــري فــيــه واخـــــذ وخــلّـــي اخــذ مــن اول صـفـوة القـيـل مـزلــول واتــــرك حــثــال الـقـيــل عــنّــي يــولّــي عـسـى يـعـالـج خـاطــر ٍ فـيــه نـشـبـول مـن ضيقتـه ضـاق الفـضـا والمحـلّـي كــان العـزيـز يصـيـح للـحـب مـذلــول فـــانـــا الــذلــيـــل ولاحـــــــدٍ ذلّ ذلي دايــم وجيـبـي بــأزرق الـدمـع مـبـلـول والـحـال مـني نــاحــلٍ مـسـتـسـلّي حــالٍ بــراه الـهـجـر حـــول ٍورى حـــول يـامُن يـشـوف لهـجـر الاحـبـاب حـلّــي طفلٍ طغى مالـه بسـوق الهـوى دول بأحـلـى صـفـات المحصـنـات متـحـلّـي راعـي هـدب عينٍ بـلا كحـل مكـحـول والـبــدر كـنّــه فـــ الـجـبـيـن مـتـجـلّـي ما احرزت اجيه ولايجي منه مرسول بـيـنــي وبـيــنــه واحـــــدٍ واقـــــفٍ لـي علـيـه قـلـبـي بـيــن الاظـــلاع مـتـلـول ودايـــم وهــــو لـلـبــال قـبـلــة مـصـلّــي ـــــــــ

ياحبيب القلب فـ الحب يازين الوضوح اجمع حساب الغموض القديم ودقّقه يطلع الناتج .. معاناه و أعمارٍ تروح وذكرياتٍ تحت سقف الطموح معلقه منك يا كثر المحبه ويا كثر الجروح و الزمان ايامه مجمّعه .. و مفرقه تدري ان صدري من الصد والفرقا يفوح والبطى والهجر : ثوب الغرام يشققه لا تعاتبني و مزن الجفا ؟ برقه يلوح وصدتك رحلة غريب ماهي بموفقه كنت لي منصح وانا كنت في حبك نصوح لين جبت أعذار طول الغياب .. ملفقه وين راح الحبّ يالصافن القبّا الجموح والعهود اللّي بحلف اليمين : موثقه ودي اوريك قلب على وصلك لحوح كيف من بعد القساوه غرامك رققه ؟ لا ذكرت الوصل والغيّ وايام المزوح وسجتي مابين جيدك .. وبين معنقه قمت اردد من شقى خاطر ومن حر بوح سَامحك ربي .. وذكرى الغرام ، معتقه اسمع البيت الختامي وإذا بتروح ؟ روح بيت احساس الشعور الحقيقي .. نطقه انت راس المال وانت الامل وانت الطموح وانت .. حلمٍ جعل رب العباااد : يحققه ! - محسن بن مترك

نرجع ونعيد ونزيد بالموضوع اللي صاير هالفتره الحاليه ، من كثرة رسايل التيـل للحسابات اللي بيني وبينها أضافه .. وربط حسابي وحساب شخص ثاني بكلام لا يرضي الله ولا رسوله .. أتمنى من هالشخص اللي جالس يكتب وينشر هالاشياء إنه يجي ويتكلم باللي عنده ولا يرمُي بلاه على المسلمين .. كل من بيني وبينه أضافه فـ اخ عزيز وله تقديره وأحترامه ، القذف والسب ما يرضـاه أي شخص فيه مخافة من الله ومروءة .. لذالك أتمنى من هالشخص يجي بحسابه ويتكلم باللي عنده ويترك المسلمين وأعراض المسلمين عنه .. تركت الموضوع وترفعت عنه إلى أنه وصل لمرحله ما ينسكت عنها لذالك للمره الاخيره أقول يجي بنفسه ويتكلم باللي عنده لن بعد هالتغريده هذي بيصير كل شي رسمي موثق ويتم تقديمه لجهة الأختصاص .. ✋✋✋

#عبدالكريم_البدراني ـــــــــ بيتً مضى له خمسة أعوام مهجور متساويٍ من قلة الوطي _ قـاعه وقفت فيه شوي مع فجّة النور قبل أرتفاع الشمس تقريب ساعـه في مجلسٍ بابـه مصدّي ومكسور ويفتح على حوشٍ محيلن دعِاعه فيه الورق كنه على الارض منثور وغصونه اللي تقول موتى جماعه وقلت العلوم ؟ وقال مانيب مسرور قلت الحياه ! وقـال ماهي _ طمـاعه مطيةً تمــشي .. ودورٍ ورى دور كم واحــدٍ طشت وراها متاعه تشكي علي الهجر يا عـالي السور شكوىً تخلي الكبد مثل المياعه جيتك سليم وعندي أحساس وشعور ورحت بكسر خاطر .. وحـزن وقناعه واللي وطـاك من الغرابيـل والجـور ماهي قضية وصــل ولا قطـاعـه ماعلموك إنْ غيب الايام مستور اللي بنوا سـاسـك وعلو ربـاعـه وأن المفارق مالهم فيه مقدور أمراً مافيه محـاوله وأستطـاعه شيٍ ما ينفع بـه معالج ودكتور والبـاس والصحـه وقو المنـاعه وقتٍ يلف سلوك الاعمار ويـدور واللي وطا ظبيه .. توطا سبـاعه والنـاس بالدنيا رصـاصٍ بـشرشور احـدٍ رحـل واحـدٍ قريـبٍ وداعـه ـــــــــ

#عبدالله_بن_عون ــــ عسيبٍ عليه الراعبيه تجر الصوت وتهزّه ليا منّه ركد بإلتفاتتها تجر الونين لحالها والحمام اسكوت ليا سمعها راع الولع ون ونتها تخفّف بجر الصوت عن صدرها المكبوت وانا صرت من بد الأوادم ضحيّتها تحرّك جهاز مولّع القلب بالريموت وتجر المشاعر لين تعطي جريرتها غريبٍ لحنها ما يباعد لحن بخّوت عليها الله أكبر كن بخّوت عمّتها وأنا أظن فالورقا وظنِّي هو المثبوت شعاها المفارق لين هاضت قريحتها لكن الفراق ايعالج إلاَّ فراق الموت هو اللِّي ليا مر المواليف شتّتها ــــ

قصيـدة غزليـه من طراز " الغزل العفيف " قيلت القصيده قبل 150 سنه تقريباً ، للشاعر الكبير / دلول بن طراح الجميلي رحمه الله _ ياراكب ٍ من فوق ناب النسانيس مربعٍ من طيحة الوسم بالراس قولوا ربيعٍ دارهم يالعواسيس حتى تقرب هجرة الناس للناس إن جت نجوم الليل مثل المقابيس والا الركايب ضمّرٍ مثل الأقواس عسى الحيا يسقي مردة مديسيس اللي شرب من ماه مدقوق الألعاس ياونتي ونة طريح الملابيس أهل الدروع اللي زهوا لبس الأطياس من واحدٍ بالقلب حط الهواجيس بين الرجا لاما الحبيّب والإياس تونيس ماعقب أريش العين تونيس ولا ونساً عن ونسته كثر الأوناس مثل القمر يضوي بظلما وهي خيس وإلا الثريا ظاهره وقت الأدماس الجوخ ما وازن قطع الهداريس وصافى الذهب ما وازنه بارد الحاس نظيفٍ أنظف من قطع القراطيس ما داوروه اللي يدورون الادناس _

ـــــــــــ #عبدالله_بن_زويبن رحمه الله انا البارحة هيض عليه حمام ناح يجر اللحون من المسرة والأفراحي نبش له جروح بالحشا دمهن نضاح وانا قبل كاميهن مبا السر ينباحي أهوجس ومن جته الهواجيس مايرتاح تنام العيون المستريحه وأنا صاحي يدقن قلبي دقة السلف بالمفتاح ومثل مايطق الطار في قصر الأفراحي ويتلن قلبي تل ركبٍ من المسراح يقرب مساهن واللواليح طفاحي سوات الخشوف إلى تقافن مع الصحصاح وساع النحور فخوذهن مثل الألواحي لهن عند شغموم يسد اللزوم مراح يسلي نباه وللمواجيب نطاحي على البيت من صوب الخلا مايحط سناح كريمٍ ببيته ضايق البال ينساحي على دور ناسٍ دورهم كد مضى وانزاح والأذكار تبقى والعرب رسمهم ماحي وألا يانديبي قم تولم بدون الحاح على اللي لها فوق المخايل تمرجاحي تمروج تمروج مومي السبق والجناح على متنها توصل خبر مانت سواحي توجه من العارض إلى ديرة الصباح معك ماعليها غير كبتن وملاحي توصل وصاتي يم قرمٍ وسيع شباح على الخير واللي غير معنا وهو ناحي جزاء الحنتمي عد الروا واترك الضحضاح للأمجاد كسابٍ وللقاف نقاحي عزيز المناسب ماذكر فيه عرق شحاح سلايل كرام وهو للامجاد طماحي طموحه يصمل حرمة العفن للمطماح تشوم لصبي الطيب عن راع الارباحي سخيٍ يقلط بالصحون الوساع فطاح كريمٍ يعد بذبحة الحيل سفاحي عليه الخسارة هينة والحياة اكفاح والأموال ترجع والخسارة بالأرواحي سلايل رجالٍ فاللقاء ترخص الأرواح هل الفزعة العجلة إلى صاح صياحي إلى من ستر معسلات الشفايا طاح سندهن ( سند ) مروي مذاليق الأرماحي نهار اللقاء ينطح ولا ينطحه نطاح تقطع عقايل ربع خصمه إلى طاحي عقيدٍ يعزل إلى غزى ناقة المصلاح حفيده بفعله يستحق التبجاحي أبا اشكي عليك اللي ذبحني بغير سلاح وكواني بمرقاع كواياه نجاحي وحذفني بوسط البير من طفة اللولاح تحملت مع جور الزمن حمله الفاحي تشفقت شوفه والبلا من حصاة رزاح ولا أدري حصات رزاح وشلون تنزاحي عقب راح كن الدار سكانها الاشباح غريبٍ مريبٍ في مسايه ومصباحي أراجي وصوله مثل مايرجي الفلاح نباتٍ شقاه ومكسبه فيه متواحي عسى الله يرده من غيابه مثل ماراح لعل السنين تدوربه مثل الارياحي نظمت القصيدة مثل ماينظم المسباح على ماطرى لي وانت ماهر وسباحي على مبتداها من نسيج الحرير وشاح وعلى منتهاها عنبر العطر فواحي وأصلى واسلم عد مايثمر التفاح على المصطفى اللي بين الحق بيضاحي ـــــــــــ

- لاهبّني من يمة الشرق نسناس أخذت اكرر في ضميري سؤالي الليل هذا كن له صوت هوجاس؟ ينده معامييلي وصفرا دلالي وأنا ما ارد اللي ينادي على ساس ماني بـ مثلك يوم انادي تعالي ياغاليه وأن بان في عيني الياس وجهي ذبوله بان منه اختلالي عديت في راس الطويله وانا راس ماني بـ تبعٍ ماتعدا ظلالي في رحلتي مريت الأطلال عساس مرباعها قفرٍ من الناس خالي هبهابها يطرق على غصن يبّاس كن غيمها عن حال الاوراق سالي ان جيتها زوّدت في باسها باس تقول ثنّت حزنها من خلالي ياغاليه؟لولا الشعر وأحمر الكاس ماكنت أميّز بين عمي وخالي اسامر طيوفك على جال كرّاس غالي وسيّر له من الشوق غالي الجذع يشره لاكسر غصنه الفاس وشلووون ماشره لانحل منك حالي؟ أثر الرسايل تحمل شعور وأحساس مابين برد حروفها جمر صالي بان فمواريها بدر فوق جلّاس وبان فزواياها سواد الليالي فروقنا واجد لو الفرق ينقاس حتى ان تشابهنا بدا الفرق عالي! « أنتي ثلاث حروف من حولك الناس وأنا ثلاث حروف . . . لكن لحالي » - #عمر_الودعاني

وش عذرنا يا نجد يا دار الابطال وذكراك فـ الاسلاف بالقلب نبعه يامْا قطعنا فوق أراضيك الأميـال والذوْد رتعنـاه صلحه وسنـعْه وقمنـا وصلينـا جمـاعه بالإجمـال على رمـالك ذي سجـده ودمـعـه الرجل بالدسمـال والبنت بـجلال وسبحانك الله إثلاث في كل ركعه ندعي نبا الغفران من رب الأنفـال ونلح فـ اخر وقت من يوم جمـعه يا نجْد فيك أحرار شيبان وعـيـال نبطي ما نشكي من صحْاريك وجعه من حول ليا حولٍ رحايل ونـزال شـد بدوي ٍ بعد البرق _ نجعـه " إمن المؤسس لين تاليً الأجيال وحكامْك اللي هيمنوا فيك سبعه " وعلمك خفاق ٍ على رؤس الأطلال بهيبة اللي قيض صيفك ورجعه على الحبايب غيث ٍ يصب همال وعلى العداء بركانٍ يروع فجعه ال السعود محولة راس من طال أرض السعوديه ومن قام تبعه عاش الملك سلمـان حل ٍ وترحال وعاش الأمير محمد وعـاش جمعه يا موطني نفْداك بالـحـال والمـال وأمرك يا أمير الشرق طوعـه وسمعه عقُال مير إن عسكر الحرب جهال نجيب ما نبغيه ويجيب ربعه المملكه خط أحمر ٍ لكل من عال مال العدو لاقربها خط رجعه #علي_عيفان #السعوديه_العظمى_خط_احمر

وجـع وخسـارة الاب لا يعوض ، ولا ينتسى : #جمـال_الشمـري ، كالعاده أفضل من يوصف الصور بـ شعوره وأبداعه / بالهون يا غيم ٍ عروقه تزبّر آخـاف يبرد من غشانا سكوته هذاك والبرد الشمـالـي تجبّر ادفى على ريحة يدينه وصـوته وأقوم لامن قال : يا علّك أكبر البس / عشان أكبر : شماغه وكوته من غيبته يا غيم والعمر دبّـر ظنك تركت الوقت بفراش موته!

ولي خلوجً هايفت بي على النوح يا وين ربي جابني في وعدها جاوبتها بالنوح والصوت مبحوح لين اهجدتني يوم ربي هجدها انا تقول مصلب ً لي على لوح والناق صالبةً على عظم يدها اعول من الوجلا على مترف الروح والناق تعّول يوم قفى ولدها يا ناق كان الولف صايبك بجروح ماصابك اللي صابني منه وادها علي من ضيم النيا ميّل ورجوح وعلي هساتً كثيراً عددها منه السهر لين الدجاء يفضحه ضوح صبحً حناديس الغداري طردها ومنها لو الحظّار بمزوح وفروح قلبي مصد وخاطري ما يرِدها مع هاجسي كّني بغبة بحر نوح ولادري متى الشدّه تحلل عقدها ولولا دوجتي فالخلا وين ابروح يوم اتلهى بالحرار وهدها مع مهمهً قفرً به الشوف مبروح اتبع هوى روحً تقلص جهدها لا اصيح صيحة من لقى اخوه مذبوح في ساعةً حظّارها ما حمدها وحوّل عليه وقلبه مامعه روح وامه تلوى به قليلً جهدها #عبدالله_بن_عون

عليك ازكى السلام الي تسامى ياعديل الروح على نهج القصيد الي تجرى واشعل اشواقي مغبات الحياه تغيض جرح وتستثير جروح وانا لابارت الخطوه ثبت عظمي على ساقي اعاتب زلة الجارح واداري شرهة المجروح واخايل دمعة الفرحه عساها تسكن احداقي تجرعت التجارب واعتبرت ولا خذلت الروح انا الباني وانا الهادم وانا الداله وانا الشاقي اهمش نافذة همي واغني مع حمام الدوح وامل وجيه جلاس الرخا واستعذب اوراقي طراة العمر يوم أعلّي الهامه على الممدوح واحث النفس لـ العليا واتعب همة الراقي تدور الارض ولا ماتدور الارض يا مملرح عليك تردني كل الدروب .. وهقوة الهاقي اخالف ظني الي مايعدك لـ الحياه صروح واشوفك في سماي تبدد الظلما عن افاقي تعزف اوتار خفاقي لاغرد صوتك المبحوح يذوب الحرف ويزين الكلام بهمسك الراقي معك ماعاد ابالي والمشاعر في سماك تلوح على مبدى المقام الي حفظ قدري وميثاقي لك الله والشعور المعتبر مهمى يجي ويروح تراك انت الوحيد الي لاضاق يضيق خناقي تساميت بـ غلاك ولا ذخرتك للعنا والبوح وكافحت بـ طريقك لين بديتك على اعماقي رسية بـ غبة الطوفان لو ماني سفينة نوح على مرسى غرامك مستحيل احن خفاقي بقالي مابقى والنايحه لو تجتلد وتنوح لا تلبسك الظنون وتنتحي وتوثق فراقي واذا قفيت عاهدني واذا زل العهد مسموح وانا بـ أغيض عذالك على ميعادك الباقي ــــــ #مقرن_بن_حربي

معتري روحي طواري وضيقه وانزعاج ليت نفحات الحرم كل فجر تهبّها لاغدى فالنفس وحشه وفالصدر إلتعاج ما يهدّي .. روعها إلا تِودد ربها صارلي فتره وانا أبني من العزله سياج اريح لـ بير المشاعر " غيابة جبّها " اجتماعي رغم كره العزا وكره الزواج واجبات احبّ اهلها وهي ماحبّها لو وجودي عند بعض البشر مثل العلاج بعض الامراض الاطباء ما تعرف طبها ودي احافظ على اللي بقى لي من مزاج تطحن الايام .. روسٍ ما يطّحن حَبها ماوقفت لـ سود الايام وقفات إحتجاج ادري ان الثوره .. تشب فـ اللي شبها والعقول الفارغه ما يجي منها نتاج تنتظر فكره جديده .. عشان تسبها التغاضي والتعايش وقلّ الاحتياج الله اللي في قلوب العباد يصبها سامح من الرزق لا صار فـ اطراف العجاج حاجةٍ ما جات من طيب خاطر كبّها - جابر بن علوش

#مرشد_البذال رحمه الله | عزاه يا نفسٍ هواها جبرها كما جبر حر الظما مفْخِت الجيش ورّد عدود القوم ناسٍ خطرها يوم استغاب ويبّسن النشانِيش من حر لا هوبٍ بكبده سعرها شيّء عواره ينهش الكبد تنهيش هنى مرتاحٍ حياته شكرها من نشوته ما تل قلبه ولا نيش نفسه ليا عاسم هواها قدرها عن المحبة ناقلٍ قلب درويش ما ذاق لذات النفوس وكدرها ولا عذبنه ناقضات العكاريش نجل العيون اللي ملاحٍ صورها اللي غلاهن فتش القلب تفتيش إن لجلجت لك في سهاوى نظرها والهرج منها بالاشارة تناويش إن صافحت زم النهد عن نحرها وان شاهدت تجذبك خرس مراييش والله لو قلبك يقاسي صخرها إنّهْ هو المبسوط والين من الريش كل اللوازم سجها واختصرها نسى الوصاه وصار بالفكر تشويش والله لو له حاجة ما ذكرها وليا ذكرها فايته قال حتيش داوى بسكراتٍ على الله خبرها شهد تساقاه القلوب المعاطيش شهدٍ حلاته من عرفها ذكرها غيره دوا لمعذب القلب ما ميش في ساعة عند الثنين محضرها تسوى وتكفى عن جميع المعاويش اللي بنفسه كلمةٍ ما قصرها من الراس ما يحتاج كز المطاريش دارت مشاريهٍ بعيدٍ ضررها فتنات غيظٍ من قلوب هشاهيش أول دعاويهم كبارٍ عبرها من عظم وجلاهم تصور مداهيش وتالى دعاويهم تساهل قشرها بعذرٍ ونهتٍ حمش الكبد تحميش ليت المحبة ما تغير سيرها وإن الهوى يحجب عن النذل والديش يُفتَك من ناس غلطهم دمرها صاروا بها غزو مديد حواشيش

الشاعر #عبدالله_بن_عون مع هجعة اللي يختفون أول الليل الغايبه دايم يغيبون معها النفس تاقت للسمر والتعاليل والعين أشوف النوم خالف سنعها وطاب الجلوس بجانب النار ياشعيل وحط الحطب في ترعة ٍ من ترعها وإليا استوى للجمر فيها دحاميل وأقبل تواهجها وقفى ولعها درج على المحماس من غير تعجيل برية ٍ دوب اليماني قطعها أول قطاف سفوح شم الأقاذيل اللي جذا حوم الوحش عن فرعها شم يساقيه السحاب بهماليل لين يتحدر سيلها مع تلعها وترى لحمستها نظام ودواليل وشريعة يمشى بأثر من شرعها أول بدايتها مدافع مخاليل ومسرى جماميل ٍ بغالي سلعها وسوق ٍ كما سوق الجمال المحاميل مازال حموى النار ماقد لذعها وإليا تطلق من شذاها زعاجيل وبشت عرق واللون الأشقر نشعها فالحال سهلها عن النار تسهيل حتى لظى المحماس ما يدّرعها وغير لها يا شعيل مسرى الجماميل بطراد زلبات ٍ تزايد فزعها تدريجة الحيران ومطارد الخيل هذي طريقة حمسها واتبعها وعقبه تميلها على النجر تمييل جذاب روس القوم من منتجعها عوايد له من على سالف الجيل ماهي حديثه تونا نبتدعها ومن يوم تنعمها فدوك الدعابيل فوق أصهب اللون الربيب تهزعها وتضبط قياس الماء لها بالمكاييل ضبط الخبير لصنعة ٍ مخترعها ومن يوم تقطع خلها مثل ما قيل ترخي على هدفى السبيل مخذعها مبهارة ٍ تذعر بغالي التشاكيل طب العماس إليا تيسر تبعها صفرا كما القنديل حسنا تعازيل من صنعة رسلان الأول صنعها إليا دارها اللي يعتني بالمعاميل وفاحت وبالفنجال الأول ردعها وفيها تساوت خنة البن والهيل والنفس دافعها عليها دفعها قم صب لي ياشعيل منها فناجيل على سنا ضوء تهادى ولعها أظنها يامال طول التماهيل تقلع همومي كان ربي قلعها وتفتح لها أبواب بصدري مقافيل وتجمع لي أفكار ٍ تشتت ضيعها وآخذ بها عن ضيقت البال تبديل وصروف دنيا ما مشت مع سنعها دنيا تصيد بالشبك والمحابيل ناس تسايرها وناس تخدعها أحد تجي له بالرضا والتساهيل وهو لو تعب في جمعها ما جمعها وأحد ركابه مقفيات ٍ مقابيل ولاباب والا نافذة ما قرعها وتعطيه قاف إليا طمع بالمواصيل وينكف معيف وسامح ٍ من طمعها دنيا تقذل سبق الحر تقذيل وتوهنه في ربعة ٍ من ربعها لو قد مضى له من شقاها غرابيل يوم الحرايب مظلمات ٍ قطعها يوم الطلوع ابها على الهجن والخيل ما قد فهق عن طلعت ٍ ما طلعها ويوم استقرت وأغدقت بالمحاصيل صارت منافعها لمن لا نفعها عقبانها تمسي قوايا مواجيل والمستفيد غرابها مع مرعها واللي مسار أمورهم بالبراطيل واللي متى ما وافقت له بلعها ومن ذاق در المرزمات الأباهيل أما حلبها حلب وإلا رضعها وحصنيها يرقص على هزت الذيل ولو يجتمع قدمه سباع ٍ سبعها ولا عندنا ياشعيل للعوج تعديل مازال ممشاها على العدل أطعها ون شفتها قامت تجانف على الميل بأردى ثمن عند أول السوم بعها واستثن منها قومت ٍ بآخر الليل في حزة ٍ كل ٍ يحب يهجعها إليا جاء لثلث الليل الآخر تراتيل وقامت ملائكة الرضا قمت معها في ساعة ٍ تكبيرها والتهاليل يجنى ثمار عذوقها من زرعها وخل اجتماعك بالرجال الحلاحيل اللي خيار المجتمع مجتمعها ولا تبدي الشكوى ولو ضامك الشيل الا على رجل يحس بوجعها رجل إليا التفت عليك النشابيل أما شبرها شبر وإلا ذرعها واختار مفتاح ٍ للأرياء المقافيل روس العلا يرقيك في مرتفعها ومن الزمان اخذ العبر بالرحاحيل اللي منازلهم تهاوى بقعها يافجعتي لاجيت بعض المداهيل ولا شفت فيها عقب حي ٍ رتعها إلا رسوم دارسات ٍ مساميل وخرايم ٍ يزمى السراب بشمعها بلاقع ٍ شهب ٍ تهاوى زهاليل ألظّاهر أن اللي فجعني فجعها من عقب أهلها لو سقتها المخاييل مالله نفعها وبركتها نزعها لاجيتها جضيت من قلة الحيل ودنياي عندي ضاق بي متسعها على حلاحيل تضد الرجاجيل حصن ٍ ماعاد إلامقالع شيعها

الصدور أطرافها متراميه والليل هادي لا يروح الليل لين استنطقه وأخذ جديده كل ما سقت القدم بين المبادي والمبادي اعترضني طاري الشوق وخذيت الشعر بـ إيده ارتجل بالشّعر من الصيد من صهوة جوادي واعتق اللي من سهولة صيّدته كلاً يصيده لا خذتني غايتي وابطيت ياغاية مرادي والمسافة كايده والحب باقي له شريده احتريني والبسي لي كل لون إلا الرمادي الرمادي كل ما شوفه عرفت إنّه مكيده ودّي أضحك من بعد طول المعاتب والتمادي ضحكةٍ اللي يضحك من أدنى حاجه من حفيده زمّلنني من هواجيس الغياب اللا إرادي إن ذبحني طاري الفرقى وش أنتي مستفيده واعبري بي لا أغدي عادي وأنا مانيب عادي الحريص تورّده للموت غلطته الوحيده ياعنيده ما معي صبرٍ مثل صبر المهـادي لا تعذّرتي مثل عذر المعقد بالعقيده في رجى الله ما يخلّيني لجدي وإجتهادي ما رجيت إلّا وعده ولا خشيت إلّا وعيده لا استوت فعيونك الثنتين قربي وإبتعادي والظروف أقسى من الماضي على اللي يستعيده المصافح بالقلوب أصدق من مصافح الأيادي اسمحي لي كل يوم أصافحك وانتي بعيده لا تحاتين الظما والجوع في رحلة جهادي الحظوظ مقسّمه والذيب ما ياكل وليده شاعرك لا هاموا أصحاب الشعر في كل وادي مستعد يوقّف الدنيا على مطلع قصيده ——#صالح_النشيرا

رحم الله الشاعر الكبير #عبدالله_بن_زويبن : ياحبيبي صاب منزلك بالصدر انهيار وصرحك اللي قد بنيته وراك تدمّره اتفاخر في محبّتك لكن بختصار صرت مثل اللي يحصد الهوا ويغمّره كان باقي لي بمهجتك لو كبر الزرار اعتذر والمنزل اللي دمرته عمّره ياعيون اللي ليا ضفّ جنحانه وطار الدرابيل الجديده ماعد تذمّره ولا يطير الا ليا شاف له شوفٍ قرار ومخلبه في صدر برق الجناح يسمّره والشفايا جمرتينٍ تواهج وسط نار توّها من حرّ صلو اللهيب مجمّره انت كلّك نار تجمع بياضٍ مع حَمار تقل شمسٍ توّها للمغيب محمّره والنهود صغار والبطن هافي تقل غار والردايف بالثياب الطوال مشمّره والشعر يلمع على الضيّ من قوّ الشقار بشت اميرٍ توّ امير الرياض مومّره مثل ذيل اللي تطلّع حوافرها الغبار يوم جت من فوق جرف المسِيل مطمّره كل يوم تقوبعه سطل من وزر البكار وبالشمطري كل ليلة خميس تخمّره

الشاعر محمد شبيب الحداري الحربي، -رحمه الله-    لا والله الا راح دور البداوة   ودور الركاب اللي عليها الشنوفي  ومجالس  فيها لأهلها طراوة  عنها الشوايب والهزيل محذوفي  وراح الزمان اللي لعيشه حلاوة   واللي على الغارب رجع للردوفي  قالوا تسيّر قلت مامن فضاوة   قالوا علامك قلت عيّت ظروفي    اللي مضى بالنفس عنف وقساوة  واليوم تخلي كل عوجاً تطوفي   وتضحك مع اللي لك يكن العداوة   وان صفقوا صفقت له بالكفوفي   تخاف من دقة خطاة اللعاوة   رادي نصيب وناقر له علوفي  يزعل عليك اللي يسوق الأتاوة   وذلّوا معطرت النمش والسيوفي   عين الغضب تفتح عليك السماوة   وعين الرضا لوبك خطا ما تشوفي  والمرتفع قالوا مثل ذاك ساوه   وشربت غثاريب الغريف العيوفي   هداج مات وجات غيره جباوة   والروس قامت تدّرق بالكتوفي  يزعل ويرضا ما حصل له رضاوة   ومثله يصير بحيث تامن تخوفي