Sahar

سلام Rant صباحي خفيف من باب انه يطلع من السيستم ؛ مؤخراً يبدو لي أن حملات التبرعات و الدعم حلت محل ال financial planning لناس كتار شديد، فبقت الناس معاملة القروش دي كأنها ١- قاعدة و متوفرة طوالي، ٢- متاحة لأي سبب وطلب. في دائرتي القريبة الضيقة، شفت ناس عايزة يتجمع ليها قروش عشان تجدد ملابس اولادها، او عشان تعمل موافقات امنية لانه السودان ما نفع معاها، او تسجل ولدها في الروضة الخاصة عشان يكون مع اولاد اهلو بدل يمشي الروضة الحكومية، وصولاً لطلبات زي محتاج اجدد باقة الإنترنت و كريمات و زيوت شعر. حتى في التكية، عندنا الاسبوع الفات ولدين كشحو اكلهم في الشارع لانه ما عايزين عدس، بدون مراعاة لاحتمال ان في زول محتاج اكتر منهم، و بدون اعتبار للمجهود الاتبذل في اعداد و تجهيز الوجبة، و جمع تكاليفها. (حتى باقي الاولاد شاكلوهم طوالي) و برضو رسوم الجامعات الخاصة، إذا انت عارف سلفاً انك ما مستطيع تدفع مبلغ الرسوم دا، مافي اي داعي تسجل ولدك او بنتك في جامعة خاصة، معليش إذا كان مسجل من زمان و الحرب اثرت على الوضع فدي مفهومة و تستاهل ان الناس تقيف معاها، لكن ما منطقي ان خطتك أصلا تكون ان الناس حا تقيف معاي! ناس كتار مفروض يفهمو ان الدنيا دي فيها اولويات، و ان الحاجة المهمة بالنسبة ليك ما ضروري فلان التاني يشوفها مهمة. و برضو يفهمو ان الطلب دا مسؤولية، و بتترتب عليه حاجات كتيرة، اقلها المتابعة، و أعلاها -بالنسبة لي- هو الاثر النفسي بتاع المحاولة الفاشلة. و شكراً