عبدالله المفضلي

نصارع الدنيا على غطرستها نطلب عدالتها ولا عندها انصاف لين كشفت جرد السنين اقنعتها وبـانـت خـفـاياها على كل مشراف ناسٍ متون حظوظها شايـلـتـهـا وناسٍ تشيل حظوظها فوق الاكتاف #عبدالله_المفضلي #شعر

لاصار بالمجلس خبول ومهابيل وصارت سوالفهم غلاط ولجاجه اسكت ولا عندي على الناس توكيل او اتـركـه مالي بالاغـلاط حـاجـه والعزله افضل عن كثير التعاليل اليا رخص بيع الكـلام بـحراجـه #عبدالله_المفضلي #شعر

ترمي بنا الدنيا من الجال للجال مثل السكارى في حياة النكايد احلامنا من دونها ابواب واقفال وعزومنا مـنـهـا تـهـون الشدايــد بيضٍ نـوايـانـا على كل الاحـوال نفعل جميل ومرضي الناس كايد #عبدالله_المفضلي #شعر

قطبين السماء انا قريني كل ما عسعس اللـيـل زان السهر له وارتفع للـكواكب مابين قطبين السما الجدي وسهيل كن المـجـرّه في عيـوني مـواكـب الله لا يـجـزا الـهـواجـيس والـهـيـل ما كـنـهـا الا الـقـاز بالـنـار ساكب تسري شجون الليل مسرى المراسيل وترسي على بـر الــخيـال المـراكـب وانا الذي صادفت عوج العـراقـيـل انقل حمول الوقت فوق المناكب واجـنّـب الشرهه ضعوف الرجاجيل عزومهم تـشـبـه بيوت الـعـنـاكـب #عبدالله_المفضلي #شعر

غيب الايام يا راسي اللي كل همٍ يـرسه مع اقتراب الليل حزة حلوله (لو عندنا من غيب الايام رسه) قد قيل قبلي واعترف به واقوله جنبت دربٍ فيه نقص ومحسه و تركت بابٍ محكماتٍ قفوله ونصيت كنزٍ كل ناجح يعسه ويرجع يدرج بالفوايد حموله ما يرجع الصقّار يومي بدسه مضيّعٍ طيره و نفسه زعوله #عبدالله_المفضلي #شعر

اي والله ادري مار ما كني ادري إلزم حدودك وانتبه.. يدك والحار مقابر اسرار المعارف بصدري واموت ما بيّحت سر من الاسرار اراقب ألفاظي ولا اهين قدري وش قيمة الرجّال لا صار ثرثار #عبدالله_المفضلي #شعر

تلدغني الدنيا من الناب للناب وانا خطاي اني بليّا خـطـيـه كم هقوةٍ ماتت على عذر كذاب وكم ضحكةٍ بالوجه ماهي بـريه #عبدالله_المفضلي #شعر

(احجار العقيق) يستثار الشعر والمارد يفيق بوح روح وفيض في رحلة فكر ابني الاهرام بأحجار العقيق واختصر كل المعاجم في سطر ان سبقني بالجنون ابن زريق اخـتـلـفـنـا بالزمان وبالسفر كان انا قلت آه من جرحٍ عميق اعذروني سلّم الله من عذر و كان همي عبد؟ .قولو له عتيق معتقه ما ابيه جيّاب السهر حايرٍ مذهول في وادي سحيق للسباع وللـكـواسر فـيـه اثـر في مضارب غربتي ضاع الطريق داهـمـه ريح الـبـوارح وانـدثـر لا طريق ولا صديـق ولا رفـيـق ما سوى عصف الهوا بأرضٍ قفر من يقول الارض بأبنادم تضيق؟ لين صارت دار حبس ولا مفر علقم الايام بأكواب الرحيق يمنح الانسان تصميم وصبر اكفخ الجنحان يالحر الطليق الزمان دروس للناس و عبر كل حرٍّ ماعشق قمة طويق والله انه خاب لو عاش الدهر قال واحد كان لي مجدٍ عريق قلت كان و كان ميّت في قبر ياضعيف العزم والناصح شفيق خل قلبك مثل جلمود الصخر تخدع الابصار يالغصن الوريق ما دريت انك ضريع بلا ثمر كنت امارس حق قانون الرقيق للهقاوي لين صارت في خطر موتة الهقوه بصّده من صديق طـعـنـة الايـام غـدرٍ بالـظـهـر قلبي اللي حمّله ما لا يطيق حظي العاثر غرابيل و كدر ليه سلمى ما تنزّل للعشيق لو تكون الروح لرضاها مهر صابرٍ والجوف به جمر الحريق جعل جمر الجوف يطفيه المطر اتعلّق بالسبب مثل الـغـريـق مؤمنٍ بالله واحــوال الــقــدر #عبدالله_المفضلي #شعر

يامال فرقى العين يا قرب الانذال اللي تـحـدّك للردى وانت طيّب الناس تخدعها المظاهر والازوال هـيـاكلٍ لـكـن مـداهـا قـريـّب #عبدالله_المفضلي #شعر

(الجوهره) نار الطموحات مس القلب صاليها والنفس ألبّي طلبها يوم واعصاها لي حاجةٍ يشغل الخفّاق طاريها استوطنت في صميم الذات رجواها الجوهره غاليه والناس تغليها لكنّها كايده للي تـمـنّـاها ادلجت هجن العزايم في حراويها من كثر شوقي لها خفت اتعدّاها اسعد بها حلم واملكها واخفّيها واشقى بها علم واخشى الناس وارعاها اشيلها هم و اخذ وجد واعطيها واسري لها الليل واروى شوق واظماها واكتب لها بيت شعرٍ هايمٍ فيها واصبّها كيف عاشق واتقهواها و ارسم جسور الامل بالفكر وابنيها واغيّر الخارطه و اهد مبناها وابيع غير الكرامه بيع واشريها واعاند ظروف وقتي واتحداها احلى القصايد على المقصود اغنيها واحلى المشاوير ما وصّلني حماها بانت نجوم السما لعيون ساريها لولا ظلام الليالي ما نظرناها ياحادي العيس لالا ما انت حاديها قدّامك دروب ما تعرف خفاياها ارجوك تعطي سهام القوس باريها من كان له صنعةٍ لابد يـهواها ما همنّي ناس تسبقني بأمانيها طلّابة الهون ما تغفر خطاياها #عبدالله_المفضلي #شعر

( الشمال امطار) الشمال امطار والاجواء جميله التمشّي فيه وصٰفـه للتعـافـي كل ماهب الهوا ينعش عليله المزاج بنفحة الذعذاع صافي بالشمال انا المـعـزب والدليلـه والطيور وصحصح البرّان كافي كيف ما يطرب ولا يشفي غليله الغريب اللي له الصحرا منافي صابرٍ صبر الجمل لازاد شيله من ثقيل الشيل تلحاه الظلافي نظرتي حول المراقيب الطويله كل مقصد دونها ماهوب كافي الردي واللي مـحـاريفه هزيله لا نشدني قلت له مابي خلافي كان عز النفس بالدنيا فضيله ما ترجّينا العطا من كل هافي الحياد وكل واحد في سبيله ماحرصت اعرف خفا ماكان خافي #عبدالله_المفضلي #شعر

( شمس الحقيقه) انا وين يا شمس الحقيقه ودربي وين غريبٍ متاهـة غربته قطعّت سبله يعيش الامل يومين ويموت عشر سنين بشاير تجي بعده والاخرى تجي قبله تموت الظنون وينتظر رجعها في حين ولازال بـديـار الـعـنـا مـبـعـدٍ شـبـلـه يخيل السحاب وترتفع فرحة المظمين تزيحه رياحٍ عاتـيـه ما خسر وبـلــه سمعنا بحظ فلان ويقال ابو حظين فروق الجوازي راتعه مع طياح إبـلـه ولو كان وصفه من صنوف البشر مسكين يصيد الطرايد من ورى الضلع في نبله قصير الروابع تابع العالم الماشين الى جاد حظه مع هل البيع يكسب له الا يازمان الظلم تضحك لابو وجهين وابو كلمةٍ عوجا وابو شوفـةٍ خبله على راس ابو مره يرفرف غراب البين خبيث النوايا ما له حساب يحسب له على الشهرة القشرا كثير البشر حرصين وعلى الصوره اللي بالفلاشات منهبله يلمّع بشوت اهل الملايين بارد عين ولو قالوا يصلي صـلاةٍ بـلا قـبـلـه انا عزلتي راحة ضميري عن الواشين سبيل الرجا بالله وانا قاضبٍ حبله تحرّص على رجلك عن افعى وعقرب طين ترى الناس غير الناس يالغافل الابـلـه #عبدالله_المفضلي #شعر

(محطات الارصاد) يشوقني نوح الحمام وهديله وانا بحضوة كيف والسهر معتاد فنجالٍ اشقر زايدٍ قوس هيله والليل ونجوم السما جمع وافراد يغيب فكري في مسافه طويله وافيق والقى الشعر بالفكر ينقاد مجنون وبكفّي زناد وفـتـيـلـه عـاقـل ولا عندي فتيله ولا زناد هاذي حياتي واعتبرها فضيله فقير واغنى شخص ما جامل اضداد وين اتجاهك يالغيوم الـثـقٰـيـله ماجابت اخبارك محطات الارصاد سوقي سحابك للديار المحيله لك والعطاشا والملاهيف ميعاد يخيلك اللي ساهرٍ طول ليله هم وغثا بال وهواجيس وسهاد الوقت غاراته جسام ومهيله هولٍ يبث الرعب بأرواح وجماد يسلم به الكافر ويسجد نفيله ويكفر به المسلم على روس الاشهاد مات الوفا بأيدين الانذال غيله والناس بالدنيا ضحيّه وجلّاد على شخوص الارض ضاع الدليله منجوم والّا صايبه غيض وعناد عين الرضا عن كل عيباً كليله (قبلي يقوله شاعراً بأمّة الضاد) #عبدالله_المفضلي #شعر

( الوسم) يذكرون السيل من حايل تحدّر انهمر وبله على رفحا ولــيــنه بــين جبهات الهوا سيّل وغدّر كن برقه ريش فرخٍ شابكينه كان وبل الوسم هذا العام بدّر غيث من يفرج نوايب طالبينه ينتعش به كل مــهــمــومٍ مكدّر ماصفت دنياه في ماضي سنينه شاعرٍ يـرسم بنات الفكر نـِدّر بين عقل و جن لا لجلج قرينه شفّة الفنجال والشاي المخـدر وسط روضً داعب الغربي خنينه تشفي المجروح من همٍ تصدّر والــنـفـوس بما يشوّقها رهينه البشر محكوم بالحكم المقدر ساعـةٍ يفرح بـهـا ساعه ثمينه #عبدالله_المفضلي #شعر

(سيوف المشاريه) طارت بي افكاري ولجلج قريني الطيش يدعيني وانا اقول لبّيه لو ما اتعوّذ من بليس اللعيني خاويت فكري للمتاهات والتيه صبري قضا والصعلكه تحتريني لكن حرام الحر يخلف مباديه حرٍ طليق وفي شعوري سجيني سجنٍ بلا حارس همومي مبانيه كني رهين وعايش المحبسيني يبخل عليه اللي بدربه يقدّيه اكتب روايات العذاب بيديني وارسم متاهات السراب ومظاميه واقرا قصيد السامري والهجيني والحّنه لحن التعاسه واغنّيه عاقل واجاري كل عقلٍ فـطيني مجنون جاهل يطفي الشمع بايديه مات الطموح اهمال قدام عيني مات الطموح العام واحاول احييه سكرت والسكره خذت بي سنيني صحيت لكن ضيّع الركب حاديه مضمون همس الروح للاصغريني همٍ بقلبي ينعش الروح طاريه اشري بعمري رفقة الطيبيني اللي لهم بطيور سنجار تشبيه واقدّم الطيّب على القادميني واللاش اورّيه الجفا خاب راجيه بلسان حال فلان لا تـطـعنيني اشوي رحمه يا سيوف المشاريه شرهة عزيز الناس فوق الجبيني تـاجٍ تشـرّفـنـي مشاريه راعيـه والشرهه اللي من لئيمٍ تجيني والله يبطي عظم ما جيت ارضّيه من يبذل المجهود عذره سميني هذا هو المعروف بأسما معانيه لوم وعتاب ولا تزحزح يقيني ماني مسوّي شي ماالله مسويه ما ني نبي الله عصاي بيميني اهش به على الثعابين وارميه عانيت هـمٍ بـاح منه الكنيني و ان راح جا الثاني و رديت اعانيه #عبدالله_المفضلي #شعر

الوطن اولاً واخيراً (حنا هل العوجا ولابه مراواة) (شرب المصايب مثل شرب الفناجيل) (ما ينفع الخايف والايام عجلات) (والذل ما ينفع ولا القال والقيل ) هذا فهد بقلوبنا حي مامات له سيرةً يقرا بها جيل عن جيل و اخوان نوره باحتدام الملمات فيهم على كل الزعامات تنفيل واليوم سلمان الفخر والبطولات مليكنا قطّاع روس الاباطيل وولي عهده والمواقف رفيعات على ابرهة صنعا مثل طير ابابيل محمد ولد سلمان رمز النجاحات على فعوله يوصفون الرجاجيل بالشرق الاوسط وارتفاع الصراعات يبقى هو المقصد وملفى المراسيل اقدم ياخو نوره بذبح العصابات حتى يجيهم ماجرى لاهل الفيل مع العصابه ما تفيد السياسات الا بضرباً منه تشفى المغاليل الشعب من نجران لين القريات كل جيوشاً لك يجونك زعاجيل على العهد وافين ماهي دعايات احفاد من معكم على الهجن والخيل #عبدالله_المفضلي #شعر

( قليل العرف) ياسيّد الكتمان بعد السكوت إحك فضفض وبوح الروح داعي وناسه لو تخفي شعورك ملامحك تفضحك العلم شوف العين ماهي فراسه دايـم تصنّع وفضحنّك ملامحك ومثلك صبورٍ كان صعبٍ مراسه حاول تبدّل صرخة الغيض بالضحك اخفى الحقايق تنتهجها سياسه قل يازمن مشكور والله يسامحك من عاش بك لا تختبر قو باسه تقفي وتلقى الهم بالدرب ينطحك هـذي هـي الايـام جـور وشراسه كلمة قليل العرف بالقلب تجرحك لو هو صديق ولو غشى الشيب راسه لا صار جاهل لو مرامه يمازحك كدّر وعكّر صافي الما و حاسه وجهٍ يحسّسك السعاده ويفرحك و وجهٍ يجمّع لك هموم و تعاسه ميزان عقلك بالمجالس يرجّحك ان ما ارتفع سهمك سقط بإنتكاسه ترى الرفيق اللي بسره يصارحك واجب تحرس اسرار قلبه حراسه ان جاك ذم من الردي لا يزحزحك مذمة الناقص شـهـاده دراسه في سوق خاسر لا تعدّد مرابحك قالوا عمار الدار من قو ساسه #عبدالله_المفضلي #شعر

الاخلاق التجاريه انا لي ايـام واخـلاقـي تـجـاريـه واضحك مع الناس كني صافيٍ جوي مدري هي ظروف والا اعراض نفسيه او عثرةٍ بالقدم و الدرب مـتـلـوّي اديـر الافـكـار والدنيـا ظـبـابـيـه منجوم عز الضحى مدري وش اسوي شواهد الـوقـت بعيوني رماديـه والدرب بالوصف مثل الداب متطوي ازرع ورود الامل في صادق الـنيـه واقبر صراعات نفسي واظهر هدوي و احـرر سبوق فكري باحـتـرافـيـه واكثّر الـبـوح في معناي واشوي اذبح فدي لا حصل فكره جنونيه تشفي غليلي وبيت الشعر متروي #عبدالله_المفضلي #شعر

(نجوم المجرّه) سهران ونجوم المجرّه مدابيح يم المغيب ومقدم الفجر لايح وقتي بحر وهموم بقعا سبابيح وانا مع الافـكـار مقبل و رايح اودّعك يا مرافق الركب تصريح بثّه لقومٍ يحسنون (النصايح انا الغريب اللي تصافق به الريح هوج الهبايب والهقاوي شحايح وانا الجريح اللي شكى للمجاريح وانا الحزين اللي طعونه جوايح اشعلت للاحلام شمع ومصابيح واهديت للقرطاس فيض القرايح وانا الذي صدّق دموع التماسيح وانا الذي حارب كذوب المدايح الصبر لـقـفـول الليالي مفاتيح عن عثرةٍ يـفـرح بـهـا كـل دايح ولولا الرجا ما يزرعون الفلاليح ولا يـنـثـرون آمـالـهـم بالفلايح اصارع الايام واقوم و اطـيـح ولو طحت اقوم وكن ما كنت طايح العلم قرضة ملح . شاره وتلميح وترديد بعض الهرج لوم وفضايح #عبدالله_المفضلي #شعر