श्रद्धाञ्जलि, समवेदना र व्यावहारिक साथ . साथीहरू, वसन्त प्रकाश उपाध्याय हामी सबैका साथी हुनुहुन्थ्यो। लामो समय पत्रकारितामा बिताएका वसन्तजीको जीवनको अन्त्य यसरी होला भनेर कसले पो सोचेको थियो र! तीन महिनासम्म बेपत्ता रहेका उहाँ मृत अवस्थामा भेटिनुभयो। अहिले उहाँको परिवार भावनात्मक र व्यावहारिक दुवै हिसाबले निकै अप्ठ्यारोमा छ। वसन्तजीकी श्रीमती इन्दिराका दुवै मिर्गौला फेल भएका छन्। उहाँले हप्तामा दुई पटक डायलासिस गराउनुपर्छ। बसिरहेको घरसमेत छाड्नुपर्ने अवस्था आएको साथीहरूले बताएका छन्। छोराछोरीको पढाइ रोकिएको छ। दैनिक जीवनका ससाना अभाव र अप्ठ्याराको त हिसाबै छैन। तीन महिनासम्म श्रीमान् फर्किने प्रतीक्षा गरेको परिवारले उहाँलाई मृत अवस्थामा पाएपछि अब के गर्ने भनेर सोच्न सक्ने अवस्था पनि छैन। त्यसैले यो सानो अपिल। वसन्तजीप्रतिको समवेदना र श्रद्धाञ्जलीमा मात्र सीमित नरही, उहाँको परिवारलाई व्यावहारिक रूपमा साथ दिनेतिर चालिएको एउटा सानो कदमका रूपमा यसलाई लिऔँ। वसन्तजीका छोराछोरीले पढाइ जारी राख्न सकून् र इन्दिराजीको उपचारमा थोरै भए पनि भरथेग होस् भन्ने हाम्रो उद्देश्य हो। सहयोग गर्न चाहने साथीहरूले उहाँका छोराको नाममा रहेको QR मार्फत आफूले सक्ने रकम पठाउन सक्नुहुन्छ। रकम सानो–ठूलो हुँदैन। यस्तो बेला जति सकिन्छ, त्यति नै ठूलो सहयोग हो। वसन्तलाई सम्झौँ। एक पटक उहाँको परिवारतिर पनि हेरौँ। धन्यवाद। थप अपिल यो सन्देशलाई यहाँ ट्याग हुन नसकेका र तपाईंले वसन्तजीका साथीका रूपमा चिनेका अरु साथीहरू समक्ष पुऱ्याउनुलाई पनि उहाँको परिवारलाई साथ दिने एउटा कदमकै रुपमा लिइदिनुहोला।