SONVILLAGE

Nagpasya ang #KorteSuprema na maaaring magsagawa ng sariling imbestigasyon ang Office of the Ombudsman kahit nagsasagawa rin ng hiwalay na imbestigasyon ang Commission on Audit (COA) hinggil sa parehong mga pangyayari at transaksiyon. Hindi kailangang hintayin ng Ombudsman na matapos ng COA ang pag-audit nito bago imbestigahan ang posibleng maling gawain ng mga opisyal ng pamahalaan. Sa Desisyong isinulat ni Associate Justice Maria Filomena D. Singh, pinanagot ng En Banc ng Korte Suprema si Ronelo O. Del Socorro at iba pang dating opisyal ng Pamahalaang Panlalawigan ng Palawan sa mga iregularidad sa paggamit ng bahagi ng lalawigan sa Malampaya Fund. Nag-ugat ang mga kaso sa pagpapalabas ng PHP 2.572 bilyon galing sa Malampaya Fund para sa mga proyektong pangkaunlaran sa Palawan. Sa halagang ito, PHP 966 milyon ang inilaan sa lalawigan para tustusan ang mga proyektong may kinalaman sa electrification, programang pangkalusugan, edukasyon, at imprastraktura. Kasunod ng isang espesyal na pag-audit ng COA, naghain ng apat na reklamong administratibo sa Ombudsman laban sa mga opisyal ng lalawigan dahil sa umano’y mga iregularidad sa pagkuha ng mga kontratista at pagpapatupad ng mga proyekto. Kabilang sa mga alegasyon ang hindi sapat na paglalathala at paglalagay ng mga paanyaya sa pag-bid, hindi wastong pagsusuri sa pagiging kuwalipikado ng mga bidder, at pagbigay ng mga kontrata sa kabila ng kakulangan ng mga kinakailangang dokumento. Binanggit din sa mga reklamo ang pagtatalaga sa iisang tauhan sa maraming proyektong may magkakasabay na iskedyul, kakulangan ng mga dokumentong sumusuporta sa mga disbursement, at mga ulat ng nagawang trabaho na hindi tumpak at nagpapalabis sa antas ng pagkakumpleto ng mga proyekto, na naging batayan ng pagbabayad sa mga kontratista. Pinagtibay ng Korte Suprema ang pasya ng Ombudsman na may pananagutan sa administratibo ang mga opisyal. Tinanggal sa serbisyo ang mga opisyal at habambuhay silang diniskwalipika na humawak ng anumang posisyon sa pamahalaan, pati na rin ang kanilang mga benepisyo sa pagreretiro. Ayon sa Artikulo XI, Seksyon 13(1) ng Konstitusyon ang Ombudsman ng kapangyarihang mag-imbestiga, sa sarili nitong pagkukusa o batay sa reklamo, sa mga kilos o pagkukulang ng mga opisyal ng pamahalaan na lumilitaw na ilegal, hindi makatarungan, hindi wasto, o hindi mahusay. Paliwanag ng Korte, magkahiwalay at malayang ginagamit ng Ombudsman at COA ang kani-kanilang kapangyarihan. Habang sinusuri ng COA ang paggamit ng pondo at mga transaksiyon ng pamahalaan, iniimbestigahan naman ng Ombudsman ang posibleng maling gawain ng mga opisyal ng pamahalaan. Maaaring makatulong sa imbestigasyon ng Ombudsman ang mga natuklasan ng COA pero hindi ito nagtatali sa Ombudsman. Sinabi ng Korte na maaaring ipagpatuloy ng Ombudsman ang sarili nitong imbestigasyon kahit hindi pa pinal ang ulat ng COA na tumatalakay sa mga katulad na alegasyon. Dagdag nito, wasto at maagap na inimbestigahan ng Ombudsman ang mga reklamo laban sa mga opisyal at tinukoy ang kanilang pananagutang administratibo batay sa mga ebidensiya. Binigyang-diin din ng Korte na hindi lamang umasa ang Ombudsman sa ulat ng pag-audit ng COA. Malayang sinuri ng Ombudsman ang mga reklamo at mga kalakip na dokumento kabilang ang mga rekord ng bidding, kontrata, ulat ng inspeksiyon, mga resolusyon ng Bids and Awards Committee, at iba pang kaugnay na rekord. Basahin ang press release sa sc.judiciary.gov.ph/?p=17526…. Basahin ang Desisyon sa sc.judiciary.gov.ph/?p=17526…. Sumunod sa Credit Attribution Policy ng SC PIO: sc.judiciary.gov.ph/credit-a…. #SupremeCourtPH #SCphTranslations