𝓓𝓲𝓭𝓪

21 سنة من عمري🤍 سنين عدّت بكل تفاصيلها، بحلوها ومرّها، بكل لحظة خلتني أكبر وأفهم نفسي والحياة أكتر. أتمنى تكون سنة مختلفة مليانة راحة، نجاح، حب، وضحك من القلب يارب أحقق فيها حاجات كتير نفسي فيها، وأفضل دايمًا فخورة بالشخص اللي بقيت عليه. كل سنة وأنا بخير💗🦋 Happy 21 to me🎂🤍

لما الكل يحتاجك في نفس الوقت، وتلاقي نفسك بتحاول تراضي ده وتحتوي ده وتطمن ده، وإنتِ أصلا مش لاقية فيكي طاقة ليكي، بتكتشفي إن أصعب حاجة مش إنك تشيلي هموم الناس، أصعب حاجة إنك تشيليها وإنتِ محتاجة حد يشيلك.

اتواجهت بعيوبي كتير، واتقالت في وشي لحد ما لمعة عيني انطفت وأنا بتكلم عن الحاجات اللي بحبها. بس كل ما احتاجوني لقوني، وفضلت أخبّي وجعي عنهم، لحد ما بقيت بعامل نفسي بنفس القسوة اللي عاملوني بيها.

«ومشيت وما لقيت ولا بر أمان».. يمكن أكتر حاجة موجعة إنك تفضل تمشي من مكان لمكان، ومن شخص للتاني، لحد ما تفتكر إنك أخيرًا لقيت أمانك، سواء في إنسان أو بيت أو حتى ذكرى، وبعدين يصدمك الواقع إن اللي افتكرته نجاتك كان مجرد اختبار جديد لقدرتك على التحمّل.

نفسي أبطل أخاف من كل حاجة، حتى الحاجات اللي ممكن تكون خير ليا. تعبت من خوفي اللي بيخليني أكره كل حاجة قبل ما أعيشها، بالرغم إني بدعي ربنا دايمًا يبعد عني الأذى، بس لسه بخاف.. ولسه مش عارفة أطمّن قلبي.

أصعب حاجة إنك تغار وتزعل وتغضب على شخص مبقاش ليك، ويمكن عمره ما كان ليك أصلًا، وكل المشاعر دي جواك وهو ممكن يكون مش واخد باله إنك بتحاربها عشانه.

يوم 6 أكتوبر بيفضح قد إيه إحنا المصريين كدابين طول السنة بنقول عايزين نخرج من البلد ونعيش برا، وييجي يوم زي ده نفتكر قد إيه ترابها غالي علينا، وقد إيه الأرض دي مش مجرد أرض… دي تراب كل مصري عافر وضحّى علشان يرجّعها. كل سنة ومصر عزيزة، وكل سنة وإحنا فخورين بتاريخها 🇪🇬❤️

ربنا مرزقنيش بأصحاب كويسة ولا حياة مثالية، بس عوضني بنِعم كتير، والحمد لله على نعمه اللي لا تُحصى. ممكن ياخد منك حاجات كتير، بس يعوضك بشغل، بحياة كريمة، بزوج أو زوجة صالحة أو عيال كويسين. ربنا مش بياخد منك كل حاجة، بالعكس.. بيديك حاجات تخليك تحمده كتير. 🤍

وانتوا طيبين جميعا تسلمولي🥹💗🦋

النوم المتقطع ده أسوأ حاجة عمومًا، عامل لك مشاكل مع الناس وإنت أصلًا لا بتنام كويس ولا بتفوق كويس. تحس إنك بتاخد نومك الطبيعي على فترات متقطعة، فتفضل طول اليوم مرهق ومش مستوعب حاجة. مؤذي بشكل بشع.

وجع القولون مش وجع بسيط، ده ممكن يستنزف الإنسان لدرجة إنه ميبقاش قادر يستحمل ذرة ضغط زيادة. فلو لقيت شخص بيعاني منه ووقت زعلك بيتلاشى أو بيتجاهلك، متقللش منه؛ افهم إنه غصب عنه، هو أصلًا مش قادر يستحمل نفسه من الوجع، فما بالك بضغط جديد.

أنا ضد الصداقة الثلاثية بجد، مش عشان التلاتة مينفعش يحبوا بعض، لكن لأن محدش لازم يكون وحش عشان حد فيهم يتوجع؛ أحيانًا مجرد إن اتنين بينهم انسجام أكبر كفاية يخلي التالت يحس إنه واقف على الهامش.

النصيب مش دايمًا بيجيبلك اللي نفسك فيه، ساعات بياخد منك أكتر حاجة كنت بتتمناها، ويعلّمك بالطريقة الصعبة إن مش كل اللي قلبك اختاره كان خير ليك، وإن اللي وجعك يوم يمكن يكون هو نفسه اللي نجاك.