يمكن هالرأي ما يعجب الكثير، بس والله أشوفها حقيقة:
فيلم Black Panther 2 أفضل من الجزء الأول، وبفارق بعد
مراجعة فيلم | Primetime
مو كل فيلم يشارك فيه ممثل نحبه يعني إنه بيكون عظيم، ولا يصير نمدح فيلم ونتجاهل عيوبه عشان ممثلنا المفضل موجود فيه. بالنهاية الفيلم ينحكم عليه من قصته وتمثيله وإخراجه، مو من أسماء الممثلين.
كنت متحمسة جدًا لفيلم Primetime، خصوصًا بعد منعه من العرض في الدول العربية، وكنت مستغربة وش فيه عشان ينمنع، لكن بعد ما شفته فهمت السبب.
بدايةً، القصة كانت رهيبة. فكرة إننا نشوف الجانب الآخر من برنامج To Catch a Predator، وكيف ممكن تتحول قضية هدفها حماية الناس إلى وسيلة للشهرة وجمع المشاهدات، عجبتني جدًا. لكن للأسف، التنفيذ ما كان بنفس قوة الفكرة.
التصوير كان خرافي، خصوصًا الألوان والإضاءة اللي رجعتنا لأجواء 2006، والموسيقى كانت ممتازة بعد. أما التمثيل فما عندي عليه أي انتقاد، روبرت باتينسون قدم أداء عظيم بشخصية كريس هانسن، وسكايلر جيسوندو كان ممتاز بدور دان بلوم، وحتى بقية الممثلين كانوا على مستوى عالي.
لكن مشكلتي الأكبر مع الفيلم هي طريقة استغلال المشاهد. كل ما تبدأ إحدى عمليات الاستدراج ونوصل للمواجهة اللي ننتظرها، فجأة ينتهي المشهد وننتقل لشيء ثاني. طيب ليش الاستعجال، خلونا نشوف الحوار كامل وكيف كريس يواجه الشخص بالأسئلة وكيف يحاول يبرر لنفسه.
وأكبر مثال مشهد المواجهة داخل المنزل مع العجوز المتحرش. والله توقعت بنشوف واحد من أقوى مشاهد الفيلم، خصوصًا مع التمثيل الممتاز من الطرفين، لكن فجأة انتهى المشهد. عندك ممثلين بهذا المستوى ومشهد مليان توتر، ليش ما تستغلونه وتعطونه وقته.
والغريب إن الفيلم يستعجل في هالمواجهات، لكنه يطول في قصص جانبية ما تستاهل، مثل سالفة تواصل شبكة ABC مع آندي. كان ممكن يختصرونها ويعطون وقتها للمشاهد الأهم.
وهذا اللي خلاني أحيانًا أستمتع بشكل كبير وأحيانًا أحس بالملل. فيه مشاهد ما كنت أبيها تخلص، وبعدها تدخل أحداث بطيئة لدرجة إني مرة وقفت الفيلم ورحت أسوي لي شاهي ورجعت أكمل.
وبخصوص النهاية، كنت متوقعة شيء أقوى بكثير. الفيلم طول الوقت يرفع توقعاتك ويجهزك لأحداث كبيرة، لكن بالنهاية ما حصلت على الشيء اللي كنت أنتظره، وحسيت إنهم ما عرفوا كيف يقفلون القصة بالشكل اللي تستحقه.
ومع كل هالانتقادات، استمتعت بالفيلم جدًا، وأشوفه ممتاز ويستحق المشاهدة. عنده قصة قوية وتمثيل عظيم وتصوير وموسيقى ممتازة، لكن السيناريو وتوزيع الوقت بين المشاهد والنهاية منعوه من إنه يكون أفضل.
باختصار، Primetime كان يقدر يكون من أفضل أفلام السنة، لكن ضيع فرص كثيرة كانت بتخليه أقوى بكثير. أحب روبرت باتينسون وأشوف أداءه يستحق الإشادة، لكن هذا ما يعني إني أتجاهل عيوب الفيلم عشانه.
تقييمي للفيلم: 8/10
شيء ما يلوح في الأفق…🚨🚨🚨🚨🚨🚨
بعد قرابة 11 شهرًا على نهاية Stranger Things، تم رصد كاليب ماكلاغلين وفين وولفهارد هذا الأسبوع في شيكاغو أثناء تصوير مشاهد مجهولة في الشوارع وإحدى المدارس، واليوم تم رصد نوح شناب وهو يصور أيضًا.
حتى الآن لا يوجد أي إعلان رسمي، لكن الغريب أن بعد يومين، وتحديدًا 6 نوفمبر، يصادف اليوم العالمي للمسلسل.
هل هناك مفاجأة يتم التحضير لها؟
فيرميني retweeted
🚨 رمضان 2027 يجمعنا مع الأساطير! 🧟♂️🔥
الموسم الرابع والأخير من The Walking Dead: Daryl Dixon، أحد مشتقات The Walking Dead، قادم في فبراير 2027!
داريل وكارول في رحلتهم الأخيرة نحو الوطن.. متحمس بشدة! 💔
#DarylDixon
باقي 52 يوم فقط على عرض مسلسل Harry Potter🪄
مواعيد عرض الحلقات المتوقعة:
• الحلقة الأولى: 25/12/2026
• الحلقة الثانية: 01/01/2027
• الحلقة الثالثة: 08/01/2027
• الحلقة الرابعة: 15/01/2027
• الحلقة الخامسة: 22/01/2027
• الحلقة السادسة: 29/01/2027
• الحلقة السابعة: 05/02/2027
• الحلقة الثامنة والأخيرة: 12/02/2027
غالبًا المسلسلات اللي ما تعجبني من أول مشاهدة، تتغير نظرتي لها لما أعيدها.
ومن بكرة قررت أعيد مسلسل Daredevil وأعطيه فرصة ثانية🤩
فيرميني retweeted
عاااااااااجل 🚨🚨🚨🚨🚨🚨🚨
تم اختيار الممثل بن وانغ لتجسيد شخصية آيس مان في فيلم X-MEN الجديد 🚨🚨🚨🤯
مراجعة فيلم | Dune: Part One
مع اقتراب المواجهة المنتظرة بين Dune: Part Three وAvengers: Doomsday يوم 18 ديسمبر، قررت أرجع لسلسلة Dune وأشوف بنفسي ليش الناس متحمسين لها بهالشكل، خصوصًا إن فيه ناس من الحين متوقعين إن الجزء الثالث بيتفوق على أفينجرز. لكن خلونا نتكلم عن الجزء الأول وبقول لكم رأيي فيه بكل صراحة.
ببدأ بأكثر شيء أزعجني في الفيلم، وهو الساعة الأولى. والله ما أبالغ لما أقول إنها كانت مملة بشكل مو طبيعي، لدرجة إني كنت أنتظر أي حدث يخليني أندمج مع القصة. الفيلم أخذ وقت طويل جدًا في تعريفنا بعالم أراكس والصراع بين العائلات، وكل شوي حوارات وشرح عن السياسة والنبوءات. أنا ما عندي مشكلة مع الأفلام اللي تأخذ وقتها في سرد الأحداث، لكن هنا حسيت إنهم بالغوا بشكل كبير، وكان ممكن يختصرون أشياء كثيرة بدون ما تتأثر القصة.
والمشكلة إن الفيلم يتوقع منك تستوعب عالم كامل بتفاصيله السياسية، لكنه ما يعطيك وقت كافي تتعلق فيه بالشخصيات. بعضها تظهر وتختفي بسرعة، وبالتالي لما تصير أحداث مهمة أو خيانات بين العائلات ما يكون تأثيرها بالقوة اللي المفروض تحس فيها. أحيانًا حسيت إني أتابع فيلم يفترض إني قريت روايته قبل ما أشوفه، من كثرة الأسماء والتفاصيل اللي تنذكر بسرعة.
واللي يقهر إن الفيلم فعلًا يقدر يقدم مشاهد حماسية، والدليل آخر ربع ساعة أو نصف ساعة تقريبًا. هنا بدأت أستمتع أكثر، خصوصًا مع المواجهات اللي صارت في الصحراء، لكن مستغربة ليش كل هالمتعة تأخرت لهذي الدرجة.
وحتى شخصية زندايا استغربت من طريقة استخدامها، طول الفيلم نشوفها في أحلام بول، ولما أخيرًا صار لها حضور فعلي انتهى الفيلم تقريبًا. أعرف إن قصتها بتكمل في الجزء الثاني، لكن وجودها هنا كان محدود جدًا.
وفوق هذا النهاية ما أقنعتني كختام لفيلم مدته ساعتين ونصف. حسيت إن الأحداث توقفت في اللحظة اللي بدأت فيها القصة تدخل مرحلة أهم، وكأن الجزء الأول مجرد مقدمة طويلة للجزء الثاني.
لكن بعد كل هالانتقادات، لازم أعطي الفيلم حقه في الأشياء اللي أبدع فيها، وأولها الإخراج والتصوير. يا جماعة بعض المشاهد كانت خرافية، خصوصًا اللقطات الواسعة للصحراء وتصميم المركبات والكواكب. حتى تفاصيل الملابس والمباني والديدان العملاقة كانت متعوب عليها بشكل واضح، ومن الناحية البصرية الفيلم يستحق كل المدح اللي حصل عليه.
وأشوف إن دينيس فيلنوف نجح في نقل عالم Dune إلى الشاشة، خصوصًا إننا نتكلم عن عالم ضخم ومعقد. بعض اللقطات كانت جميلة لدرجة إني كنت أتمنى لو الفيلم اهتم بالقصة والشخصيات بنفس اهتمامه بالتصوير.
أما الموسيقى التصويرية فهنا فعلًا هانز زيمر أبدع. الموسيقى كان لها دور كبير في الأجواء، خصوصًا مع مشاهد الصحراء والديدان العملاقة. بعض اللقطات ما كان بيكون لها نفس التأثير لولا الموسيقى، وهذا من أكثر الأشياء اللي رفعت مستوى الفيلم عندي.
كذلك التمثيل كان ممتاز، خصوصًا تيموثي شالاماي وريبيكا فيرغسون وأوسكار آيزاك. حبيت أداء ريبيكا تحديدًا في المشاهد اللي كانت تحاول فيها تحمي بول، وكيف قدرت توصل خوفها عليه بدون مبالغة. وبشكل عام أشوف إن اختيار الممثلين كان من أنجح الأشياء في الفيلم.
والشيء اللي أحسبه للفيلم إنه رغم مشاكلي مع بدايته، قدر يخليني أهتم بمعرفة وش بيصير في الجزء الثاني. عالم Dune عنده إمكانيات كبيرة جدًا، لكن كنت أتمنى إن الجزء الأول يستغلها بشكل أفضل بدل ما يستهلك أغلب وقته في التأسيس.
وفي النهاية، أشوف إن Dune: Part One يستحق المدح من ناحية الإخراج والتصوير والموسيقى والتمثيل، لكن قصصيًا ما قدرت أعطيه نفس الإشادة. الفيلم جميل جدًا من الخارج، لكن هذا الجمال ما يكفي إذا كانت الشخصيات ما أخذت حقها والأحداث تحتاج كل هالوقت عشان تبدأ تشدني.
وأعرف إن فيه ناس بتختلف معي وبتقول إن البطء كان ضروري عشان نفهم العالم، وأحترم هالرأي، لكن بالنسبة لي فيه فرق بين إنك تبني عالمك بهدوء وبين إنك تخلي المشاهد ينتظر وقت طويل عشان يبدأ يستمتع.
وبخصوص المواجهة بين Dune: Part Three وAvengers: Doomsday، بعد اللي شفته في الجزء الأول ما أشوف إن عندي سبب يخليني أحجز تذكرة للجزء الثالث. طبعًا ما راح أحجز له حاليًا، ويمكن يتغير رأيي بعد مشاهدة الجزء الثاني.
تقييمي للفيلم: 7.5/10
وبكرة إن شاء الله موعدنا مع مراجعة Dune: Part Two، ونشوف إذا بيغير نظرتي للسلسلة
