إبراهيم محمد الخويطر

صباح النور وحياك الله يا فيصل عندنا... مميزات السكن في الخُبر: 1- سكانها أشخاص قدموا من جميع مناطق المملكة وفيها تنوّع ثقافي كبير، من المنطقة الشمالية والجنوبية والغربية والوسطى وبالطبع الشرقية. 2- تسكن تلقى جارك على اليمين شمري ويسارك حساوي ومقابلك من الأشراف والجار اللي جنبه غامدي وعتيبي وخلفك زهراني ومطيري.. وهكذا. 3- المدينة هادئة وسكانها (في العموم) يتّبعون قواعد المرور ولا يساقطون، إذا تبي تلف وعطيت إشارة غالباً يقول لك تفضل، إذا الإشارة حمراء وتبي تلف يمين غالباً محد يسد المسار عند الإشارة. 4- جنبك الدمام والظهران، وإذا تبي أكل بحري رائع ومتنوع بسعر أسطوري عندك القطيف. 5- عندك الواجهات البحرية تقدر تتمشى فيها، عندك البحر نفسه فيه أماكن تقدر تسبح وتشوي وتستمتع مع العائلة. 6- أسعار العقارات أرخص بكثير من المدن الكُبرى الأخرى. 7- زهقت من الأسواق والمقاهي فيها؟ مافي مشكلة، خلال 25 دقيقة تقدر تكون وسط المنامة بالبحرين، تستمتع مع العائلة وفيها خيارات واسعة وأسواق رائعة. 8- زهقت من الشرقية والبحرين؟ مافي مشكلة، 3 ساعات وأنت في الدوحة، خيارات كبيرة وأماكن رائعة في الشتاء خاصة. 9- زهقت من الشرقية وقطر والبحرين؟ مافي مشكلة 4 ساعات وأنت في الكويت. 10- زهقت من هذا كله؟ مافي مشكلة، 4 ساعات وأنت بالرياض وتستمتع بالمواسم الترفيهية. حياكم الله في أجمل مدينة عربية