పూజ్య శ్రీ సామవేదం షణ్ముఖ శర్మ గారికి వినయపూర్వక నమస్కారాలు. @SriSamavedam హైందవ తాత్త్విక జ్ఞానాన్ని వేలాది మంది హిందువులకు సులభంగా అర్థమయ్యే రీతిలో అందించి, ధర్మబోధను ప్రజల్లో విస్తరింపజేస్తున్న మీ సేవ అపారమైనది. అందుకే మీ పట్ల నాకు ఉన్న గౌరవభావంతోనే ఈ సందేశాన్ని రాస్తున్నాను. నేను ప్రస్తావించబోయే విషయం సనాతన ధర్మ భవిష్యత్తుకు సంబంధించిన అత్యంత ప్రాధాన్యమైనది. మన ధర్మాచార్యులు, ప్రవచనకర్తలు, పండితులు శాస్త్రపాండిత్యంలో నిష్ణాతులు. అయితే, వారిలో శృంగేరి, ద్వారక, జ్యోతిర్మఠం, పూరి గోవర్ధన పీఠాల జగద్గురు శంకరాచార్యులను మినహాయిస్తే, స్వాతంత్ర్యం తరువాత ఏర్పడిన రాజ్యాంగ, పాలనా, న్యాయ, రాజకీయ వ్యవస్థలను, అవి హిందూ సమాజంపై చూపుతున్న ప్రభావాన్ని లోతుగా అధ్యయనం చేసినవారు చాలా తక్కువమందే ఉన్నారని నాకు అనిపిస్తుంది. అందువల్ల, ఆ వ్యవస్థ హిందువులకు ఇతర మతస్థులతో సమాన హక్కులను నిరాకరిస్తోందనీ, హిందువులను రెండవ శ్రేణి పౌరులుగా దిగజార్చిందనీ, దాని ఫలితంగా హైందవ క్షీణత, హిందువులకు తీవ్ర అన్యాయం జరుగుతోందనీ వారు తగినంతగా పరిశీలించి ఉండకపోవచ్చు. ఇది వారి విద్యను, పాండిత్యాన్ని తక్కువ చేయడం కాదు. మారిన పరిస్థితుల్లో హైందవం ఎదుర్కొంటున్న సవాళ్ల స్వరూపం కూడా మారిపోయిందనే విషయాన్ని తెలియజేయాలనే నా ఆరాటం మాత్రమే. ఒకప్పుడు సనాతన ధర్మంపై దాడులు ప్రత్యక్షంగా ఉండేవి. తురుష్కుల విధ్వంసకర దండయాత్రలు, దేవాలయాల విధ్వంసం, బలవంతపు మతమార్పిడులు వాటికి ఉదాహరణలు. ఆ రోజుల్లో ధర్మరక్షణ అంటే ప్రధానంగా బాహ్య దాడులను ఎదుర్కోవడమే. కానీ నేటి పరిస్థితి పూర్తిగా భిన్నంగా ఉంది. ఇప్పుడు హైందవ విద్రోహకర శక్తులు కత్తులతో రావడం లేదు. అవి రాజ్యాంగంలోని కొన్ని నిబంధనల రూపంలో, చట్టాల రూపంలో, ప్రభుత్వ విధానాల రూపంలో పనిచేస్తున్నాయి. ఈ మార్పును గుర్తించడం హిందూ మనుగడకు చాలా అవసరం. రాజ్యాంగంలోని 25 నుండి 30వ అధికరణాలను నిశితంగా పరిశీలిస్తే ఈ అసమానతలు, వివక్షలు తేటతెల్లమవుతాయి. ముస్లింలు, క్రైస్తవులు తమ మతసంస్థలు, విద్యాసంస్థలు, మతపరమైన వ్యవహారాలను నిర్వహించుకోవడానికి రాజ్యాంగ పరిరక్షణ పొందుతున్నారు. కానీ అదే స్థాయి స్వయం ప్రతిపత్తిని హిందువులకు రాజ్యాంగం నిరాకరించింది. దేశవ్యాప్తంగా రెండు లక్షలకు పైగా హిందూ దేవాలయాలు ప్రభుత్వ నియంత్రణలో ఉన్నాయి. కానీ ఒక్క మసీదు గానీ, ఒక్క చర్చి గానీ ప్రభుత్వ నియంత్రణలో లేదు. మసీదులు, చర్చిలు పూర్తిగా ముస్లిం, క్రైస్తవ సమాజాల ఆధీనంలోనే కొనసాగుతున్నాయి. ఫలితంగా హిందూ సమాజానికి స్వతంత్ర మతసంస్థాగత వ్యవస్థలు బలహీనపడి, దేవాలయాల ఆధారంగా సాగాల్సిన ధర్మపోషణ క్రమంగా క్షీణిస్తోంది. ముస్లిం, క్రైస్తవ విద్యాసంస్థలకు రాజ్యాంగం ప్రత్యేక హక్కులు, సౌకర్యాలు కల్పించి, హిందూ విద్యాసంస్థలకు వాటిని నిరాకరించింది. అలాగే వేలాది సంవత్సరాల భారతీయ జ్ఞానసంపదను, ప్రాచీన గ్రంథాలను విద్యా వ్యవస్థ నుండి తొలగించింది. ఫలితంగా హిందువులు తమ మతం గురించి సరైన బోధన, అవగాహన లేక నామమాత్రపు హిందువులుగా మారుతున్నారు. హిందువులను క్రైస్తవులుగా, ముస్లింలుగా మతం మార్చడానికి రాజ్యాంగం వెసులుబాటు కల్పిస్తోంది. గత డెబ్బై ఆరు సంవత్సరాలలో తొమ్మిది రాష్ట్రాలలో, రెండు వందలకు పైగా జిల్లాలలో, వేలాది గ్రామాలు, పట్టణాలలో హిందువులు మైనారిటీలుగా మారడమో, కొన్ని ప్రాంతాల్లో పూర్తిగా కనుమరుగవడమో జరిగింది. పరిస్థితి ఎంత భయంకరంగా ఉందంటే, ప్రస్తుతం దేశ జనాభాలో హిందువుల శాతం 60 కంటే ఎక్కువ ఉండదని అంచనా. ఇదే ధోరణి కొనసాగితే, 2040 తరువాత ఒక హిందువు భారత ప్రధానమంత్రి కావడం కూడా అసంభవమయ్యే పరిస్థితి ఏర్పడవచ్చనే ఆందోళన కలుగుతోంది. నిజాయితీగా పరిశీలిస్తే, గత డెబ్బై ఆరు సంవత్సరాలలో ఈ రాజ్యాంగ వ్యవస్థ హిందూ ధర్మానికీ, హిందూ సమాజానికీ చేసిన నష్టం, గత పదమూడు వందల సంవత్సరాల ముస్లిం ఆక్రమణలలో, విదేశీ పాలనలో జరిగిన నష్టానికంటే ఎక్కువ అని తెలుస్తుంది. ఈ రాజ్యాంగం ఎంత దుర్మార్గమైనదంటే, హిందువులు తమ వేళ్లతో తమ కళ్లను తామే పొడుచుకుని గుడ్డివారిగా మారే పరిస్థితిని సృష్టించింది. పదమూడు వందల సంవత్సరాలుగా అనేక తరాలకు చెందిన కోట్లాది మంది హిందువులు ధర్మరక్షణ కోసం చేసిన ధన, మాన, ప్రాణ త్యాగాలను గత డెబ్బై ఆరు సంవత్సరాల హిందూ వ్యతిరేక రాజ్యాంగ వ్యవస్థ వృథా చేసిందని చెప్పడం ఏమాత్రం అతిశయోక్తి కాదు. ఈ దుస్థితిని మార్చాలనే కొండంత ఆశతో 2014 నుండి హిందూ సమాజం పెద్ద ఎత్తున ఆర్‌ఎస్‌ఎస్‌, భాజపా, నరేంద్ర మోదీలకు మద్దతు పలికింది. హిందువులు గొంతెమ్మ కోర్కెలు కోరలేదు. ప్రత్యేక హక్కులు ఇవ్వమని అడగలేదు. ఇతర మతస్థులతో సమానంగా రాజ్యాంగ హక్కులు కల్పించాలని మాత్రమే కోరుతున్నారు. కానీ గత పన్నెండు సంవత్సరాల భాజపా పాలనలో హిందువుల పరిస్థితి పెనం మీద నుంచి పొయ్యిలో పడినట్లయింది. ప్రభుత్వ ఆధీనంలో ఉన్న రెండు లక్షల దేవాలయాలను విముక్తి చేసి హిందూ సమాజానికే అప్పగిస్తారని ఆశించిన హిందువులు తీవ్ర నిరాశకు గురయ్యారు. పైగా, 2019లో ఉత్తరాఖండ్‌లోని 55 చార్‌ధామ్ దేవాలయాలను, 2025లో ఉత్తరప్రదేశ్‌లోని మథుర బాంకే బిహారి దేవాలయాన్ని భాజపా ప్రభుత్వాలే ప్రభుత్వ నియంత్రణలోకి తీసుకొచ్చాయి. అయోధ్య రామమందిరాన్ని ప్రభుత్వం ఏర్పాటు చేసిన సమితి ద్వారా ఆర్‌.ఎస్‌.ఎస్‌. కబ్జా చేసి, అవినీతి కూపంగా మార్చి దోచుకుంటోంది. గత పన్నెండు సంవత్సరాల భాజపా పాలనలో ఇంతకు ముందెన్నడూ కనీవినీ ఎరుగని రీతిలో ₹1,20,000 కోట్ల ప్రభుత్వ నిధులతో మైనారిటీ బుజ్జగింపు చర్యలు ఉధృతమయ్యాయి. ఇదే కాలంలో ఆర్‌ఎస్‌ఎస్–భాజపాలు తమ రాజకీయ ప్రయోజనాల కోసం కులతత్వానికి మరింత ఊతమిచ్చి, కులాల మధ్య విభేదాలను పెంచి, హిందూ సమాజంలో కలతలు రేపడం ఎంతో ఆందోళనకరమైన విషయం. అంతేకాకుండా, గత ఐదు దశాబ్దాలుగా అనేక రాష్ట్రాలలో భాజపా ప్రభుత్వాల పనితీరు, కేంద్రంలో వాజ్‌పేయి ప్రభుత్వం, ఆ తరువాత జరిగిన పరిణామాలన్నింటినీ కలిపి పరిశీలిస్తే, ఆర్‌ఎస్‌ఎస్–భాజపాలు ఇతర రాజకీయ పార్టీలకు మౌలికంగా భిన్నం కాదని తెలుస్తుంది. సంఘ పరివార్‌కు మద్దతు ఇవ్వడమే హిందుత్వమని, దానిని విమర్శిస్తే హిందూమతానికి వ్యతిరేకమని ప్రచారం చేస్తూ, ఆ భావనను అమాయక హిందువులలో నాటడం ద్వారా వారు తమ రాజకీయ పబ్బం గడుపుకుంటున్నారు. హిందుత్వం పేరును భ్రష్టు పట్టిస్తూ, హిందూ మతాన్ని తమ రాజకీయ ప్రయోజనాలకు ఆయుధంగా ఉపయోగించే కుహనా హిందుత్వ దుష్టశక్తి సంఘ పరివార్. అది హిందూ సమాజానికి పట్టిన చీడ. ఈ నేపథ్యంలో, రాజకీయాలకు అతీతంగా ఉండవలసిన మతపెద్దలైన మీరు "దేశ క్షేమం" అనే వీడియో ప్రసంగంలో హిందూ ద్రోహులైన #కుహనాహిందుత్వ భాజపా ప్రభుత్వానికి మద్దతు తెలపడం హిందూ శ్రేయస్సును కోరే వారందరికీ బాధ కలిగించింది.👇 ప్రతి హిందువు, ముఖ్యంగా మతపెద్దలు, హిందూ శ్రేయస్సును రాజకీయ దృక్పథంతో చూడకూడదు; రాజకీయాలను హిందూ దృక్పథంతో చూడాలి. అప్పుడే హిందువులకు మేలు జరుగుతుంది. హైందవం రక్షింపబడుతుంది. ఇది హిందూ సమాజ భవిష్యత్తుపై ఆవేదనతో, మీ పట్ల గౌరవంతో చేసిన ఒక విజ్ఞప్తిగా స్వీకరిస్తారని ఆశిస్తున్నాను. వినయపూర్వక నమస్కారములతో, మన్నెం నాగేశ్వర రావు మాజీ డైరెక్టర్ సిబిఐ