هدى القلاف

الجدل والتشاحن على شركة المطاحن.. ♦️لما نزّلت قهوة رخيصة اتهموها بمحاربة القطاع الخاص، ولما نزلت سندويشات قالوا ليش الاسعار غالية!! ♦️يبااااا… ركز يا الحبيب… شركة المطاحن قاعدة تطبق استراتيجية اقتصادية متوازنة، وشغلها مقسوم لقسمين: ♦️الأول الجانب الخدمي (الأمن الغذائي): التوست، الخبز، الطحين، الزيت، بسكوت، معكرونية، وبودرة الحليب.. مواد أساسية لكل بيت سواء كويتي او وافد، توفرهم بأسعار رخيصة مدعومة من الدولة. ♦️الثاني… الجانب التجاري والاستثماري: تبيع قهوة، كيك، أو سندويشات جاهزة، هذي منتجات رفاهية ومريحة اختيارية وليست تموين غذائي أساسي. ♦️ولاحظوا… لما نزلت القهوة والكب كيك بسعر رخيص، اتهموها بمحاربة القطاع الخاص، رغم انها قدمت منتج يضبط أسعار سوق القهوة اللي مسيطرين عليها اصحاب الاسعار المبالغ فيها لصالح الناس. ♦️ولما قامت تبيع السندويشات الكشخة بسعر السوق، احترمت المنافسة علشان لا تظلم المميزين أصحاب المشاريع الصغيرة المماثلة، وهالسوق متروس كافتيريات يبيعون سندويشات وصمون بكل الأسعار تبدأ من 100 فلس حق اللي يبي سعر رخيص وتتدرج بالارتفاع. ♦️الأهم من هذا لازم الإنسان يفهم ويستوعب ان الأرباح اللي تطلعها من هالمنتجات ترجع تصبها في دعم طحينك وخبزك اليومي علشان تخفف الضغط المادي على الدولة وتدعم نفسها بنفسها عن طريق البيع على المقتدرين اللي يبون يدفعون سعر الجودة لسندويشاتهم المميزة باختيارهم. ♦️يعني المطاحن وفرت لك أكل بيتك الأساسي بأرخص سعر، ووفرت منتجات اختيارية ذات جودة في سوق الرفاهية بسعر السوق. الله يعطيهم العافية ويوفقهم ويجعل النجاح في طريقهم، لأن خطتهم ذكية وتحقق أكثر من هدف ايجابي، والشراء منهم ودعمهم عمل وطني، لأن الارباح تستخدم للمصلحة العامة.