عايز اتكلم عن مصطلح بسميه Forcing chaos (افتعال الفوضى) أولاً دي خمس امثلة فضيحة عن سوء شكل برشلونة بدون الكورة وأدوار الوسط وانها مشكلة مدرب قولاً واحداً بعيداً عن شوية الملخصات الحمصي بتاعت الضغط ضد باريس لإثبات ان الفريق ممتاز بدون الكورة وكدا ، ونفس الحالات دي تكررت طوال مباراة باريس وسجلوا منها وباريس قدر يخرج بالكورة كتير عادي ونصها كانت حالات أي كلام ناقصها اخر لمسة بس مدرب قدم كلاسيكو يخليك تقول خسارة فيه رودري وبيدري ومحتاج اتنين فلاحين زي جالاجير ورايس يركضوا حتى تنفجر قدماهم دول اللي هينفعوا مع متطلباته دي في خصوم بتركن الاتوبيس وتجبرك تلعب مباراة مقفولة ، فليك بايع الأتوبيس كله ومعري وسطه ودفاعه برضاه وقاعد يتفرج ، أحياناً لدرجة اجبارك تلعب مباراة مفتوحة ضده غصب عنك. لأسباب كتير : أنه بياخد الكورة عايز يهاجم معظم الوقت بأسرع طريقة ، ان تمركز أجنحته دايما عالي في كل المراحل. سواء الضغط العالي وان الاجنحة بتضغط للداخل عشان يكونوا أقرب للمرمى لو كسبوا الكورة (خطورة أكبر) ، والظهير مضطر يخرج مسافة ضخمة يضغط على ظهير الخصم وأوقات لاعب الوسط الأقرب هو اللي يخرج على الظهير. زي رودري لما كان بيضطر يطلع يقابل كوكوريا 😂 حتى في باقي المراحل الاجنحة تمركزهم عالي برضو لنفس السبب عشان التحولات السريعة ، سبق وذكرت مثال استخدام سلوت لـ صلاح. فليك بيتعامل كدا مع خط هجومه كامل. ممكن تلاقي هجمة للخصم في نص الملعب وبرشلونة واقف بشكل 4231 عشان الاجنحة يكونوا في مركز أعلى رغم ان الأنسب يكونوا واقفين على نفس الخط مع لاعبي الوسط في شكل 442 لأنه بيحمي المساحات بشكل أفضل. لكن فليك مش عايز كدا ، مش بيفكر يدافع ازاي ، تفكيره الأكبر هو هيهاجم ازاي لما يكسب الكورة برشلونة الفريق الوحيد في العالم اللي بيضغط 4231 في كل المراحل وأغلب الموسم .. كل الفرق الكبار بتضغط 442 وبتنوع من دياموند إلى 442 فلات إلى رجل لرجل في اللحظات المناسبة. إلا فليك مؤسس الـ 4231 ، أي خصم بيقدر يتخطى أول خط ضغط ، يجمع اللعب في جانب وينقله للجانب التاني. بيخرج رباعي الهجوم برا اللعب وتلاقي برشلونة بيدافع بـ 4 لاعبين على خط واحد أمامهم ثنائي الوسط مش عارفين يعملوا ايه ولا يغطوا المساحات الضخمة دي ازاي ، والخصم بيهاجم وجاي عليك بالفريق كله دا في نفس الوقت صعب التعامل معاه من الخصوم لأن لو في مدرب عايز يرفع خط دفاعه أكتر ويتقدم بفريقه أكتر في نص ملعب الخصم عشان يضيق المسافة بين خطوطه ويقلل المساحات ويكون ضغطه العكسي أفضل ويسترجع الكورة أسرع ، هو مش هيقدر يعمل كدا ضد خصم زي برشلونة تمركز لاعبي هجومه دايما عالي بالشكل دا فـ مش هيقدر يقدم خط دفاعه زي ما هو عايز ، بالتالي مش هيقدر يسيطر بشكل كبير. اجبارك تلعب مباراة مفتوحة أقل سيطرة .. انا أحياناً بشعر ان فليك بيدعي الخصم أنه يهاجمه برضاه عشان فليك لما يكسب الكورة عنده فرصة تحول ، بس انت كدا ممكن تستقبل فرصة محققة؟ .. مش مهم طالما في احتمالية اني لو كسبت الكورة اعمل تحول هجومي واصنع فرصة انا كمان دا هو المصطلح اللي ذكرته في البداية Forcing chaos .. افتعال الفوضى فليك عايز 11 لاعب مثاليين مناسبين لأسلوبه عشان يقدم أفضل أداء ويظهر أقل عيوب اللي هي بالنسبة لفليك مش عيوب بل هي مخاطرات عن قناعة تامة منه