Shahzad Ahmad

لاہور کے بیس کالجز میں مریم نواز کی پینٹنگز بنانے کا مقابلہ! سما ٹی وی کے پروگرام میں اس خبر کی تصدیق بھی کی گئی کہ یہ ویڈیوز اے آئی سے نہیں بنائی گئیں بلکہ واقعی ایسا مقابلہ ہوا ہے۔ سوال یہ ہے کہ پنجاب کے محکمۂ تعلیم کو آخر یہ خیال کیسے آیا؟ ایک خاتون وزیراعلیٰ جن کی حکومت پر لاقانونیت، پولیس مقابلوں میں ہلاکتوں، عدالتی معاملات میں مداخلت کے الزامات اور سیاسی مخالفین پر سختیوں کے حوالے سے مسلسل سوالات اٹھ رہے ہیں، وہ پہلے ہی اپنی تشہیر کے لیے سرکاری وسائل کے استعمال پر تنقید کی زد میں ہیں۔ سڑکوں پر تصویریں، اخبارات میں اشتہارات، ٹی وی اسکرینوں پر تشہیر، ڈیجیٹل میڈیا پر پیغامات، سرکاری محکموں کے واٹس ایپ گروپس، منصوبوں پر اپنا نام، حتیٰ کہ پہلے سے موجود رورل ہیلتھ سینٹرز اور بیسک ہیلتھ یونٹس تک کو مریم نواز کے نام سے منسوب کرنے کا سلسلہ۔ اور اب تعلیمی اداروں میں ان کی پینٹنگز کے مقابلے کیا یہ سب کچھ کم تھا کہ اب بچوں سے تالیاں بجوا کر ’’سپر سی ایم میڈم مریم نواز‘‘ کے نعرے بھی لگوائے جا رہے ہیں؟ گیارہ بارہ ارب روپے کے جہاز کی خریداری کے معاملے پر بھی سوالات موجود ہیں، مگر دوسری طرف عوامی پیسے اور سرکاری مشینری سے شخصیت کی تشہیر کا یہ سلسلہ ختم ہونے کا نام نہیں لیتا۔ مقابلہ کروانا ہی ہے تو قائداعظم محمد علی جناح، علامہ اقبال اور محترمہ فاطمہ جناح کی تصاویر بنانے کا مقابلہ کروائیے۔ بچوں کو قومی شخصیات، تاریخ اور علم سے جوڑیے۔ تعلیمی ادارے کسی حکمران کی ذاتی تشہیر کے اکھاڑے نہیں ہوتے۔ اور سب سے اہم بات: جب کسی حکمران کو اپنی تعریف سننے کا اتنا شوق ہو کہ سرکاری محکمے بچوں کو بھی اس مہم میں شامل کرنے لگیں، تو یہ عوامی خدمت نہیں، شخصیت پرستی کی ایک افسوس ناک مثال بن جاتی ہے۔ محترمہ وزیراعلیٰ! حکومت کا کام اپنی تصویریں بنوانا اور اپنی تعریفیں کروانا نہیں، عوام کے مسائل حل کرنا ہے۔ اپنی تشہیر کے لیے بچوں اور تعلیمی اداروں کو استعمال کرنا کم از کم محکمۂ تعلیم کے شایانِ شان تو نہیں۔