رين

في 2021 بنت جارتنا 21 سنة كانت مفقودة، والعائلة نزلت تلف في الاقسام والمستشفيات والكل كان بيساعدهم. كانوا عائلة مش بيستخدموا السوشيال ميديا نهائي، وحياتهم مدارس وجامعات ودروس والتزام تام. بعد ماعدت اول ليلة من غير ما يلاقوها، واحد من سكان العمارة اقترح يرفع صورتها على فيس بوك، وكتب كلام مشابه للي مكتوب في البوست ده، وانها مفقودة لعل وعسى حد يتعرف عليها. تاني يوم باليل لقوا البنت واتضح انها كان مغمي عليها وهيا راجعة البيت ومكنش معاها بطاقة وقتها وتليفونها اختفى (غالبا حد سرقه وقت الاغماء) ونقلوها المستشفى، وعشان هويتها مكنش معروفة فالموضوع اخد وقت على ما لقوها، وكان سبب الاغماء ان الاطباء بعد فحوصات وتحاليل لقوا ان عندها الضغط والسكر غير ورم حميد في منطقة الصدر وجزء منه ضاغط على الرئة، وحصوات حجرية على الكلى ولازملها ازالة بالليزر، وكل ده مكنتش تعرف لا هيا ولا اهلها. يعني بدل السبب 4 اسباب من أصعب ما يكون. ولما بدأت تتحسن وتنزل الشارع لاحظت نظرات الناس عليها غريبة، وبعدها سمعت كلام عليها مش كويس، لحد ماصديقة ليها ورتها البوست اللي جارهم كان نشره بأنها مفقودة، واتصدمت بأن الناس انهالت عليها بتعليقات بتخوض في شرفها وعرضها بكلمات بشعة، ووقتها مكنش في خاصية اخفاء هوية التعليق زي الموجودة حاليا، والصدمة الأكبر أن منهم بيربطهم بيها صلة قرابة. واحد كان كاتب بالحرف (معزة مش ملمومة، لما تلاقوها ابقوا قولولي اخد حتة منها طالما اهلها مش حاطين ليها سعر)، والالعن أنه كان في نفس اليوم اللي رجعت فيه البيت زارهم يتطمن عليها وكان بيبتسم في وشها ويضحك ولا كأن في أي حاجة. البنت دخلت في حالة صدمة وفقدت النطق لايام وبعديها اهلها اتفجأوا انها قطعت شرايين ايدها في الحمام ولولا ستر ربنا مكنوش لحقوها، وأخوها اتخانق مع اللي كتبوا كدة ودخل في مشاكل انتهت بخناقة كبيرة اتسببت له بعاهة مستديمة، ووالدها جاله جلطة يومها وحياتهم قلبت سواد لشهور. عن سعيد بن زيد رضي الله عنه قال رسول الله صلى الله عليه وسلم: «إِن من أَربى الربا الاستطالة في عرض المسلم بغير حق». أقسم بالله العلي العظيم اننا نستاهل كل اللي يجرالنا في عيشتنا في البلد دي.