Khaldun Hasni

ایک تصویر نے لوگوں کو ششدر کر دیا ہے۔ یہ تصویر برادر عزیز حسن الیاس کی ہے جو مولانا سید ابو الاعلیٰ مودودی کے مرقد پر اشک بار بیٹھے ہیں۔ حسن الیاس جناب جاوید احمد غامدی کے شاگرد ہیں۔ ان کا مولانا مودودی سے کیا لینا دینا؟ یہ سوال درست ہے لیکن کسی نتیجے پر چھلانگ لگانے سے قبل تھوڑا پس منظر میں جھانک لیا جائے تو بہتر ہو۔ اس دنیا میں سانس لینے والے ہر ذی روح کی ایک کہانی ہے جیسے میری اور آپ کی کہانی ہے۔ ایسی ہی ایک کہانی غامدی صاحب کی بھی ہے۔ کتابیں پڑھنے اور زندگی پر غور فکر کرنے والوں کی کہانی میں کچھ نہ کچھ نیا ضرور ہوتا ہے لیکن یہ نیا خاکہ اکثر بے رنگ رہتا ہے اگر اس کی راہ میں کوئی موڑ نہ آئے اور اس موڑ پر اس کی ملاقات کسی مرد خود آگاہ سے نہ ہو۔ جاوید صاحب کی کہانی میں بھی یہی ہوا۔ ان کی ملاقات سید ابوالاعلی مودودی سے ہوئی اور ان کی زندگی میں معنی پیدا ہونے لگے۔ حسن الیاس سے کسی نے پوچھا کہ سید ابوالاعلی مودودی کی رحلت کو نصف صدی گزرتی ہے، اتنا عرصہ گزر جانے کے بعد آپ لوگ ان کی فکر اور کام کو کیسے دیکھتے ہیں۔ روانی سے بات کرنے والے حسن الیاس خاموش ہوئے، لحظہ سوال کرنے والے کی طرف دیکھا پھر کہا: ' سید ابو الاعلیٰ مودودی نہ ہوتے تو آج غامدی صاحب کا کوئی وجود نہ ہوتا۔' یہ بات انھوں نے غامدی صاحب سے الفت رکھنے والوں کے اجتماع میں کہی۔ مرقد مودودی پر انھیں اشک بار دیکھ کر اس بات کے معنی معلوم ہو گئے۔ علم کی دنیا اور عام دنیا میں کوئی زیادہ فرق نہیں ہوتا۔ ہم میں سے ہر شخص کی کام یابی یا کسی کارنامے کی انجام دہی کے پس پشت کسی نہ کسی کا احسان ضرور ہوتا ہے۔ کوئی پیٹھ تھپکنے والا، حوصلہ دلانے والا اور راہ دکھانے والا نہ ہو تو مسافر صحرا میں بھٹکتا ہی رہ جائے۔ کم لوگ ایسے ہوتے ہیں جو منزل پر پہنچ یا کہیں مزید آگے نکل کر پیٹھ تھپکنے والے کو یاد رکھتے اور احسان شناسی سے کام لیتے ہیں۔ جاوید احمد غامدی کا شمار ان ہی تھوڑے سے لوگوں میں ہوتا ہے۔ غامدی صاحب کی احسان شناسی ان کی ذات تک محدود نہیں رہی۔ اس پاکیزہ جذبے کی خوشبو سے ان کے شاگرد اور ان کا حلقہ فکر بھی مشک بار ہوا ہے۔ یہ سوال ذہن میں آ سکتا ہے کہ اچھا ایسا ہو گیا لیکن یہ تو کہیے کہ اس کا مطلب کیا ہے؟ یہ مطلب بہت سادہ ہے۔ جاوید احمد غامدی مولانا مودودی سے چلے اور مولانا امین احسن اصلاحی تک پہنچے۔ اب خود ان کا اپنا ایک اسکول ہے۔ یعنی وہ بعض معاملات میں انفرادی رائے رکھتے ہیں جسے مسلمانوں کی ایک قابل لحاظ تعداد قبول کرتی ہے۔ اسلامی تاریخ میں یہ پہلی بار نہیں ہوا۔ امام ابو یوسفؒ اور امام محمد بن حسن شیبانیؒ؛ امام ابو حنیفہؒ کے شاگرد تھے لیکن آگے چل کر ان دونوں بزرگوں نے امام ابو حنیفہ کی آرا سے اختلاف کیا لیکن اس کے باوجود ان دونوں کی قدر و منزلت اور احترام میں کوئی کمی واقع نہیں ہوئی۔ انھیں بھی فقہ حنفیہ کے اکابر میں شمار کیا جاتا ہے۔ امام شافعی امام مالک کے شاگرد ہیں لیکن انھوں نے بھی اپنے استاد سے اختلاف کیا۔ اس اختلاف کا احترام کیا گیا لیکن اس کے ساتھ ان کی بزرگی اور علمی مرتبے کو بھی تسلیم کیا گیا۔ امام احمد بن حنبل امام شافعی کے شاگرد تھے۔ ان کی کہانی بھی مختلف نہیں۔ علمی دنیا کی کہانی یہی ہے۔ جو شخص خود کو کسی علم کے لیے مخصوص کر لے، اسے وقت دے اور اس پر غور و فکر کرے تو لا محالہ کچھ نئی چیزیں وجود میں آئیں گی جیسے مولانا مودودی کا اختصاص قرآن کی چار بنیادی اصطلاحیں ہے یا نظم اجتماعی یعنی اسلامی ریاست کے نظام حکومت کے بارے میں ان کی فکر کا بڑا حصہ خلافت و ملوکیت میں سمٹ آیا ہے۔ ان ہی معاملات پر اگر کوئی دوسرا کام کرے تو ضروری نہیں کہ وہ بھی اسی نتیجے پر پہنچے جس نتیجے پر اس سے پہلے والے پہنچے ہیں۔ علمی تگ و دو کے نتائج نہ بدلیں تو اس کے نتیجے میں علمی سفر ہی رک جائے گا اور معاشرہ طالبان کے افغانستان جیسا ہو جائے گا۔ پہیے کی ایجاد سے لے کر ورچوئل دنیا کے وجود میں آنے تک دنیا نے ترقی کا سفر طے کیا ہے، اس کے پیچھے اصل طاقت یہی علمی سفر ہے جس میں نئی آرا وجود میں آتی ہیں، نئی ایجادات ہوتی ہیں اور بنی نوع انسان کا سفر آگے بڑھتا ہے۔ اس کے باوجود ایک حقیقت یعنی دنیا کی پہلی ایجاد پہیہ، اس کی اہمیت اور اسے ایجاد کرنے والے کا احترام ہمیشہ برقرار رہے گا۔ بالکل یہی معاملہ علم کا ہے خواہ وہ دین کا علم ہی کیوں نہ ہو۔