TWENDENI OFISINI KWA JAJI MKUU KWA UMOJA NA WINGI WETU, KUDAI HESHIMA YA MAHAKAMA HUNGER STRIKE YA LISSU NI KILIO CHA JAMII NZIMA Kitendo cha Mwenyekiti Tundu Lissu kugoma kula si suala lake binafsi pekee. Ni ujumbe mzito kwa jamii yetu na kwa kila mmoja wetu kwamba tumeshindwa kutekeleza wajibu wetu ipasavyo katika kusimamia haki. Ndiyo maana amefikia hatua ya kupigania haki yake mwenyewe kwa njia ya hunger strike. Hii ni fedheha kwa jamii nzima. Tunapofika mahali ambapo mtu analazimika kuhatarisha afya na maisha yake ili haki isikike, tunapaswa kujiuliza, tumeshindwa wapi kama jamii ? Kilio cha Lissu ni mwaliko kwetu sote kutafakari upya wajibu wetu na kutafuta njia sahihi, za pamoja na zenye uzito, za kupinga uonevu na kudai haki. Katika mkutano wa leo Morogoro, nimewaeleza wananchi kwamba nitamuomba Katibu Mkuu na Makamu Mwenyekiti wa chama kufikiria kuitisha Kikao cha Dharura cha Kamati Kuu, ili tujadili hatua za pamoja za kuitikia kilio hiki. Miongoni mwa hatua nitakazopendekeza ni kuandaa maandamano yatakayoongozwa na viongozi wakuu wa chama, kuelekea moja kwa moja katika Ofisi ya Jaji Mkuu, kuonyesha mshikamano wetu na kudai haki pamoja na heshima ya Mahakama. Huu si wakati wa kutazama Lissu akipambana peke yake. Ni wakati wa kujiuliza sisi sote tunapaswa kufanya nini ili haki isitafutwe kwa gharama ya maisha ya mtu. Tuna wajibu wa kuchukua hatua za pamoja ili kumuepusha Tundu Lissu na mateso na kuhakikisha kilio chake kinasikilizwa. Haki ya mtu mmoja ni wajibu wa jamii nzima. Kilio cha Lissu kisiishie kuwa kilio chake, kiwe mwamko wa dhamiri ya taifa. TWENDE KWA UMOJA.