மார்கழி பனி (S.Palani) 🇮🇳

மதுரை வேலம்மாள் மருத்துவமனையில் பெண் நோயாளியின் உயிரை காப்பாற்ற ஐந்து யூனிட்டுகள் ஓ நெகட்டிவ் வகை ரத்தம் தேவைப்படுகிறது. அதிகம் பகிரவும் தங்களுக்குத் தெரிந்த வாட்ஸ் அப் குழுமங்களில் பகிரவும்.

அந்தக் காலத்தில் நடுத்தர வகுப்பு குடும்பங்கள் திருப்பதிக்கு செல்ல வேண்டும் என்றால் சம்பளம் வந்தவுடன் எப்படி ஒரு சிறு தொகையை எடுத்து உண்டியலில் போடுவார்களோ.. ஆட்டை அறுத்தவுடன், கறிக்கடைக்காரர் தன் வழக்கமான வாடிக்கையாளருக்கு எப்படி முதலில் சுவரொட்டியை எடுத்து பதுக்கி வைப்பாரோ.. திருமணம் நிச்சயமான உடன் மணப்பெண் முதல் வேலையாக எப்படி பியூட்டிசியனை புக் செய்கிறாரோ.. அதுபோல, உலக லெவன் என எந்த கனவு அணி அமைத்தாலும், அதில் முதல் பெயராக நான் எழுதுவது அம்புரோஸ் பெயரைத்தான். அந்த அளவிற்கு கிரிக்கெட் பார்த்த காலத்தில் வசீகரித்தவர் அம்பரோஸ். 1987 ஆம் ஆண்டு ரிலையன்ஸ் உலகக் கோப்பையில், இந்தியா செமி பைனலில் தோற்றபிறகு அணி கேப்டன் கபில்தேவை மாற்றிவிட்டு வெங்சர்க்காரை நியமித்தார்கள். அப்போது இங்கே டெஸ்ட் மட்டும் ஒரு நாள் போட்டிகள் விளையாட வந்த மேற்கிந்திய தீவு அணியில் பேட்டர்சன், வால்ஸ் ஆகிய இரு எமகாதக பந்துவீச்சாளர்கள் இருந்தார்கள். அவர்கள் டெஸ்ட் போட்டிகளில் கலங்கடித்தார்கள்‌. நம்மிடம் டூர் முடிந்தவுடன் அடுத்து பாகிஸ்தானுக்கு சென்றார்கள். அங்கேதான் அம்புரோஸ் அறிமுகமானார். அவரது பந்துவீச்சை பார்த்தவுடன் முதலில் தோன்றியது, நல்லவேளை இவர் இரண்டு மாதம் முன்னாடி வரவில்லை என்பதே. அப்படி ஒரு ஆகிருதி, தொடர்ச்சியாக லைன் அண்ட் லென்த், பவுன்ஸ், அவ்வப்போது விளையாட முடியாத யார்க்கர் என மிரட்டினார்‌. அடுத்து அவர் ஆஸ்திரேலியாவிற்கு போய் கங்காருக்ககளையும் ஒரு மிரட்டு மிரட்டினார்‌. பழமொழி சொன்னா ஆராயக்கூடாது அனுபவிக்கணும் என்பதைப் போல அம்பரூஸ் பற்றி பேசினாலோ எழுதினாலோ அல்லது ஹைலைட்ஸ் பார்த்தாலோ கூட புரியாது ‌ அந்தச்சூழலில் அந்த ஆட்டக் களத்தில் அவரின் பந்துவீச்சை பார்த்தவர்களுக்கு தெரியும், அவரின் அசகாய பந்துவீச்சு. ஞாயிற்றுக்கிழமை ஆனால் கிரிக்கெட் விளையாட தந்தை அனுமதிக்காததால், அவர் எந்திரிக்கும் முன்னரே காலை 5 மணிக்கு எல்லாம் எந்திரித்து, அடுத்த குறுக்கு சந்தில், சைக்கிளில் கட்டி வைத்திருந்த, கிரிக்கெட் பேட் ஸ்டம்ப், கால் காப்பு பட்டைகள், கிளவுஸ் ஆகியவற்றோடு, கிரவுண்டிற்கு ஐந்தரை மணிக்கு எல்லாம் வந்துவிடும் என் நண்பன் பாலாஜி 92 இல் பெர்த்தில் அம்ப்ரோஸ் பந்துவீச்சை பார்த்துவிட்டு, இவருக்கு 22 யார்ட் பிச்சு பத்தாது‌. 44 யார்டு பிட்ச் போட்டால்தான் இவரது பந்துவீச்சை எதிர்கொள்ள முடியும் போல என கமெண்ட் அடித்தான். அப்படி பேட்ஸ்மேன்களை தொடர்ந்து திணறடித்தவர் அம்ப்ரோஸ்.