AKARO

Ubalozi wa Marekani nchini Tanzania umeungana na Watanzania katika kuomboleza vifo vya watu waliopoteza maisha katika machafuko ya Oktoba 29, 2025, ukiwakumbuka pia mke wa mfanyakazi wa ubalozi huo aliyeuawa kwa kupigwa risasi alipokuwa akirejea nyumbani kutoka sokoni. Katika ujumbe wake wa kumbukumbu ya mwaka mmoja tangu machafuko hayo, ubalozi huo umesema mwaka jana Watanzania wengi walipoteza maisha, huku familia na jamii mbalimbali nchini zikibaki katika majonzi kutokana na vifo hivyo. Ubalozi huo umesema kifo cha mke wa mfanyakazi wake ni miongoni mwa matukio yaliyowaacha watu katika huzuni, baada ya mwanamke huyo kuuawa kwa kupigwa risasi wakati akirejea nyumbani kutoka sokoni. Katika kuadhimisha kumbukumbu hiyo, jumuiya ya ubalozi ilikusanyika na kusimama kwa dakika moja ya ukimya kwa ajili ya kuwaenzi wote waliopoteza maisha katika machafuko hayo. Aidha, ubalozi huo ulieleza mshikamano wake kwa familia na watu wengine ambao bado wanaomboleza vifo vya wapendwa wao na wanaotafuta majibu kuhusu yaliyotokea. Kumbukumbu hiyo inafanyika wakati Tanzania ikiadhimisha mwaka mmoja tangu machafuko ya Oktoba 29, 2025, yaliyosababisha vifo na kuacha majonzi kwa familia nyingi, huku wito wa kupata majibu kuhusu matukio hayo ukiendelea kutolewa na wadau mbalimbali.