ملاذ البيوت اللي جفال من التلحين
امانتك قبل اقرأ محياك وش جبتي
تهادي على تركيبة البيت والبيتين
مثل ما تهادت نشوتي يوم قربتي
دعاك القصيد اللي يغنونه الغاوين
على كل مفرق حب لكن ما جاوبتي
تحوم الهقاوي بين الآمال و التخمين
و كم قاف شيبتي ! وكم ظن خيبتي !
رهنت أجمل ايام العمر كلها ما بين
أسابق مجيك واتحراك لا "غبتي"
على يمتك متوجه لي ثمان سنين
اشرق لا شرقتي واغرب لا غربتي
تبعتك وحثيت القدم في طريقك لين
توارت وراك أحلامي وضاعت اجوبتي
ذنوبي تراها في رقبتك لا يوم الدين
مثل ما كتبك الله ذنب على رقبتي
عشقتك و جربت اكتفي بالجناب الزين
و ما عمم على كل المحبين تجربتي
ضحايا الجفى قدام عينك يسار يمين
عليك الله أكبر ما تعظتي ولا تبتي !!
اشوف المفارق في محياك شوف العين
مثل ما يشوفون الرياجيل موهبتي
• منيف الجراش
19
1,166
لو احاول ادفّ الطواري على النسيان
انا اشوفك بْـ كل الطرق في مشاويري
السهل الممتنع … الشعر الي يلامس الشعور (يُخَلّد)
لا ياخذكْ بيديه الزعل يا أخر الخلان
تقبّل على شان المحبه .. معاذيري
انا ما تبعت الا الله المعطي المنان
ولا ودي ابيّن لـ طاعتْه تقصيري
تحملت زلت كل مخطي وكل لسان
وتقوّيت لين استسهلتلي مقاديري
واذا علّق الانسان رجواه بـ الانسان
يا قلبي على ربي رجاي وتدابيري
كتبت القصيد لـ عنق غاده وبنت حصان
ولقيت أكثر اللي يكتبونه .. جماهيري
يا منصى البيوت ومدهل الضافي الهتان
تغنيّ طرب وان مال عودك كثر خيري
لقيتك .. وانا بين التوجاد والحرمان
واخذتك وشفت بوجهك الغض تيسيري
احبك واحب اللي تقولين مهما كان
واعلق على صبحٍ يجيبك .. تباشيري
لو احاول ادفّ الطواري على النسيان
انا اشوفك بْـ كل الطرق في مشاويري
عسى وجهك الراضي فدا وجهك الزعلان
وعسى صوتك المبحوح ما يسمعه غيري



















