Sardar Abdul Majeed Sudozai

کچھ دیر تک روس کے اساطیری ناول نگار دوستوفسکی کے منتخب اقوال کا مطالعہ کرنے کا موقعہ ملا۔ سحر کی دل گداز ہوا میں اقبال یاد آتے رہے۔ نوائے صبح گاہی نے جگر خوں کر دیا میرا بہت دیرتک اس خیال نے دل میں پڑاؤ ڈالے رکھا کہ اردو کےپہلے عظیم شاعر میر تقی میر کی طرح ، ساری عمر ناکامیوں میں بسر کرنے والا یہ نادر روزگار مصنف شاید انسانی نفسیات کا شیکسپیئر سے زیادہ گہرا ادراک رکھتا یے۔ پچاس برس ہوتے ہیں جب اسے بالاستیعاب پڑھنے کی کوشش کی تھی ۔ اب احساس ہوا کہ از سر نو اس کا مطالعہ کرنا چاہیے ۔ یہ خیال بھی ہم۔رکاب رہا کہ یہ تکلیف دہ ہے ۔ ایسا گدا، رچاؤ اور درد اس کی تحریروں میں گندھا ہے کہ تاب لانا مشکل ہو جاتا ہے۔ کوئی فیصلہ نہ کر پایا تھا کہ اتنے میں ایک مضمون پہ نگاہ پڑی۔ رسول اکرم صلی اللہ علیہ وآلہ وسلم کے آخری ایام ۔ جب آپ نے دردمند سیدنا بلال سے کہا کہ اہل ایمان کو مسجد میں جمع ہونے کی تلقین کریں۔ علیل تھے اور اس قدر کہ سہارا لے کر منبر پہ تشریف فرما ہوئے۔ ارشاد کیا: ممکن ہے کسی کے ساتھ مجھ سے زیادتی سرزد ہو گئی ہو ۔ وہ اپنا بدلہ لے لے۔ فرمایا: بہتر ہے کہ پروردگار کی بارگاہ میں حاضر ہونے سے پہلے قرض چکا دیا جائے۔ مسجد سسکیوں سے گونجنے لگی اور دیر تک گونجتی رہی۔ ابھی کچھ دیر پہلے پچھلی چار صدیوں کے ممتاز مغربی مفکرین کے اقوال زریں پہ غور کرتے ہوئے بار بار یہ احساس ہوا کہ ہم تو خیر ہمیشہ کے سہل کوشش تھے ۔ کوئی بلند ہمت اور صاحب استقامت بھی کتنی ہی کوشش کر ڈالے، علم کے سمندر سے چند قطرے ہی نصیب ہوں گے۔ زندگی کا خیرہ کن تنوع اور ہمیشہ جاری رہنے والی کشمکشِ کی ہزار جہات! اب سرکار عالی وقار کے آخری ایام کی روداد پڑھنا شروع کی تو جگر خون ہونے لگا ۔ یہ ہے علم ۔ یہ کامل ادراک ہے، درد اور انہماک میں گندھا ہوا۔ وجود باری تعالیٰ کی ہمہ وقت موجودگی کا کامل یقین ۔ مخلوقِ خدا سے ایسی والہانہ محبت کہ کوئی ماں بھی اپنے اکلوتے فرزند سے کیا کر سکے گی۔ تو آدمی کی متاع کیا ہے؟ نہیں فقط علم نہیں بلکہ اس کے ثمر حلم، ایثار ، درد مندی اور صبر پیہم بھی۔ اس علم سے کیا حاصل جو خبط عظمت اور زعم تقوا پیدا کرے۔ جی چاہا کہ حضور کے آخری ایام پر قدرے طویل مضمون لکھنے کی کوشش کروں۔ مگر کہاں؟ کون کر سکتا ہے آرائش فروس بریں۔ عبقری غالب نے بھید کو پا لیا تھا۔ نعت رقم کرنے کی بجائے اس نے فقط ایک شعر پہ اکتفا کیا۔ غالب ثنائے خواجہ بہ یزداں گزاشتم کاں ذات پاک مرتبہ دان محمد است سبھی کو پرھنا چاہئے ۔ مشرق و مغرب ، قدیم اور جدید جس قدر بھی ممکن ہو مگر سیرت سرور عالم میں انہماک پیدا نہ کیا تو باقی ادراک بھی رائیگاں ۔ خیمہ افلاک کا استادہ اسی نام سے ہے نبض ہستی تپش آمادہ اسی نام سے ہے۔