unknown

இது தற்போது ஒரு முக்கிய பிரச்சனையாக தமிழ்நாட்டில் இருக்கிறது. முன்னர் ஒரு பெண்ணிற்கு குழந்தை பிறக்கவில்லை என்றால் அவரை விவகாரத்து செய்து பெற்றோர் வீட்டிற்கு அனுப்பி விடுவார்கள். அந்தப் பெண் பெரும்பாலும் 50 வயதுக்கு மேற்பட்ட முதியவரை தான் இரண்டாம் தரமாக திருமணம் செய்து கொள்ள முடியும் இல்லாவிட்டால் பெற்றோர் வீட்டிலேயே சம்பளம் இல்லாத வேலைக்காரியாக தன்னுடைய வாழ்நாளை கழித்து முடிக்க வேண்டும். மிகப்பெரும் வேதனையான வாழ்க்கை அது. பெண்ணின் பக்கமே தவறு என்று சமுதாயமே நம்பிய காலகட்டம் அது. ஆணை பரிசோதனைக்கு அழைத்தால் வரவே மாட்டார்கள். பையன் வீட்டார், ஆம்பள சிங்கம் எங்கள் பரம்பரையில் இப்படி ஒரு கேஸே இல்லை என்று முடித்து விடுவார்கள். ஆனால் தற்போது பொருளாதார வளர்ச்சி பெற்ற சூழலில், பெண் சொந்த காலில் நிற்கும் இந்த பொற்காலத்தில் மகப்பேறு இல்லை என்பதால் விவகாரத்துகள் பெரும்பாலும் நடைபெறுவதில்லை. ஆணின் பக்கமும் சரிசமமாக தவறுகள் இருக்கிறது என்று நிரூபணம் ஆகி மகப்பேறு இல்லாதவர்கள் செயற்கை கருவுறுதலை நோக்கி நகர்கிறார்கள். ஆனால் இதற்கான செலவு என்பதுதான் தற்போது மலைப்பாக இருக்கிறது. குறைந்தபட்சம் 7 லட்சம் முதல் 10 லட்சம் வரை ஆகிறது என்கிறார்கள். ஏனென்றால் பரிசோதனை துவங்கி பிரசவம் வரை அவர்களுடனே பயணிக்க வேண்டி இருக்கிறது. இது பெரும்பாலும் கீழ் நடுத்தர வகுப்பு மக்களாலும் ஏழை மக்களாலும் afford செய்ய முடியாத தொகை. முதல் முறை பெயிலியர் ஆகிவிட்டால் அடுத்த மருத்துவமனை/அடுத்த முறை என்று போகும்போது இன்னும் செலவு கூடுதல் ஆகிறது. கேள்விப்பட்டவரை சில பெற்றோர்கள் 20 லட்சம் வரை கூட செயற்கை கருவுறுதல் முறைக்கு செலவிட்டு இருக்கிறார்கள். இரண்டாவது அல்லது மூன்றாவது மருத்துவமனை சென்று கூட குழந்தை பெற்றவர்கள் உண்டு. திருமங்கலம் போன்ற மூன்றாம் நிலை நகரங்களில் கூட மிகப் பெரிய செயற்கை கருவுறுதல் மருத்துவமனைகள் வந்துவிட்டன. இவர்கள் மார்க்கெட் சர்வே போல ஒன்று செய்கிறார்கள். விசேஷ நாட்கள் இல்லாத ஞாயிற்றுக்கிழமைகளில் நகரின் மத்தியில் ஒரு மண்டபத்தை பிடிக்கிறார்கள். இரண்டு வார காலம் தொடர்ச்சியாக விளம்பரம் செய்கிறார்கள். எல்லாமே இலவசம் சோதனை செய்து தருகிறோம் என்று. நிறைய பெற்றோர்கள் செல்கிறார்கள். அவர்களிடமிருந்து தகவல்கள் சேகரிக்கப்படுகின்றன. செலவு செய்யும் வாய்ப்பு உடைய பெற்றோர்கள் அதிகம் இருந்தால் உடனே அங்கே ஒரு மருத்துவமனை வந்து விடுகிறது.‌ கடந்த 10 ஆண்டுகளில் அதிகம் துவங்கப்பட்ட மருத்துவமனைகளில் அதிகம் செயற்கை கருவுறுதல் மருத்துவமனைகள் தான். தமிழ்நாடு அரசு 2022-23 பட்ஜெட்டில் அரசு மருத்துவமனைகளில் செயற்கை கருவுறுதல் மையம் அமைக்கப்படும் என்று தெரிவித்திருந்தது. சென்னை எழும்பூர் அரசு மருத்துவமனையில் கிட்டத்தட்ட ஏழு கோடி செலவில் செயற்கை கருவுறுதல் மையம் அமைக்கப்பட்டு செயல்பட்டுக் கொண்டிருக்கிறது. மதுரை அரசு ராஜாஜி மருத்துவமனையிலும் துவங்கப் போவதாக செய்திகள் வந்தன. ஆனால் இவை தற்போது இருக்கும் வாழ்க்கை சூழலுக்கு அதனால் குறைந்து வரும் கருவுறுதலுக்கு போதுமானதாக இருக்குமா என்ற கேள்வி இருக்கிறது. ஒவ்வொரு மாவட்ட மருத்துவமனையிலும் நிச்சயம் ஒரு செயற்கை கருவுறுதல் மையம் அமைக்கப்பட்டால் தான் கீழ் நடுத்தர வர்க்க குடும்பங்களும் ஏழை குடும்பங்களும் பயனடைவார்கள். திராவிட மாடல் முதல்வர் @mkstalin அவர்கள் இதை கனிவோடு பரிசீலிக்க வேண்டும்.