Modesta Z

Kuna watu katika jamii yetu hawapati heshima wanayostahili. Hawa wanafanya kazi kubwa ‘nyuma ya pazia’ inayoishia kuwapa sifa wengine. Fikiria muuguzi anafanya vingapi kwa mgonjwa. Mgonjwa akipona nani anasemwa kirahisi? Mganga. Fikiria kazi kubwa anayofanya fundi mitambo studio na mpiga picha nyuma ya kamera. Kipindi chote hawa huwasikii zaidi ya majina ya mchambuzi na mwandishi wa habari. Fikiria mwandishi wa hotuba (msaidizi wa kiongozi) anatumia muda gani kutafiti na kuandika. Hotuba ikigusa maeneo muhimu hadhira ikaipokea vizuri nani anayepigiwa makofi? Kiongozi aliyeandikiwa. Fikiria hatari anazokutana nazo mwanajeshi anayekesha kulinda mipaka. Nchi ikiwa salama mwanasiasa nani anatajwa? Wanasiasa. Husikii majina ya wanajeshi. Fikiria watafiti wanaoshinda vijijini na maporini. Hawa hata majina yao hayafahamiki kwa umma lakini wako nyuma ya maamuzi mengi ya kisera na pongezi zinazoelekezwa kwenye taasisi. Fikiria dada mlezi (housegeli) anapitia mangapi kuhakikisha mtoto yuko salama wakati mzazi akiendelea na vipaumbele vingine. Mtoto akiwa na afya akakua vizuri, akawa na tabia njema nani anajisifu? Mzazi. Fikiria mlezi wa bweni anayekaa karibu na watoto akisikiliza shida zao na kuwafanya wajisikie salama kusoma. Shule ikifaulisha husikii majina yao yakitajwa kokote. Nikuulize, mwenzetu, unafikiri unapata sifa kwa mgongo wa nani? Nani anafanya kazi nyuma ya pazia lakini sifa unapata wewe zaidi? Unafikiri kuna madhara gani hutokea tusipowatambua watu hawa? Tujifunze kuwatambua watu hawa wanaofanya kazi kubwa isiyoonekana na wengi. Tujifunze kuwawekeza mazingira ya kujisikia kazi zao zinaheshimiwa. Saa nyingine hata, ‘asante, nakushukuru,’ inatosha.