Wanachama wa Chama cha Demokrasia na Maendeleo (CHADEMA) pamoja na watumiaji wa mitandao ya kijamii wamepaza sauti wakitaka Mwanachama wa Chadema na Mwanaharakati Twaha Mwaipaya aachiwe huru, kufuatia taarifa za kutekwa kwake na watu wasiojulikana jijini Nairobi, Kenya. Kupitia mitandao ya kijamii, watu mbalimbali wameeleza wasiwasi wao kuhusu usalama wa Mwaipaya, huku wakitumia alama ya reli ya **#FreeTwahaMwaipaya** kueneza ujumbe wa kutaka apatikane na kuachiwa huru. Kwa mujibu wa taarifa zilizosambazwa, Mwaipaya anadaiwa kutekwa muda mfupi uliopita katika eneo la Kamulu Road, Nairobi, baada ya watu waliokuwa wamevaa kiraia na kufunika nyuso zao kwa barakoa kutumia magari matatu kuizuia gari aliyokuwa akisafiria. Taarifa hizo zinaeleza kuwa watu hao walimshusha Mwaipaya kutoka kwenye gari hilo na kuondoka naye, huku mazingira ya tukio hilo yakizua maswali kuhusu mahali alipo na usalama wake. Baadhi ya watu waliosambaza taarifa hizo wameeleza kuwa namna tukio hilo lilivyotekelezwa ilionekana kama operesheni iliyopangwa. Wanaopaza sauti kupitia mitandao ya kijamii wanataka kupatikana kwa taarifa za uhakika kuhusu alipo Mwaipaya, huku wakisisitiza umuhimu wa kulinda usalama wake na kuhakikisha haki zake zinaheshimiwa.