𑘀𑘪𑘲𑘡𑘰𑘫 𑘄𑘬𑘰 𑘪𑘭𑘡𑘿𑘝 (अविनाश उषा वसंत)

खाली जे देतोय ते खूप शांतपणे वाचा. खूप शांतपणे. विनंती करतोय. मी व्हिडीओसाठी जे लिहीतोय त्यातील एक भाग... ही अशी सगळी प्रातिनिधिक प्रकरणं ज्यांचं कंपायलेशन करून मी तुमच्यासमोर मांडलं. पण तुम्हाला एक सांगू… सरकारनं आता आता विद्यार्थ्यांच्या आत्महत्या मोजायला सुरूवात केलेलीये. कारण… १९५० ते २०२६ या संपूर्ण काळातील मागासवर्गीय विद्यार्थ्यांच्या आत्महत्यांचा एकत्रित अधिकृत आकडा भारतात कुठेही अस्तित्वात नाही. सरकारने तो कधी गोळाच केलेला नाही. NCRB दरवर्षी विद्यार्थी आत्महत्यांची एकूण संख्या देते, पण जातीनिहाय मांडणी करत नाही. जातीच्या आधारावर आत्महत्येचा डेटा विभागायला NCRB नकार देते, त्यामुळे जातीय अपमान आणि बहिष्कारामुळे सोसावा लागणाऱ्या मानसिक त्रासाची तीव्रता समजूनच घेता येत नाही. (Sabrang India). डिसेंबर २०२३ मध्ये लोकसभेत SC/ST विद्यार्थ्यांच्या भेदभावामुळे झालेल्या आत्महत्यांबद्दल प्रश्न विचारला गेला, तेव्हा तत्कालीन सामाजिक न्याय राज्यमंत्री नारायणस्वामी यांनी अशी कोणतीही माहिती उपलब्ध नसल्याचे संसदेत सांगितलं होतं. (Deccan Herald). २०२३ मध्येच लोकसभेत हेही मान्य करण्यात आलं की जातीय भेदभाव आणि SC/ST विद्यार्थ्यांच्या आत्महत्यांचा संबंध दाखवणारा कोणताही अधिकृत डेटा सरकारने कधी जमाच केलेला नाहीये. (The Wire). आणि २०२६ मध्ये एका IIT माजी विद्यार्थ्याने, धीरज कुमार सिंह यांनी, २००५ पासून IIT मधील आत्महत्यांची जात किंवा प्रवर्गासह माहिती RTI मधून मागितली, तेव्हा IIT नी गोपनीयतेचे कारण देऊन ती नाकारली आणि केंद्रीय माहिती आयोगानेही ती भूमिका योग्य ठरवली. (The Hitavada). एकूण विद्यार्थी आत्महत्या, NCRB नुसार आपण ना आता एक काम करूयात मागच्या २६ वर्षांत म्हणजे हे नवीन शतक सुरू झाल्यापासून भारतात दरवर्षी किती विद्यार्थ्यांनी आत्महत्या केल्या आहेत याची एक सविस्तर आकडेवारीच पाहूयात. १९९९ ते २००३ या चार वर्षांच्या कालखंडात एकुण २७,९९० विद्यार्थ्यांनी आत्महत्या केली आहे. किती … २७,९९०. आपण अजून पुढची आकडेवारी पाहूयात. म्हणजे तुम्हाला परिस्थितीची दाहकता लक्षात येईल. २००४ ते २००८ या चार वर्षांच्या कालखंडात २८,९१३ तर २००९ ते २०१३ मध्ये हा आकडा वाढून ३६,९१३ इतका झाला होता. म्हणजे दर चार वर्षांत विद्यार्थ्यांच्या आत्महत्यांचा आकडा वाढतच आलेला आहे. म्हणून आपण आता वर्षनिहाय आकडेवारी पाहूयात. २०१४ साली ८,०६८ | २०१५साली ८,९३४ | २०१६ साली ९,४७८ | २०१७ साली ९,९०५ | २०१८ साली १०,१५९ | २०१९ साली १०,३३५ | २०२० साली १२,५२६ | २०२१ साली १३,०८९ | २०२२ साली १३,०४४ | २०२३ साली १३,८९२ | २०२४ साली १४,४८८ | २०१४ ते २०२४ या संघ भाजपच्या विकृत ब्राह्मण्यवादी राजवटीतल्या १० वर्षांत १,२३,९१८ विद्यार्थ्यांनी आपलं जीवन कायमचं संपवलंय. आणि हाच आकडा जर आपण मागच्या २६ वर्षांचा धरला तर १९९९ ते २०२४ या २६ वर्षांमध्ये देशात २,१७,७३४ विद्यार्थ्यांनी आत्महत्या केली. हे सर्व जातींचे, शाळा आणि कॉलेज मिळून आकडे आहेत. यातली १० वर्षे काँग्रेसची आहेत तर ऊर्वरीत १६ वर्षे भाजपाची. पण या आकडेवारीतून काय लक्षात आलंय आपल्या… की, २०२४ साली भारतात रोज जवळपास ४० विद्यार्थ्यांनी आत्महत्या केल्या आहेत. किती दर दिवसाला चाळीस… म्हणजे दर ३६ मिनिटांना एक विद्यार्थी आपल्या देशात आत्महत्या करतोय. हा व्हिडीओ सुरू केल्यापासून संपेपर्यंतच्या कालखंडात भारतात दोन विद्यार्थ्यांनी आत्महत्या केलेली असेल. ही आपली परिस्थिती बनलीये देशाची. (The Hitavada). आपण खूप बढाया मारतो ना आपल्या महाराष्ट्राच्या.. आपल्या राज्याच्या, आपल्या मराठी भाषेच्या… साला हे राज्य, ही भाषा, भाषेचं राजकारण, दगडांच्या देशांची संस्कृती वगैरे वगैरे सब झूठ आहे. एकट्या महाराष्ट्रात २०२४ साली १९०९ विद्यार्थ्यांच्या आत्महत्यांनी देशात पहिला क्रमांक पटकावलेलाय. देशात नंबर वन महाराष्ट्र विद्यार्थ्यांच्या आत्महत्यांमध्ये. म्हणजे देशातल्या एकूण आत्महत्यांपैकी १३.२ टक्के. त्यानंतर अपेक्षेप्रमाणे उत्तर प्रदेश १,५८५, मग येतो क्रमांक तो मध्य प्रदेशचा १,४४७ आत्महत्यांसह आणि मग तामिळनाडू १,२८७. नुसत्या २०१९ ते २०२३ मध्ये महाराष्ट्रात ८,७७९ विद्यार्थी आत्महत्या झाल्या. (The Quint). IC3 अहवालानुसार NCRB चे आकडे पोलिसांच्या FIR वर आधारित असल्याने प्रत्यक्ष संख्या याहून जास्त असण्याची शक्यता आहे (Tribune). जास्त म्हणजे किती माहीतीये का… अडीचपट… लक्षात येतंय का अडिचपट म्हणजे काय झालं ते… माझा हा कोरड्या तोंडाचा शिमगा अजून तरी २०२४ च्या आकड्यांवरच आहे. २०२५ आणि २०२६ चे आकडे एनसीआरबी ने प्रकाशितच केलेले नाहीत. आणि बहुधा आता ते कधीच प्रकाशित होणार नाहीत.