ఒకప్పుడు ఎగతాళి చేసిన మా యాసే… ఇప్పుడు తెలుగు సినిమాకు హీరోయిజం! ఒకప్పుడు మా ప్రాంతాన్ని చిన్నచూపు చూశారు. ఈ మట్టి మనుషులను వెక్కిరించారు. మా భాషను, మా మాటతీరును అవహేళన చేశారు. (అందరూ కాదు… ) కానీ తెలుగు సినిమాలో ఒకప్పుడు తెలంగాణ యాసకు ఇచ్చిన స్థానం ఏమిటో మనకు తెలుసు. హీరోకు ఒక భాష… కమెడియన్‌కు తెలంగాణ యాస! హీరోకు ఒక మాటతీరు… విలన్‌కు తెలంగాణ మాట! తెలంగాణ యాస వినిపిస్తే చాలు నవ్వు రావాలన్నట్టుగా పాత్రలు సృష్టించారు. మా మాటను కామెడీ చేశారు. మా పలుకుబడిని వెటకారం చేశారు. మా సంస్కృతి, సంప్రదాయాలు, జీవన విధానం, ఆధునికతను కూడా తక్కువ చేసి చూపించిన సందర్భాలు ఉన్నాయి. కానీ కాలం మారింది… కథ మారింది! ఒకప్పుడు కమెడియన్‌తో పలికించిన తెలంగాణ యాసను… ఇప్పుడు హీరోతో పలికిస్తున్నారు. ఒకప్పుడు విలన్ నోట పెట్టిన మా మాటను… ఇప్పుడు హీరో ఎలివేషన్‌కు వాడుతున్నారు. ఒకప్పుడు వెక్కిరించిన మా పలుకులే… ఇప్పుడు సినిమాకు మాస్ అప్పీల్! అంతేనా…? ఇప్పుడు తెలుగు సినిమా జనంలోకి వెళ్లాలంటే… తెలంగాణ మట్టి వాసన తగలాల్సిందే! ఒకటో రెండో తెలంగాణ మట్టిలో మొలిచిన పాటలు కావాలి… మా పల్లె పదాలు కావాలి… మా జానపదం కావాలి… మా బతుకుల్లోంచి పుట్టిన సాహిత్యం కావాలి… మా డప్పు దరువు కావాలి… మా నేల గొంతుక కావాలి! మా యాస కావాలి… మా పాట కావాలి… మా పదం కావాలి… మా మట్టి వాసన కావాలి! తెలంగాణ నేలలో పుట్టిన పదం ఇప్పుడు థియేటర్‌ను ఊపుతోంది. తెలంగాణ పల్లెల్లో పుట్టిన బాణీ ఇప్పుడు దేశమంతా మార్మోగుతోంది. ఈ మట్టి నుంచి వచ్చిన సాహిత్యం ఇప్పుడు సినిమాకు ఊపిరవుతోంది. ఒకప్పుడు మా మాటను కామెడీ కోసం వెతికారు… ఇప్పుడు మీ సినిమా హిట్ కోసం మా మాటను వెతుకుతున్నారు! తెలంగాణ యాస రాకపోయినా నేర్చుకుంటున్నారు. ప్రత్యేకంగా సాధన చేసి మరీ పలుకుతున్నారు. మా భాషలో సినిమాలు చేస్తున్నారు. మా యాసతో వ్యాపారం చేస్తున్నారు. సంతోషమే!... ఎందుకంటే తెలంగాణ యాసకు దక్కాల్సిన గౌరవం దక్కుతోంది. తెలంగాణ కథలకు, తెలంగాణ పాత్రలకు, తెలంగాణ పాటకు, తెలంగాణ సాహిత్యానికి, తెలంగాణ మట్టి వాసనకు తెలుగు సినిమా మరింత స్థానం ఇస్తోంది. కానీ ఒక్క విషయం గుర్తుంచుకోవాలి… మీ సినిమాకు తెలంగాణ యాస ఒక మార్కెట్ కావచ్చు. మీ పాత్రకు అది ఒక స్టైల్ కావచ్చు. మీ హీరోకు అది ఒక మాస్ ఎలివేషన్ కావచ్చు. మీ సినిమాకు మా పాట ఒక హిట్ నంబర్ కావచ్చు. కానీ మాకు మాత్రం అది మా అస్థిత్వం! ఈ నేలపై పుట్టిన మాకు తెలంగాణ భాష బతుకుదెరువు కాదు… మా బతుకే! మా యాస ఒక ట్రెండ్ కాదు… మా తరతరాల వారసత్వం. మా పాట కేవలం వినోదం కాదు… మా బతుకు చిత్రం. మా మాట ఒక సినిమా డైలాగ్ కాదు… ఈ మట్టితో పెనవేసుకున్న సాంస్కృతిక పేగుబంధం. అందుకే— ఏ ప్రాంతపు భాషనైనా గౌరవిద్దాం. ఏ యాసనైనా చిన్నచూపు చూడొద్దు. భాషలో గొప్ప–తక్కువలు ఉండవు. ప్రతి యాస వెనుక ఒక నేల ఉంటుంది… ఒక చరిత్ర ఉంటుంది… ఒక సంస్కృతి ఉంటుంది… కోట్ల...లక్షలాది మంది ఆత్మగౌరవం ఉంటుంది. నాడు నవ్వులపాలు చేసిన తెలంగాణ యాస… నేడు వెండితెరపై హీరోల భాషగా మారింది. నాడు పల్లెలకే పరిమితమని చూసిన తెలంగాణ పాట… నేడు వెండితెరను, కోట్లాది మంది గుండెలను ఊపుతోంది. ఇది కేవలం సినిమా మార్పు కాదు… తెలంగాణ భాషకు, తెలంగాణ యాసకు, తెలంగాణ పాటకు, తెలంగాణ సంస్కృతికి దక్కిన గౌరవం! మా భాష… మా యాస… మా పాట… మా సాహిత్యం… మా మట్టి… మా గుర్తింపు. తెలంగాణ యాస అంటే ట్రెండ్ కాదు… తెలంగాణ పాట అంటే కేవలం బీట్ కాదు… అవి మా బతుకు… మా సంస్కృతి… మా తెలంగాణ అస్థిత్వం! @TBO_Updates #telugumoviedirectors